- 2020-09-30 07:33:00
- ព័ត៌មាន
សាហាវមែនឆ្នាំនេះ តាមរបាយការណ៍បទទាំងអស់របស់ តន់ ច័ន្ទសីម៉ា មានអ្នកចូលមើលសរុបជាង ៣០០ លានដង
- 2020-09-30 07:33:00
- ចំនួនមតិ 0 | ចំនួនចែករំលែក 0
សាហាវមែនឆ្នាំនេះ តាមរបាយការណ៍បទទាំងអស់របស់ តន់ ច័ន្ទសីម៉ា មានអ្នកចូលមើលសរុបជាង ៣០០ លានដង
ចន្លោះមិនឃើញ
បន្ទាប់ពីបានធ្វើឲ្យមានការចាប់អារម្មណ៍ទៅលើ ចំណូលពី Youtube កាលពីពាក់កណ្ដាលខែ នៅថ្ងៃនេះ ផលិតកម្ម Galaxy ទើបបានបញ្ចេញរបាយការណ៍ថ្មីទៀត ពាក់ព័ន្ធនឹងតារាចម្រៀងស្រីជួរមុខរបស់ខ្លួន គឺ តន់ ច័ន្ទសីម៉ា ដែលមានអ្នកតាមដានបទរបស់នាងសរុបដល់ទៅជា ៣០០ លានដងឯណោះ។
តាមរបាយការណ៍របស់ផលិតកម្មក្នុងស្រុកមួយនេះ តារាចម្រៀងក្មេងដ៏មានប្រជាប្រិយភាពក្នុងឆ្នាំ 2020 នេះ ទទួលបានចូលទស្សនារហូតទៅដល់ 323.7 លានដងឯណោះ។
តួលេខនេះ ត្រូវបានគេប៉ាន់ប្រមាណថា តារាចម្រៀងមកពីខេត្តតាកែវ ទំនងជាអាចគ្រប់គ្រងកំណត់ត្រា ជាប្រវត្តិសាស្ត្រមួយនៅក្នុងវិស័យសិល្បៈហើយក្នុងនាមជាតារាដែលមានអ្នកចូលទស្សនាបទចម្រៀងរបស់ខ្លួននៅយូធូបច្រើនជាងគេ។ “Wow ឆ្នាំនេះ តន់ ច័ន្ទសីម៉ា មានប្រជាប្រិយភាពដាច់គេ អ្នកចូលមើលសរុប 323.7លានដង!”។ ផលិតកម្មរបស់ សីម៉ា បានលើកឡើងនៅលើបណ្ដាញសង្គមរសៀលនេះ។
យ៉ាងណាក៏ដោយ មិនទាន់ដឹងថា ការប៉ាន់ប្រមាណនេះត្រឹមត្រូវ ១០០% ឬយ៉ាងណានោះទេ ខណៈកំណត់ត្រារបស់តារាចម្រៀងផ្សេងទៀត ក៏ដូចជាផលិតកម្មផ្សេងៗ នៅមិនទាន់មានការបញ្ចេញឲ្យដឹងជាសាធារណៈនៅឡើយ ស្របពេលគេដឹងថា ផលិតកម្មទាំងនោះ ក៏មានតារាកំពូលៗរៀងខ្លួន ដែលអាចទាក់ទាញប្រិយមិត្តឲ្យចូលទស្សនាវីដេអូចម្រៀងរបស់ពួកគេ ច្រើនរៀងៗខ្លួនដែរ។
វិលមករបាយការណ៍របស់ តន់ ច័ន្ទសីម៉ា វិញ អ្វីដែលពិសេសទៀតនោះ តាមការបញ្ចេញរបស់ Galaxy បទចម្រៀងទាំងអស់របស់តារាស្រី គ្រប់បទសុទ្ធសឹងជាបទ original ទាំងអស់។ តែចំណុចមួយដែលនៅមិនទាន់ស្រាយបញ្ជាក់ឲ្យច្បាស់ មិនទាន់ដឹងតួលេខនេះ គិតពីពេលណាមក ហើយបទរបស់ សីម៉ា ប៉ុន្មានហើយ ត្រូវយកមកប្រើដើម្បីធ្វើការកត់ត្រាលើរបាយការណ៍សរុបនេះ។
លោក យឹម តាស្រង់ ដែលជានាយកគ្រប់គ្រងផលិតកម្ម Galaxy Navatra នៅមិនទាន់អាចសុំការអធិប្បាយបន្ថែមបានទេនៅរសៀលនេះ។
នេះគឺជារបាយការណ៍ទី២សម្រាប់ឆ្នាំ ២០២០ នេះដែល Galaxy បានបញ្ចេញបង្ហាញពីការហក់លោតប្រជាប្រិយមិត្តរបស់តារាចម្រៀងតូចច្រឡឹង តន់ ច័ន្ទសីម៉ា។ កាលពីដើមឆ្នាំ ផលិតកម្មនេះ ក៏ចេញរបាយការណ៍ដូចគ្នាដែរថា កាលណោះ(ចុងខែមេសា) សីម៉ា ទាញអ្នកចូលទស្សនាបទចម្រៀងរបស់ខ្លួនសរុបដល់ទៅជាង ១០០លានដងទៅហើយក្នុងរយៈពេលតែ៤ខែតែប៉ុណ្ណោះ៕
