- 2020-07-09 02:46:43
- ព័ត៌មាន
Dara ហូរទឹកភ្នែកច្រោក ពេល Minzy ទម្លាយអារម្មណ៍ពិតពេលសម្រេចចេញពីក្រុម
- 2020-07-09 02:46:43
- ចំនួនមតិ 0 | ចំនួនចែករំលែក 0
Dara ហូរទឹកភ្នែកច្រោក ពេល Minzy ទម្លាយអារម្មណ៍ពិតពេលសម្រេចចេញពីក្រុម
ចន្លោះមិនឃើញ
Gong Minzy បានបង្ហាញមុខក្នុងកម្មវិធី Video Star កាលពីពេលថ្មីៗ ដោយថែមទាំងបានទម្លាយរឿងរ៉ាវមួយចំនួន ទាក់ទងនឹងពេលវេលាលំបាក និងអារម្មណ៍ពិតដែលនាងបៀមទុកជាប់ ក្រោយសម្រេចដើរចេញពី 2NE1 កាលពីឆ្នាំ ២០១៦។
ដំបូងនាងបានលើកឡើងពីឧបសគ្គជាមួយក្រុម កាលពីពេលដែលត្រូវរង់ចាំយូរបំផុត ទម្រាំបានចេញបទថ្មីម្ដងៗ។ ទោះបី 2NE1 បានបំបែកកំណត់ត្រាច្រើនប្រចាំ K-Pop ប៉ុន្តែបើគិតឲ្យបានដិតដល់ ពួកគេមានអាល់ប៊ុមធំត្រឹមតែ ២ ប៉ុណ្ណោះ ក្នុងរយៈពេល ៧ឆ្នាំរបស់ក្រុមនេះ។
Minzy ថា៖ «យើងមានពេលច្រើនណាស់លើការសម្រាកចេញអាល់ប៊ុម។ មែនទែនទៅពួកយើងមានអាល់ប៊ុមធំ តែ២ប៉ុណ្ណោះ។ បើ Comeback វិញ យើងធ្វើ ១ដងក្នុងរយៈពេល ៤ឆ្នាំ ដូចព្រឹត្តិការណ៍អូឡាំពិកអ៊ីចឹង។ ខ្ញុំជួបរឿងច្រើនអំឡុងពេលដកឃ្លានោះ។ ខ្ញុំខ្លួនឯងក៏ជួបនឹងវិបត្តិផ្លូវចិត្ត និងស្ត្រេសខ្លាំងដែរ»។
បន្តថែម នាងនិយាយថា៖ «ពេលខ្ញុំចេញពីក្រុម មនុស្សម្នានាំគ្នានិយាយថាខ្ញុំក្បត់ក្រុម ហើយចាប់ផ្ដើមនិយាយពាក្យចចាមអារ៉ាមតៗគ្នារហូត។ ពួកគេលើកឡើងសុទ្ធតែជាព័ត៌មានមិនពិត។ នោះហើយជាពេលវេលាដ៏លំបាកលំបិនបំផុតសម្រាប់ខ្ញុំ។ ខ្ញុំមានអាយុទើបតែ ២២ឆ្នាំទេពេលនោះ អ៊ីចឹងហើយបានជាខ្ញុំមិនតាមដានខមមិន ឬព័ត៌មានទាំងនោះមួយរយៈ ព្រោះថាវាលើសពេកហើយសម្រាប់ខ្ញុំក្នុងការរែកពន់»។
និយាយដល់ Dara វិញ Minzy បញ្ជាក់ថា បងស្រីម្នាក់នេះហើយដែលជាប្រភពថាមពលផ្លូវចិត្តធំសម្រាប់នាង ដែលតែងលើកទឹកចិត្តជានិច្ច អំឡុងពេលនាងដកឃ្លាពីសិល្បៈនោះ។ នាងតាមដានគ្រប់សកម្មភាពការងារមមាញឹករបស់ Dara ក្នុងកម្មវិធីផ្សេងៗ ដែលខិតខំយកឈ្នះខ្លួនឯង និងសម្ដែងចេញនូវភាពរស់រវើកជានិច្ច។ មិនត្រឹមតែប៉ុណ្ណោះ Minzy ថែមទាំងនិយាយទៀតថា Dara ប្រៀបដូចជាអ្នកម្ដាយប្រចាំក្រុម នាងតែងមើលថែ និងខ្វល់ខ្វាយសមាជិករួមក្រុមជានិច្ច។
ឮបែបនេះ Dara ឯណេះស្រាប់តែយំភ្លាមមួយរំពេច ហើយក៏បាននិយាយដែរថា នាងសោកស្ដាយដែលមិនបានបំពេញតួនាទីពេញលេញជាបងស្រីល្អចំពោះប្អូនស្រីពៅមួយនេះ អំឡុងពេលលំបាក ហើយនាងពិតជាអាណិតប្អូនដែលត្រូវមកជួបរឿងបែបនេះ ស្របពេលអាយុនៅក្មេងនៅឡើយ។
យ៉ាងណាក៏ដោយមកទល់ពេលនេះ ទោះបី Minzy ចាប់ផ្ដើមវិថីថ្មីដោយខ្លួនឯង ហើយ Dara ឯណេះនៅបន្តការងារក្រោមផលិតកម្ម YG ក៏ពិតមែន ប៉ុន្តែពួកគេ និងសមាជិក ២នាក់ទៀតនៅតែស្រឡាញ់រាប់អានគ្នាជាបងជាប្អូនក្នុងនាមជា 2NE1 ដដែល៕