- 2020-03-06 09:06:25
- ភាពយន្ត
មានដំណឹង កញ្ញាឯកដ៏ស្រស់ស្អាតកម្ពុជា ប៉ះជាមួយប្រុសសង្ហាមីយ៉ាន់ម៉ា ក្នុងភាពយន្តខ្មែរមួយ
- 2020-03-06 09:06:25
- ចំនួនមតិ 0 | ចំនួនចែករំលែក 0
មានដំណឹង កញ្ញាឯកដ៏ស្រស់ស្អាតកម្ពុជា ប៉ះជាមួយប្រុសសង្ហាមីយ៉ាន់ម៉ា ក្នុងភាពយន្តខ្មែរមួយ
ចន្លោះមិនឃើញ
ថ្មីនេះ មានព័ត៌មានថា កញ្ញាឯកអាស៊ីប៉ាស៊ីហ្វិកកម្ពុជា ឆ្នាំ២០១៩ គឺកញ្ញា ប៉ូ គីមថេងសុធីតា ត្រូវបានចាប់ឲ្យជួបគ្នាជាមួយតួប្រុសរូបសង្ហារបស់ភូមា Paing Takhon ក្នុងខ្សែភាពយន្តខ្មែរមួយរឿងរបស់ផលិតកម្មអិលឌី។
តាមប្រភពដែលជាតារាសម្ដែងមួយរូប តារាស្រី ប្រុស ជនជាតិខ្មែរ និងភូមាខាងលើ នឹងត្រូវចូលរួមសម្ដែងជាមួយគ្នាក្នុងរឿងសែស្រឡាយ "នាឡិកាដាស់វិញ្ញាណ" ដែលទទួលជោគជ័យយ៉ាងខ្លាំងកាលពីឆ្នាំ ២០១៩ ដោយថែមទាំងបានជាប់ជាភាពយន្តឆ្នើមប្រចាំឆ្នាំថែមទៀត។ ដោយឡែកវគ្គថ្មីនៃខ្សែរឿងខាងលើ នឹងត្រូវដាក់ចំណងជើងថា ”The Clock Red Wall” ហើយតួឯកទាំងពីរត្រូវបានជ្រើសរើសក្រោយពួកបានជាប់ក្នុងការវគ្គបញ្ចេញសមត្ថភាព(Casting)។
ប្រភពដដែលបញ្ជាក់ថា ស្ទើរដូចនឹងរឿង "នាឡិកាដាស់វិញ្ញាណ" ភាពយន្តថ្មីនេះ បានចាយទុនយ៉ាងសម្បើម ដោយក្នុងនោះ ក៏មានព័ត៌មានថា អិលឌី បាន និងកំពុងសាងសង់ Studio ថតផ្ទាល់ធំមួយដើម្បីឲ្យទាន់ការផលិតភាពយន្តនេះឡើយ។
ជុំវិញបញ្ហានេះ លោក លៀក លីដា ចាងហ្វាងផលិតកម្ម នៅមិនទាន់អាចទំនាក់ទំនងបាន។ ប៉ុន្តែក្នុងថ្ងៃដែលលោក និងក្រុមការងារមានមុខឡើងទទួលពានបន្តបន្ទាប់ជាមួយ "នាឡិកាដាស់វិញ្ញាណ" កាលពីចុងឆ្នាំ ២០១៩ ក្នុងកម្មវិធីមហោស្រពថ្នាក់ជាតិលើកទី៦ លោកធ្លាប់បានបង្ហើបដែរថា លោក និងក្រុមការងារបាន និងកំពុងគិតរឿងសែស្រឡាយរបស់ភាពយន្តឈ្នះពានជាច្រើននេះ ហើយក្នុងនោះ គឺរឿង ”The Clock Red Wall” នេះឯង។
យ៉ាងណា ពេលនោះ លោកមិនបានបញ្ជាក់តួអង្គ និងពេលវេលាចេញថតនៅឡើយ។ និយាយពីតួឯកវិញម្ដងកញ្ញាឯកអាស៊ីប៉ាស៊ីហ្វិក ឆ្នាំ២០១៩ កញ្ញា ប៉ូ គីមថេងសុធីតា ដែលគេស្គាល់ថាជាតារាបង្ហាញម៉ូដ មានរូបសម្រស់ស្រស់សោភានោះ គឺត្រូវជ្រើសរើសជាតួឯកហើយ។ ជាមួយនឹងសមិទ្ធផលធំនេះ មានដំណឹងថានៅថ្ងៃទី២៦ខាងមុខនេះ កញ្ញា នឹងធ្វើជាតំណាងកម្ពុជា ទៅចូលរួមប្រកួតក្នុងកម្មវិធី កញ្ញាឯកអាស៊ីប៉ាស៊ីហ្វិកឆ្នាំ ២០១៩ នៅហ្វីលីពីនដែរ។
ដោយឡែក តួឯកប្រុសវ័យ២៤ឆ្នាំ លោក Paing Takhon វិញ តាមព័ត៌មាន លោកគឺជាតារាម៉ូដែល តារាសម្តែង និងជាអ្នកចម្រៀង ជនជាតិមីយ៉ាន់ម៉ា។ កាលពីឆ្នាំ ២០១៨ តារារូបនេះត្រូវបានជ្រើសរើសដោយ គេហទំព័រ BuzzFeed ថាជាបុរសសង្ហា ម្នាក់ក្នុងចំណោមបុរសទាំង២៣នាក់នៅតំបន់អាស៊ីអាគ្នេយ៍ ។ ក្រៅពីនេះ លោក ក៏បានជាប់ចំណាត់ថ្នាក់លេខ ២ ក្នុងកម្មវិធី “កំពូលអ្នកសម្ដែង ១០ នាក់” របស់កម្មវិធី Myanmar Time កាលពីពេលកន្លងទៅដែរ៕
