- 2019-08-18 05:28:00
- ព័ត៌មាន
នៅពីក្រោយអាជីពសម្ដែងដ៏ហ៊ឺហា អៀង ចេនឡា ជាអ្នកលក់មាន់មែន ឬមិនមែន?
- 2019-08-18 05:28:00
- ចំនួនមតិ 0 | ចំនួនចែករំលែក 0
នៅពីក្រោយអាជីពសម្ដែងដ៏ហ៊ឺហា អៀង ចេនឡា ជាអ្នកលក់មាន់មែន ឬមិនមែន?
ចន្លោះមិនឃើញ
ថ្មីៗនេះ លោក អៀង ចេនឡា ស្រាប់តែបានបើកបង្ហើបពីដំណឹងមួយថា តាមពិតលោកនៅពីក្រោយឆាកនៃការសម្ដែង ពេលខ្លះមើលទៅឡូយអស់ស្ទះនោះ តែធាតុពិតលោក គឺជាអ្នកលក់មាន់ទេ។ ចំណុចនេះ បានធ្វើឲ្យអ្នកគាំទ្រលោកមានការចាប់អារម្មណ៍ និងខ្លះសង្ស័យនៅឡើយ។
លោក អៀង ចេនឡា បានប្រាប់អ្នកគាំទ្រពីរឿងនេះទៅអ្នកគាំទ្ររបស់លោកលើប្រព័ន្ធហ្វេសប៊ុក ដោយមានទាំងដាក់រូបលោកដឹកមាន់មួយទ្រុងផង។ តារាកំប្លែងអះអាងថា ធាតុពិតរបស់លោក ដែលនៅពីក្រោយការសម្ដែង គឺលោកត្រឹមជាអ្នកលក់មាន់ប៉ុណ្ណោះ។ អ្នកគាំទ្រមួយចំនួន បានចាប់ផ្ដើមសង្ស័យ និងខ្លះ យល់ថា លោកគ្រាន់តែលេងសើច ព្រោះជាតារាកំប្លែងស្រាប់។
ជុំវិញបញ្ហានេះ សាមីខ្លួនលោក ចេនឡា បានបកស្រាយប្រាប់ sabay ថា លោកមិនបានលេងសើចនោះទេ គឺជាការពិត។ តារាសម្ដែងដែលឈានទៅលេងកំប្លែងបន្ថែមរូបនេះ ប្រាប់ថា លោកគឺជាអ្នកលក់មាន់ពិតមែន ដែលការងារនេះ លោកចាប់លក់តាំងពីប្រមាណ ១ឆ្នាំមុនម្ល៉េះ។ ចំពោះមូលហេតុ ចេនឡា ប្រាប់ថា ពីដំបូងលោក គ្រាន់តែចិញ្ចឹមលេងប៉ុណ្ណោះ ដោយសារលោកជាអ្នកចូលចិត្តចិញ្ចឹមសត្វ។
ដំបូងឡើយលោក អៀង ចេនឡា បានទិញមាន់ពីផ្សារប្រមាណ ៤-៥ក្បាល ទុកគ្រាន់ចិញ្ចឹមលេង និងកែអផ្សុកប៉ុណ្ណោះ។ ក្រោយមកមេមាន់លោក ក៏បានកើតកូនច្រើនឡើង លោកក៏ថតបង្ហោះក្នុង Group មិត្តភ័ក្ដិ និងទំព័រហ្វេសប៊ុករបស់ខ្លួន ស្រាប់តែមានអ្នកចាប់អារម្មណ៍ និងសុំទិញ ហើយលោកក៏បានចាប់លក់ឲ្យគេ។
ឃើញដូច្នេះ លោកក៏ចាប់ផ្ដើមមានគំនិតថា គ្រាន់តែចិញ្ចឹមលេងសោះ ក៏អាចរកចំណូលបានដែរ បែបនេះ លោកក៏ចាប់ផ្ដើមពង្រីកការចិញ្ចឹម សម្រាប់ផ្គត់ផ្គង់តម្រូវការតែម្ដង។ លោក ចេនឡា បញ្ជាក់ថា ក្នុង១ខែ លោកអាចចំណេញពីការលក់មាន់របស់លោកប្រមាណជា ៣០០-៤០០ដុល្លារដែរ។ តែបើរដូវត្រូវការខ្លាំង ដូចជាសែនចិន បុណ្យភ្ជុំអីជាដើម ជួន១ថ្ងៃលោកអាចលក់បាន ២០០-៣០០ ដុល្លារឯណោះ។
ដូច្នេះហើយ តារាកំប្លែងរូបនេះបញ្ជាក់ថា រាល់ថ្ងៃ ក្រៅពីការងារសិល្បៈ លោកក៏បានក្លាយជាអ្នកលក់មាន់ ក៏ដូចជាអ្នកផ្គត់ផ្គង់តម្រូវការមាន់មួយរូបដែរ ប្រសិនបើប្រិយមិត្តត្រូវការអាចទាក់ទងលោកបាន៕