- 2020-01-31 08:02:44
- ព័ត៌មាន
សង្ហាដូចគ្រូបង្គោលកីឡាករ ចាន់ រតនា រូបនេះ ចង់ក្លាយជាតារាម៉ូដែលល្បីមានអីពិបាក!
- 2020-01-31 08:02:44
- ចំនួនមតិ 0 | ចំនួនចែករំលែក 0
សង្ហាដូចគ្រូបង្គោលកីឡាករ ចាន់ រតនា រូបនេះ ចង់ក្លាយជាតារាម៉ូដែលល្បីមានអីពិបាក!
ចន្លោះមិនឃើញ
បុរសកូនខ្មែរកើតនៅបារាំង Sov Men ដែលមានអាជីពជាគ្រូបង្គោល ឬក៏គ្រូបណ្ដុះឲ្យរាងកាយមាំមួន និងមានភាពសាកសម(physical trainer ) បានបង្ហើបថា លោកចង់ក្លាយជាតារាម៉ូដែលអាជីពបន្ថែមទៀតពីលើអ្វីដែលលោកកំពុងមាន។
Sov Men មានវ័យ ២៩ឆ្នាំ ប្រាប់ថា លោកមានឪពុកម្ដាយជាជនជាតិខ្មែរ ប៉ុន្តែលោកបានចាប់កំណើត និងធំធាត់នៅលើទឹកដីប្រទេសបារាំង ហើយលោកបានមកដល់ប្រទេសកម្ពុជាអស់រយៈពេលជិត៥ឆ្នាំហើយ ក្នុងនោះ កីឡា គឺជាមូលហេតុមួយដែលនាំលោកមកទីនេះ ហើយលោកចង់រួមចំណែកខ្លះដល់ការរីកចម្រើននៃវិស័យកីឡារបស់កម្ពុជា ដែលវានឹងអំណោយផលប្រភេទកីឡាអាជីពនានា។
ជាមួយគ្នា លោកក៏មានបេសកកម្មខ្លះទៀត ក្នុងការលើកកម្ពស់ចំណេះដឹងក្នុងចំណោមពលរដ្ឋខ្មែរដែលថា "សុខភាពល្អ គឺត្រូវមានកីឡា និងរបបអាហារ"។ ដូច្នេះហើយ ទើបលោកបានចាប់អាជីពជាគ្រូបង្គោលផ្នែកបណ្ដុះបណ្ដាល ជួយឲ្យបងប្អូនប្រជាពលរដ្ឋមានរាងកាយមាំមួន។ បន្ថែមពីនេះ នៅពេលខាងមុខ លោកក៏គ្រោងបើកសេវាកម្មដឹកជញ្ជូនអាហារសម្រាប់សុខភាពទៀត ដើម្បីឲ្យអ្វីដើរទៅស្របគ្នា ក្នុងការផ្ដល់ដល់បងប្អូនប្រជាពលរដ្ឋខ្មែរមានសុខភាពល្អ។
ក្នុងអាជីពជាគ្រូបណ្ដុះបណ្ដាលរាងកាយមាំមួននេះ Sov ប្រាប់ថា មានប្រជាពលរដ្ឋខ្មែរច្រើនបានមករកលោក ហើយនៅក្នុងចំណោមនោះ ក៏មានកីឡាករក្បាច់គុនបុរាណខ្មែរ ចាន់ រតនា និងកីឡាករបាល់ទាត់អាជីព កុក បូរីស ក៏បានមកទទួលយកការបណ្ដុះបណ្ដាលផ្នែករាងកាយមាំមួនពីលោកដែរ តែជាមួយគ្នា លោកក៏បានរៀនគុនខ្មែរពីកីឡាករជើងខ្លាំង ចាន់ រតនា របស់កម្ពុជាដែរអស់រយៈពេលប្រមាណ១ឆ្នាំហើយ រហូតលោកបានយល់ពីភាពអស្ចារ្យរបស់ក្បាច់គុនបុរាណខ្មែរមួយនេះ។
បុរសវ័យ ២៩ ឆ្នាំប្រាប់ទៀតថា "គុនខ្មែរ" ជាកេរដំណែលរបស់ខ្មែរគ្រប់រូប ហើយគ្រប់គ្នាចូលចិត្តទស្សនា ហើយមានមោទកភាពជាមួយវា ប៉ុន្តែគួរឲ្យស្ដាយ លោកមើលឃើញ សិល្បៈក្បាច់គុនខ្មែរមួយនេះ ហាក់មិនទាន់មានការទទួលស្គាល់ទូលំទូលាយ បើធៀបនឹង Muy Thai របស់ថៃ និង Lethwei របស់ ភូមា។ ក្រៅពីនេះ នៅក្នុងស្រុកក៏មិនសូវមានកន្លែងសម្រាប់ហាត់ច្រើនដែរ។
ទាំងនេះ គ្រូបង្គោលដដែល ប្រាប់ថា ទំនងជាមូលហេតុដែលលោកនឹងមិនទៅណាឆ្ងាយពីកម្ពុជា ព្រោះលោកស្រឡាញ់អ្វីគ្រប់យ៉ាងនៅទីនេះ។ មួយវិញទៀត ដូចប្រាប់ពីខាងលើ លោកចង់មានចំណែកក្នុងការធ្វើឲ្យវិស័យកីឡារបស់កម្ពុជាមានការទទួលស្គាល់កាន់តែច្រើន ទាំងនៅអាស៊ី និងពិភពលោក។ ប៉ុន្តែក៏មិនអាចទាត់ចោលដែរថា កីឡា ក៏ជាអ្នករុញឲ្យលោកឈានទៅស្រឡាញ់អាជីពជាតារាម៉ូដែលមួយបន្ថែមទៀត។
លោកថា ជាគ្រូបង្គោលនៅកន្លែងហ្វឹកហាត់កីឡា ធ្វើឲ្យលោកមានឱកាសថតស្ប៉តពាណិជ្ជកម្មរបស់ក្រុមហ៊ុនលក់សម្ភារៈកីឡាមួយចំនួន។ យ៉ាងណា Sov ប្រាប់ថា ដើមឡើយលោកគ្មានចិត្តចង់លើអាជីពនេះទេ បើទោះលោកមានឱកាសនឹងធ្វើជាច្រើនក៏ដោយ ហេតុផល គឺព្រោះតែលោកមិនមានភាពជឿជាក់លើខ្លួនឯង ប៉ុន្តែក្រោយមក លោកបានចាប់កែប្រែខ្លួនឯង និងព្រមទទួលយកការប្រកួតប្រជែងថ្មីក្នុងជីវិត ជាមួយនឹងការលើកទឹកចិត្តពីមិត្តភ័ក្ដិជាច្រើនផង។
ថ្ងៃមួយ លោកបានឃើញការផ្សព្វផ្សាយជ្រើសរើសតារាម៉ូដែលសម្រាប់ក្រុម "Perfect 10”។ "ពេលនោះ ខ្ញុំក៏ចាប់អារម្មណ៍ ហើយសួរខ្លួនឯង ហេតុអីខ្ញុំមិនអាច និងចាប់ផ្ដើមបង្កើតក្ដីស្រមៃ ថាបើឃើញមុខខ្លួនឯងនៅលើផ្ទាំងផ្សព្វផ្សាយ ឬស្ប៉តពាណិជ្ជកម្មនានា វាយ៉ាងណាដែរ...ដូច្នេះហើយខ្ញុំក៏សម្រេចចិត្តទាក់ទងពួកគេ ហើយចុងក្រោយគឺខ្ញុំបានមកដល់ទីនេះ គឺ Perfect 10”។
លោក បន្តថា មកដល់ពេលនេះ លោកដឹងថា អាជីពជាតារាម៉ូដែល គឺជារឿងដ៏អស្ចារ្យមួយទៀត ហើយលោកនឹងចាប់យកឱកាសនេះ ហើយច្បាស់ណាស់ថា លោកពិតជាចង់ក្លាយជាតារាម៉ូដែលអាជីពដ៏ជោគជ័យម្នាក់នាពេលខាងមុខ ជាមួយ Perfect 10៕
