- 2020-09-03 03:40:11
- ព័ត៌មាន
៦រឿង កើតឡើងព្រមគ្នាពេកក្នុងឆ្នាំ ២០២០ ដែលមិនធ្លាប់មានសោះក្នុងសង្គមសិល្បៈ
- 2020-09-03 03:40:11
- ចំនួនមតិ 0 | ចំនួនចែករំលែក 0
៦រឿង កើតឡើងព្រមគ្នាពេកក្នុងឆ្នាំ ២០២០ ដែលមិនធ្លាប់មានសោះក្នុងសង្គមសិល្បៈ
ចន្លោះមិនឃើញ
ការមកដល់ឆ្នាំ ២០២០ គឺជាឆ្នាំដែលពិភពលោកមានការផ្លាស់ប្ដូរ និងជួបរឿងរ៉ាវមិនល្អជាច្រើន។ ងាកមកក្នុងសង្គមសិល្បៈខ្មែរវិញ ក៏ដូចគ្នា ក៏មានរឿងមិនតិចដែរ ដែលក្នុងនោះ គេបានឃើញមានការផ្លាស់ប្ដូរច្រើនរបស់តារាល្បីៗជួរមុខរបស់កម្ពុជា ដែលកើតមានព្រមៗក្នុងឆ្នាំ ២០២០ នេះ។
នេះនិយាយដល់ការផ្លាស់ប្ដូរទ្រនំរបស់តារាចម្រៀងល្បីៗ និងការផ្លាស់ប្ដូរការងាររបស់បុគ្គលមួយខ្លះទៀត ដែលអ្នកទាំងនោះ ប្រិយមិត្តនឹងទៅដល់៖
១.ព្រាប សុវត្ថិ៖ លោក ព្រាប សុវត្ថិ បានចាកចេញពីហង្សមាស មកចូលរួមជាមួយ Galaxy Navatraផ្លូវការកាលពីថ្ងៃទី ២៥ សីហា ដោយមានទាំងកម្មវិធីជប់លៀងទទួលយ៉ាងអធិកអធមមិនធ្លាប់មានក្នុងប្រវត្តិផ្លាស់ប្ដូរទ្រនំរបស់តារាចម្រៀងនានា ក្នុងរង្វង់ជាង ២ទសវត្សរ៍មកនេះ។ ការផ្លាស់ប្ដូរនេះ បានកើតឡើងតក់ក្រហល់ និងគ្មាននរណានឹកស្មានដល់ឡើយថា ព្រាប សុវត្ថិ បានចេញពីហង្សមាសទ្រនំធំនៅក្នុងស្រុក កន្លែងដែលរួមរស់ជាមួយគ្នាជាង ២ទសវត្សរ៍។
យ៉ាងណា នេះមិនមែនជារឿងថ្មីទេ ប៉ុន្តែបើក្រឡេកទៅកាលពីអំឡុងឆ្នាំ ២០១៧ ប្រិយមិត្តអាចនឹងដឹងថា លោក ព្រាប សុវត្ថិ ទំនងជាចង់ចេញយូរហើយ ដែលកាលណោះ ធ្លាប់មានចចាមអារ៉ាមថា លោកប្រុងចូលទៅផលិតកម្មថោន។ ប៉ុន្តែអ្វីៗបានស្ងប់ស្ងាត់ទៅវិញ ក្រោយព័ត៌មានបានបែកខ្ចរខ្ចាយ។ ចំពោះការចាកចេញនេះ សាមីខ្លួន បាននិយាយនៅក្នុងថ្ងៃជប់លៀងថា លោកចង់រកពិសោធន៍ថ្មី និងចង់សម្រេចក្ដីស្រមៃលោកខ្លះទៀត ក្រោយពីសម្រេចជោគជ័យជាច្រើនជាមួយហង្សមាស។
២.មាស សុខសោភា៖ សោភា ក៏បានចាកចេញពីផលិតកម្ម ថោន ទាំងមិននឹកស្មានដល់ដែរ ក្រោយរួមរស់ជាមួយគ្នាអស់រយៈពេលជិត ១០ឆ្នាំ។ ការចាកចេញនេះ បានកើតឡើង ក្រោយពីតារាចម្រៀងស្រី បានព្រលយជារឿយៗរួចមកហើយ ហើយចុងក្រោយបំផុតនៅដើមខែមិថុនា នាងក៏ប្រកាសថា នាងសម្រេចចិត្តចាកចេញពីថោនហើយ។ មានរឿងចម្រូងខ្លះៗ ចំពោះការចាកចេញរបស់ សោភា ដែលសាមីខ្លួន និងផលិតកម្មបានបកស្រាយយកត្រូវរៀងខ្លួន។
ខុសពី ព្រាប សុវត្ថិ បន្តិច មាស សុខសោភា ចាកចេញ មិនទាន់បានទៅចូលរួមជាមួយផលិតកម្មថ្មីណាឡើយ ប៉ុន្តែនាងបាន និងកំពុងស្ថិតនៅជំហរឯករាជ្យ ធ្វើបទចម្រៀងចេញខ្លួនឯង ក្នុងផលិតកម្ម Camtrax របស់នាង។
៣.ខេម៖ គឺជាតារាចម្រៀងទី ២ បានបានចាកចេញពីផលិតកម្មថោន បន្ទាប់ពី មាស សុខសោភា។ លោកត្រូវបានលេចមុខជ្រងោក្នុងផលិតកម្ម Galaxy Navatra កាលពីដើមខែកក្កដា ដោយបង្ហាញមុខភ្លាម ក៏ចេញបទចម្រៀងភ្លែតតែម្ដង។ នៅក្នុងការផ្លាស់ប្ដូរទ្រនំរបស់តារាចម្រៀងមកពីខេត្តកំពង់ឆ្នាំងរូបនេះ ហាក់មានភាពក្ដៅគគុកខ្លាំងបើធៀបនឹង សោភា លោក ព្រាប សុវត្ថិ ត្បិតថា នៅមុននេះ មានរឿងចម្រូងចម្រាសខ្លាំងរវាងលោក និងផលិតកម្ម។
រឿងនោះ គឺផលិតកម្មបានលើកឡើងថា ខេម បានបំពានកិច្ចសន្យា ដោយបានទៅចូលរួមជាមួយផលិតកម្មថ្មីទាំងដែលកិច្ចសន្យាការងាររបស់ខ្លួននៅកន្លែងចាស់នៅមានសុពលភាពនៅឡើយ។ ប៉ុន្តែខេម អះអាងថា កិច្ចសន្យានោះបានបញ្ចប់ហើយ ហើយលោកក៏បានដាក់ពាក្យឈប់ត្រឹមត្រូវដែរ។ មិនត្រឹមតែអះអាងពីភាពត្រឹមត្រូវរៀងខ្លួន ភាគីទាំងពីរ ពិសេសខាងតារាចម្រៀង នៅបានបើកកកាយរឿងរ៉ាវឈឺចាប់របស់ខ្លួនជាច្រើននៅក្នុងផលិតកម្មថោនថែមទៀត។
ចំណុចខ្លះនៃការបើកកកាយរបស់ភាគីតារាចម្រៀង ផលិតកម្មក៏បានប្រតិកម្ម និងកោះហៅតារាចម្រៀងទៅបកស្រាយ។ ពេលនោះ គេមើលឃើញថា រឿងរ៉ាវភាគីទាំងពីរ ពិតមិនចប់ដោយងាយឡើយ ដោយសារតែភាគីប្រកាន់ជំហររៀងខ្លួន ក្នុងនោះ ខេម ថែមទាំងបានបោះសំដីថា សុខចិត្តបាត់បង់អាជីពចម្រៀង ក៏មិនបន្ទន់ឥរិយាបថដែរ។ ប៉ុន្តែអ្វីៗ ក៏បានស្ងប់ស្ងាត់ទៅវិញមកដល់បច្ចុប្បន្ន ក្រោយមានភាគីទី៣បានចូលសម្របសម្រួល។
៤.យូរី៖ ម្ចាស់បទ "ចាក់ទឹកដូង" បច្ចុប្បន្នបានបញ្ចប់កិច្ចសន្យាជាមួយផលិតកម្មសាន់ដេហើយ ក្រោយពីនាងបានចាកចូលចេញពីផលិតកម្មរ៉ក់ មកចូលរួមធ្វើការជាមួយគ្នាមក។ គិតមកបច្ចុប្បន្ន មានរយៈពេល ជិត ១០ឆ្នាំហើយ ដែលនាងបានរួមរស់ជាមួយសាន់ដេ ដល់បន្សល់រឿងរ៉ាវល្អៗមួយចំនួន។ យ៉ាងណា ដូច មាស សុខសោភា ដែរ យូរី មិនទាន់ចូលទៅផលិតកម្មណាមួយឡើយ ពោលគឺនាងនៅជំហរឯករាជ្យ ផលិតបទចម្រៀងចេញខ្លួនឯងដូចរៀមច្បងដែរ។
យូរី បញ្ជាក់ថា នាងនឹងមិននៅឯករាជ្យរហូតទេ ពោលគឺនឹងចូលទៅផលិតកម្មថ្មីណាមួយ ប៉ុន្តែពេលនេះ នាងគ្រាន់តែសម្រាកខ្លួនបន្តិចសិនប៉ុណ្ណោះ។ បន្ទាប់ចប់កិច្ចសន្យាជាមួយផលិតកម្មចាស់ យូរី ទើបចេញបទចម្រៀងថ្មី១បទកាលពីចុងសប្ដាហ៍មុន។ បទនោះមានចំណងជើងថា "Big Boy” ដែលប្រិយមិត្តជាច្រើនសរសើរថា ឡូយមិនចាញ់វីដេអូចម្រៀងបរទេសឡើយ។
៥.លោក ខ្យង៖ ខុសពីតារាចម្រៀងទាំងប៉ុន្មានខាងលើ លោក គង់ សុគន្ធា ហៅ "ខ្យង" ត្រូវជាស្វាមីរបស់អ្នកនាង សុខ ច័ន្ទធីតា ហៅកាតុ បានជួបរឿងប្រសើរនៅក្នុងឆ្នាំដែលមនុស្សភាគច្រើនហៅថាជាឆ្នាំ គ្រោះចង្រៃនេះ។ លោក ខ្យង ដែលមានជំនាញជាអ្នកវាយស្គរ បានជួបលាភធំដោយលោកត្រូវបានតែងតាំងជានាយកគ្រប់គ្រងផលិតកម្ម Top Music ជាបុត្រសម្ព័ន្ធរបស់ក្រុមហ៊ុន Town Group។
នៅមុនការតែងតាំងតួនាទីថ្មី លោក គង់ សុគន្ធា ហៅ ខ្យង គឺជា Producer នៅស្ថានីយទូរទស្សន៍ថោនស្រាប់។ សាមីខ្លួនបញ្ជាក់ថា លោករីករាយចំពោះការផ្ដល់ឲ្យនេះពីថ្នាក់ដឹកនាំ Town Group ដូច្នេះលោកនឹងប្រឹងប្រែងដឹកនាំផលិតកម្មមួយេនះឆ្ពោះទៅកាន់ទីផ្សារជាទីពេញនិយមរបស់ប្រិយមិត្ត។
៦.តែ ស៊ុនសុដាលីកា៖ ប្រិយមិត្តអាចគិតមិនដល់ អំពីរឿងរ៉ាវរបស់ស្រីស្អាត តែ ស៊ុនសុដាលីកា ហៅ លីកាសមាជិកក្រុមរាំ OMG ។ យុវតីដ៏ស្រស់ស្អាត ក៏បានជួបការផ្លាស់ប្ដូរដែរ ដែលក្នុងនោះសូម្បីតែខ្លួនឯងក៏មិននឹកស្មាន។ លីកា ដែលចូលចិត្តសិល្បៈ Kpop បានរងការបៀតបៀនដោយជំងឺ នៅក្នុងត្រង់ឆ្អឹងខ្នងធ្ងន់ធ្ងរ។
នាងមិនអាចកម្រើកបាន រហូតដល់ក្រុមគ្រួសារនាំទៅមន្ទីរទទួលយកការវះកាត់។ មកទល់បច្ចុប្បន្នអាការរបស់នាងប្រសើរច្រើន ប៉ុន្តែមិនគ្រប់គ្រាន់ឲ្យនាងវិលមករាំពុតពេនតាមនិស្ស័យរបស់នាងបានទៀតឡើយ។ ចុងក្រោយ លីកា បានបង្ខំចិត្តដកខ្លួនចេញពីក្រុម OMG របស់នាង ហើយមេក្រុមនៃក្រុមនេះ ក៏បានប្រកាសជាសាធារណៈដែរ ហើយថា នោះគឺជាការចង់បានរបស់ក្រុមគ្រួសាររបស់ លីកា ព្រោះស្ថានភាពរបស់នាងមិនអាចបន្តរាំទៀតបាន៕