- 2020-10-05 09:40:34
- ព័ត៌មាន
គម្រោងរត់ ៩៩ថ្ងៃដើម្បីកុមារ សាយ នឹងចេញដំណើរពីភ្នំពេញ វេលាម៉ោងទៀបភ្លឺយប់នេះហើយ
- 2020-10-05 09:40:34
- ចំនួនមតិ 0 | ចំនួនចែករំលែក 0
គម្រោងរត់ ៩៩ថ្ងៃដើម្បីកុមារ សាយ នឹងចេញដំណើរពីភ្នំពេញ វេលាម៉ោងទៀបភ្លឺយប់នេះហើយ
ចន្លោះមិនឃើញ
ថ្ងៃស្អែកនេះ គឺជាទី១នៃការចាប់ផ្ដើមគម្រោងរត់ដើម្បីសប្បុរសធម៌របស់លោក អ៊ួន បឋម ហៅ សាយ ក្រោយពីបានប្រកាសពីគម្រោងសម្បុរសធម៌ដ៏ធំនេះកាលពីចុងសប្ដាហ៍មុន។
តាមការបញ្ជាក់របស់ស្ថាបនិកគម្រោង លោក និងក្រុមការងារនឹងចេញពីភ្នំពេញឆ្ពោះទៅខេត្តកំពង់ស្ពឺដែលជាជំហានដំបូងនៃការដំណើរគម្រោង "Run for Charity with Sai” របស់លោក នៅវេលាម៉ោងប្រមាណ ៤ទៀបភ្លឺ ដោយចេញដំណើរពីមុខសាកលវិទ្យាល័យភូមិន្ទភ្នំពេញទៅ។ នេះជាទីតាំងចាប់ផ្ដើមថ្មី ក្រោយពីបានសម្រេចផ្លាស់ប្ដូរទីតាំងសម្រាប់ចេញដំណើរពីវត្តភ្នំ មកទីនេះវិញ។
សាយ ប្រាប់ថា តាមគម្រោង លោកនឹងត្រូវរត់ឲ្យដល់ទីរួមខេត្តកំពង់ស្ពឺនៅអំឡុងម៉ោង ៧ល្ងាច។ ប៉ុន្តែមុនទៅដល់ លោកត្រូវឈប់សម្រាកនៅថ្នល់ទទឹងនៅម៉ោងប្រហែល ៩ ព្រឹក។ សម្រាកសម្រួលរាងកាយហើយ ម៉ោងប្រហែល ៤ ទើបចេញដំណើរបន្តទៀតឆ្ពោះទៅទីរួមខេត្តកំពង់ស្ពឺ។ ដូច្នេះហើយ ទើបសម្រេចចេញដំណើរនៅវេលាទៀបភ្លឺដូច្នេះ ក្នុងនោះ ក៏ដើម្បីគេចពីការកកស្ទះចរាចរណ៍ និងមិនចង់បង្កការរំខានដល់ចរាចរណ៍ផង។
ស្ថាបនិកវ័យក្មេង សាយ គ្រោងប្រមូលមូលនិធិឲ្យបានចំនួន ១០០០ ០០០ ០០០ រៀលសម្រាប់បរិច្ចាគទៅមន្ទីរពេទ្យកុមារអង្គរខេត្តសៀមរាប សម្រាប់ជួយដល់កុមារតូចៗងាយរងគ្រោះរបស់កម្ពុជា។ ដូច្នេះហើយ គម្រោងនេះ សង្ឃឹមទាំងស្រុងទៅលើការចូលរួមរបស់សប្បុរសជនទាំងក្នុង និងក្រៅស្រុក ព្រមទាំងម្ចាស់ឧបត្ថម្ភនានា។
តាមរបាយការណ៍ គម្រោង "Run for Charity with Sai” គិតត្រឹមរសៀលថ្ងៃទី ៥ តុលា ២០២០នេះ ទទួលបានថវិកាបរិច្ចាគពីសប្បុរសជនចំនួន ១០លានរៀលហើយ ហើយថវិកានេះ គឺសប្បុរសជននានាបានបរិច្ចាគទៅពេទ្យផ្ទាល់។ ប៉ុន្តែសម្រាប់អ្នកឧបត្ថម្ភវិញ មិនមានឡើយ។ ដូច្នេះហើយ សាយ ពោលថា នាពេលនេះ ការប្រមូលមូលនិធិ គឺពឹងទៅលើការចូលរួមរបស់សប្បុរសជននានាទាំងស្រុង។
“សម្រាប់អ្នកឧបត្ថម្ភគឺអត់មានទេ ឥឡូវមកដល់ថ្ងៃនេះហើយ ខ្ញុំជឿថា អត់មាននរណាគេមកឧបត្ថម្ភយើងទៀត ឥឡូវហ្នឹងមានតែសង្ឃឹមគេចូលតាមផ្លូវអីហ្នឹងហើយ ក្រែងពួកគាត់មានចិត្តចូល ឬទទួលកន្លែងស្នាក់អីអីចឹងណាបង!"។
សាយ នឹងរត់ចំនួន ៩៩ថ្ងៃ ដោយឆ្លងកាត់ ២២ ខេត្ត-ក្រុង ក្នុងគោលបំណងរៃអង្គាសប្រាក់ និងបំផុសសកម្មភាពមនុស្សធម៌ដល់យុវវ័យ។ យុទ្ធនាការមួយនេះ គឺដើម្បីកុមារតូចៗរបស់កម្ពុជារាប់ពាន់ ម៉ឺននាក់ដែលងាយរងគ្រោះ និងត្រូវការពឹងពាក់លើមន្ទីរពេទ្យកុមារខាងលើ ខណៈមន្ទីរពេទ្យពឹងលើមូលនិធិសប្បុរសជនទាំងស្រុង។
បែបនេះ ទើបលោកបង្កើតយុទ្ធនាការនេះឡើយ ព្រោះថា កុមារតូចៗរបស់យើងនៅត្រូវការមន្ទីរពេទ្យខាងលើជាចាំបាច់ ខណៈបេសកកម្មរបស់មន្ទីរពេទ្យ ទំនងគ្មានថ្ងៃបញ្ចប់ឡើយ។ ដូច្នេះហើយ ទើបលោកប្រសិនបើសប្បុរសជនចង់ចូលរួមបរិច្ចាគ អាចបរិច្ចាគបានតាមគណនីធនាគារ ABA : 000 320 555 (Angkor Hospital for Children Limited) ឬ Wing : 52714 (AHC Patient Contributions)។
សម្រាប់ព័ត៌មានលម្អិតក្នុងការចូលរួម ក៏ដូចជាតាមដានចំនួនទឹកប្រាក់ដែលបានបរិច្ចាគ សូមចូលទៅកាន់គេហទំព័រ saicambodianartist.com/ ។ ក្រៅពីគេហទំព័រនេះ ប្រិយមិត្តអាចតាមដានរាល់សកម្មភាពរបស់សាយអំឡុងពេលរត់ តាមរយៈទំព័រហ្វេសប៊ុករបស់ Sai, Channel YouTube របស់សាយ, ទំព័រហ្វេសប៊ុករបស់ Sabay ក៏ដូចជាគេហទំព័រ Sabay៕
