- 2020-05-05 02:54:09
- ព័ត៌មាន
ឡូយណាស់! ស្ងាត់ៗម្ចាស់បទ "ស្រឡាញ់គ្នាយូរម៉េចស្ទាវ" ក្លាយជាតារាចម្រៀងអាជីពរបស់ផលិតកម្មធំមួយហើយ
- 2020-05-05 02:54:09
- ចំនួនមតិ 0 | ចំនួនចែករំលែក 0
ឡូយណាស់! ស្ងាត់ៗម្ចាស់បទ "ស្រឡាញ់គ្នាយូរម៉េចស្ទាវ" ក្លាយជាតារាចម្រៀងអាជីពរបស់ផលិតកម្មធំមួយហើយ
ចន្លោះមិនឃើញ
ម្ចាស់បទ "ស្រឡាញ់គ្នាយូរម៉េចស្ទាវ" លោក ខាន់ ស៊ីអឿន ដែលបាត់មុខយូរនោះ ឥឡូវនេះបានធ្វើឲ្យមានការភ្ញាក់ផ្អើល ក្រោយពីលោកនាពេលនេះ បានក្លាយជាតារាចម្រៀងអាជីពជាមួយផលិតកម្មធំមួយក្នុងស្រុកទៅហើយ។
តាមព័ត៌មានដែលទទួលបាន ស៊ីអឿន បានចូលរួមជាមួយផលិតកម្មសាន់ដេក្នុងនាមជាតារាចម្រៀងកុងត្រារបស់ផលិតកម្មទៅហើយ។ សុជាតា អ្នកតំណាងរបស់តារាចម្រៀងបានឲ្យដឹងថា នេះគឺជាការបោះជំហានថ្មីរបស់តារាចម្រៀងខ្មែរក្រោម ក្រោយពីលោកបានមានឈ្មោះបោះសំឡេងតាមរយៈបទ "ស្រឡាញ់គ្នាយូរម៉េចស្ទាវ" កាលពីដើមឆ្នាំ២០១៩ ដែលបទនេះ ក្រោយមកតារាចម្រៀងរួមទ្រនំមួយរូប ក៏បានសុំសិទ្ធិយកទៅច្រៀងផង។
បានទុនដូច្នេះ លោក ស៊ីអឿន ក៏បានឈានមកធ្វើបទមួយចំនួនទៀត ដូចជាបទ "គ្មានវាសនា" និងបទ “អាពួកម៉ាកខ្ញុំ" ជាដើម ដោយទទួលបានការគាំទ្រខ្លាំងគួរសមដែរ។ បន្តពីនោះលោក ក៏បាត់មុខឈឹង ដោយទើបតែនឹងលេចមុខជាថ្មី ក្នុងនាមជាតារាចម្រៀងអាជីពរបស់ផលិតកម្មសាន់ដេរតែម្ដង។ មិនមានរបាយការណ៍អំពីសុពលភាពកុងត្រារបស់តារាចម្រៀងប្រុសជាមួយផលិតកម្មថា ចាប់ផ្ដើមពីពេលណា ហើយចប់វិញនៅពេលណានោះទេ។
ប៉ុន្តែ សុជាតា ដែលជាអ្នកតំណាងតារាចម្រៀងបានបញ្ជាក់ថា លោក ខាន់ ស៊ីអឿន បានចូលរួមជាមួយសាន់ដេរមួយរយៈធំមកហើយ ហើយក៏បានចេញជាបទចម្រៀងមកជាហូរហែមកហើយដែរ ក្នុងនោះបទដំបូងបំផុតរបស់លោកក្នុងផលិតកម្មសាន់ដេ គឺបទ "ស៊ី Brand ចុះអូន"។ ដោយឡែកបទទី២ គឺជាប្រភេទបទចង្វាក់កន្ទ្រឹម មានចំណងជើងថា "“ស្រឡាញ់ក្រមុំខ្មែរយើង"។ បទទាំងពីរទទួលបានការគាំទ្រយ៉ាងច្រើនពីអ្នកស្ដាប់ភាគច្រើនជាយុវវ័យ។
ថ្មីៗនេះ លោក ខាន់ ស៊ីអឿន ទើបត្រូវផលិតកម្មបញ្ចេញបទទី៣ឲ្យលោកបន្តទៀត មានចំណងជើងថា “ Stickerលាក់ទឹកភ្នែក"។ សុជាតា បានអះអាងថា បទទាំង៣ខាងលើ សុទ្ធប្រភេទ Original Song ដែលផលិតកម្មបានធ្វើសម្រាំងសម្រាប់លោក ស៊ីអឿន។ ដូច្នេះហើយម្ចាស់បទមានក្ដីសង្ឃឹមថា បទថ្មីរបស់លោកនេះ នឹងទទួលបានការគាំទ្រខ្លាំងដូចគ្នាទៀត។
លោក ខាន់ ស៊ីអឿន មានវ័យជាង ២០ឆ្នាំរូបនេះ មានដើមកំណើតនៅកម្ពុជាក្រោម ប៉ុន្តែលោកបានមកសិក្សារៀនសូត្រនៅសាកលវិទ្យាល័យភូមិន្ទភ្នំពេញ ជំនាញ "អក្សរសាស្ត្រខ្មែរ" និងបានបញ្ចប់ថ្នាក់បរិញ្ញាបត្រកាលពីឆ្នាំទៅ។ លោកបានដើរចូលវិថីសិល្បៈក្រោយពីត្រូវបានគេស្គាល់តាមរយៈបទ "ស្រឡាញ់គ្នាយូរម៉េចស្ទាវ" ដែលលោក និងមិត្តភ័ក្តិបានធ្វើបង្ហោះលើយូធូបលេង។ យ៉ាងណា នោះជាការចាប់ផ្ដើមត្រួសត្រាយផ្លូវឆ្ពោះមកកាន់វិថីសិល្បៈពេញលេញក្នុងនាមជាតារាចម្រៀងអាជីពរបស់សាន់ដេនាពេលនេះ។
អ្នកតំណាងអះអាងថា តារាចម្រៀងប្រុស ពិតជាមានមោទកភាពណាស់ ចំពោះអ្វីដែលលោកទទួលបាននាពេលនេះ។ ដូច្នេះហើយ លោកនឹងប្រឹងប្រែងបន្ថែមទៀត ដើម្បីទទួលបានភាពល្បីល្បាញកាន់តែខ្លាំង ដោយមានប្រិយមិត្តស្រឡាញ់គាំទ្រ និងចូលចិត្តច្រើន៕
ទស្សនាបទថ្មីរបស់លោក ខាន់ ស៊ីអឿន "Sticker ទឹកភ្នែក" ខាងក្រោម៖