- 2020-02-01 03:26:33
- ភាពយន្ត
នារីម្នាក់មើលរឿងចប់ យំសស្រាក់រត់ទៅឱប ហ៊ុយ យ៉ាឡេង ហើយលើកមេដៃ "អស្ចារ្យមែនទែន!”
- 2020-02-01 03:26:33
- ចំនួនមតិ 0 | ចំនួនចែករំលែក 0
នារីម្នាក់មើលរឿងចប់ យំសស្រាក់រត់ទៅឱប ហ៊ុយ យ៉ាឡេង ហើយលើកមេដៃ "អស្ចារ្យមែនទែន!”
ចន្លោះមិនឃើញ
ភាពយន្តឆ្លុះបង្ហាញពីជីវិតពិត "ដើម្បីកូន" បាន និងកំពុងធ្វើឲ្យស្ទើរគ្រប់គ្នារំជួលចិត្ត ត្បិតទស្សនាហើយទប់ទឹកភ្នែកមិនបាន។ ជាក់ស្ដែងនារីវ័យកណ្ដាលម្នាក់ បានរត់ទៅឱប ហ៊ុយ យ៉ាឡេង ផលិតករ និងជាតួសម្ដែងក្នុងរឿង ទាំងយំសស្រាក់ និងបានលើកមេដៃហើយពោលពាក្យថា "អស្ចារមែនទែន"។
“អស្ចារ្យ...អស្ចារ្យមែនទែន ខ្ញុំសូមសរសើរបង!!!”។ នារីវ័យកណ្ដាលដែលមិនស្គាល់អត្តសញ្ញាណបានលើកសរសើរលោក ហ៊ុយ យ៉ាឡេង ក្រោយពីស្រាកស្រាន្តពីអារម្មណ៍ក្ដុកក្ដួល។នេះជាទិដ្ឋភាពថ្មីមួយទៀត បន្ទាប់ពីថ្ងៃដំបូង កុមារវ័យ ៨-៩ ម្នាក់បានរត់មករកលោក ផលិតករ និងជាតួអង្គរបស់សាច់រឿង ក្នុងរូបភាពដូចគ្នា។
ក្រោយមកទៀត ក៏មានសិល្បករ និងទស្សនិកជនជាច្រើនទៀតសុទ្ធពោលសរសើរសាច់រឿង "ដើម្បីកូន" ជាមួយអារម្មណ៍ដិតដាមជាមួយសាច់រឿង។ ពួកគេលើកឡើងថា ទស្សនារឿងនេះហើយ ធ្វើឲ្យពួកគេមានមនោសញ្ចេតនាកាន់តែច្រើនជាមួយអ្នកមានគុណ។
គណនី Jee Nith លើកឡើងថា "រយលានអត្ថន័យ មានការអប់រំច្រើន"។ Ling Ling “មើលហើយនឹកអ្នកផ្ទះណាស់ មួយរយៈចុងក្រោយនេះ មិនសូវបានសួរសុខទុក្ខពួកគាត់ទេ...យំក្នុងរោងកុនមិនអស់ មកយំក្នុងបន្ទប់ម្នាក់ឯងទៀត នឹកម៉ាក នឹកប៉ា នឹកយាយ នឹកតាណាស់...”។ លោក យ៉ាឡេង អះអាងថា ភាគច្រើននៃអ្នកមើលរឿងនេះហើយ ពួកគេរលីងរលោងទឹកភ្នែក។
ងាកមកប្រតិកម្មនារីវ័យខាងលើ ផលិតកររឿង "ធ្មប់" ដែលឈ្នះពានភាពយន្តទទួលបានការគាំទ្រច្រើនប្រចាំឆ្នាំ ២០១៩ ពីមហោស្រពភាពយន្តជាតិលើកទី៦ បានឲ្យដឹងថា ភ្លាមៗ ក្រោយទទួលបានប្រតិកម្មនេះ លោកហាក់ភាំង។ "បេះដូងខ្ញុំភាំងញរ័រំជួលតាមគាត់ ខ្សែជីវិតបងស្រីមិនដឹងត្រូវនឹងរឿងនេះយ៉ាងណាបានគាត់យំដល់ថ្នាក់នេះ"។ យ៉ាឡេង ថ្លែង។
អ្នកនិពន្ធដដែល បន្តថា នារីខាងលើ បានសរសើរហើយសរសើរទៀតចំពោះលោក។ ចំណុចមួយដែលលោកកត់សម្គាល់ នារី ប្រហែលជាអាណិតលោកមួយផ្នែកដែរ ព្រោះបានឃើញពីការលំបាករបស់លោកនាមជាឪពុកនៅក្នុងរឿង។
គិតមកដល់ពេលនេះ រឿង "ដើម្បីកូន" ស្ថិតនៅលើរោងកុន បានជិត១សប្ដាហ៍ហើយ។ រយៈពេលនេះ ផលិតករអះអាងថា ចំនួនអ្នកមើលមានការកើនឡើងរៀងរាល់ថ្ងៃ។ "ធៀបនឹងរឿង "ធ្មប់" ដែលកញ្ឆក់បានការគាំទ្រលឿន តែរឿងនេះ ការគាំទ្រកើនឡើងសន្សឹមៗរៀងរាល់ថ្ងៃ ហើយមិត្តភ័ក្ដិដែលជាអ្នកផលិតភាពយន្តដូចគ្នាបានសរសើរ។ ពួកគេបានព្យាករណ៍ថា រឿងនេះទំនងអាចនៅអាចបញ្ចាំងនៅលើរោងកុនបានយូរ!”។ ហ៊ុយ យ៉ាឡេង ថ្លែង៕