- 2020-08-14 07:33:03
- ព័ត៌មាន
បើតាមព័ត៌មាន កុងត្រា វង្ស ថាណាន់ និង Galaxy អាចជាកុងត្រាវែងជាងគេបំផុតហើយ!
- 2020-08-14 07:33:03
- ចំនួនមតិ 0 | ចំនួនចែករំលែក 0
បើតាមព័ត៌មាន កុងត្រា វង្ស ថាណាន់ និង Galaxy អាចជាកុងត្រាវែងជាងគេបំផុតហើយ!
ចន្លោះមិនឃើញ
តារាចម្រៀងដែលឆ្លងកាត់ជីវិតតស៊ូជោគជាំ វង្ស ថាណាន់ បានបង្ហាញខ្លួនជាតារាចម្រៀងអាជីពរបស់ផលិតកម្ម Galaxy Navatra កាលពីចុងខែកក្កដាគួរឲ្យភ្ញាក់ផ្អើល ព្រមជាមួយដំណឹងលេចចេញមកថា លោកបានចុះកុងត្រាជាមួយផលិតកម្មមួយនេះ ក្នុងរយៈពេលមួយដ៏យូរ។
វង្ស ថាណាន់ បានបង្ហាញខ្លួនជាមួយនឹងបទចម្រៀងទី១របស់ខ្លួននៅក្នុងផលិតកម្ម Galaxy កាលពីថ្ងៃទី២៨ កក្កដា ២០២០ មានចំណងជើង "ស្នេហ៍ក្រៅផ្លូវការ" ខណៈពេលនោះ មិនមានដំណឹងអំពីកុងត្រារវាងភាគីតារាចម្រៀង និងផលិតកម្មត្រូវបានបង្ហើបឡើងឡើយ។ ប៉ុន្តែក្រោយមកប៉ុន្មានថ្ងៃ ក៏មានប្រភពជិតស្និទ្ធតារាចម្រៀងមួយរូបដែលសុំមិនបញ្ចេញឈ្មោះ បង្ហើបថា ថាណាន់ បានចុះកុងត្រារយៈពេលមួយដ៏យូរកម្រប្រទះ ពោលគឺដល់ទៅ១០ឆ្នាំឯណោះ។
“អូហ៍ ថាណាន់ លឺថា ចុងកុងត្រាជាមួយ Galaxy ហ្នឹងវែងណាស់ណាបង គឺដល់ទៅ ១០ឆ្នាំឯណោះ...មិនដឹងថាម៉េចទេ តែកុងត្រានេះ តាមមើលដូចជាវែងជាងគេជាងឯហើយ!”។ ប្រភពថ្លែង។
ការធ្វើកិច្ចសន្យាការងារ ឬកុងត្រាជាមួយគ្នារវាងតារាចម្រៀង និងផលិតកម្ម គឺជារឿងទូទៅ ដើម្បីភាពច្បាស់លាស់រៀងខ្លួនលើការងារ និងការទទួលខុសត្រូវរបស់ភាគីទាំងពីរ។ ប៉ុន្តែតារាចម្រៀងខ្លះក៏មិនបានចុះកុងត្រាដែរ ដូចករណីលោក ព្រាប សុវត្ថិ ធ្លាប់មានព័ត៌មានថា ត្បិតថាលោកច្រៀងឲ្យហង្សមាស២ទសវត្សរ៍ហើយក៏ពិតមែនប៉ុន្តែលោកមិនដែលមានកុងត្រាជាមួយគ្នានោះទេ។
ចំពោះការចុះកុងត្រាការងារនេះដដែល បើតាមព័ត៌មានកន្លងដោយទាញចេញពីកុងត្រារបស់តារាចម្រៀងផ្សេងៗ គឺពួកគេរមែងចុះកុងត្រាជាមួយគ្នា ៥ឆ្នាំម្ដងប៉ុណ្ណោះ។ ដូច្នេះហើយ ប្រសិនបើអ្វីដែលប្រភពជិតស្និទ្ធរបស់តារាចម្រៀងបង្ហើបគឺជាការពិតមែន នេះអាចកុងត្រាការងារវែងជាងគេបង្អស់នៅក្នុងវិស័យសិល្បៈចម្រៀងរបស់កម្ពុជា។ ជុំវិញបញ្ហានេះ សាមីខ្លួន វង្ស ថាណាន់ មិនបានឆ្លើយតបឡើយ។
តាមរយៈសារអេឡិចត្រូនិក ថាណាន់ ថ្លែងថា "រឿងហ្នឹងសុំលាក់សិនណាបង គ្រាន់តែអាចប្រាប់បានថា ជារយៈពេលមួយយូរ!"។ បន្តមកទៀត ជាជំនួសការឆ្លើយត្រង់ៗពីរឿងរយៈ ពេលកុងត្រា តារាចម្រៀងមកពីខេត្តកំពង់ចាមថ្លែងថា កុងត្រាប៉ុន្មានឆ្នាំ មិនមែនជារឿងសំខាន់ ការដែលសំខាន់ គឺពេលនេះ លោកបានក្លាយជាតារាចម្រៀងអាជីពរបស់ Galaxy ហើយនេះ ជារឿងដែលលោករីករាយបំផុត ព្រោះមិននឹកស្មានពីមុនមកឡើយថា លោកអាចមានរឿងល្អបែបនេះដូចជាពេលនេះ។ "ខ្ញុំគិតថាផលិតកម្មgalaxyគឺជាទ្រនំដ៏កក់ក្តៅរបស់ខ្ញុំហើយបង” ថាណាន់ ថ្លែង។
ចំពោះបញ្ហានេះដដែល លោក យឹម តាស្រង់ ប្រធានគ្រប់គ្រងផលិតកម្ម Galaxy Navatra ក៏មិនបានឆ្លើយតបដែរ ដោយលោកលើកឡើងថា នេះមិនមែនជារឿងដែលត្រូវនិយាយ។ "យូរ...ប៉ុន្តែទៅនិយាយរឿងហ្នឹងធ្វើអី ខ្ញុំសុំមិនឆ្លើយថា គ្រាន់តែថាយូរៗចឹងទៅ!”។
ដូចបានបញ្ជាក់ពីខាងលើតារាចម្រៀងប្រុសដែលល្បីថាមានប្រវត្តិកម្សត់កម្រខ្លាំងនោះ បានបង្ហាញខ្លួនក្នុងផលិតកម្មខាងលើជាមួយបទចម្រៀងទី១តែម្ដង ហើយមកដល់បច្ចុប្បន្នលោកបានចេញបទចម្រៀងបានចំនួន ៣បទហើយ ហើយលោកថា នៅមានច្រើនបទទៀតនឹងត្រូវបន្តបន្ទាប់ឆាប់ៗនេះ។ ៕