- 2020-10-06 03:07:43
- ចម្រៀង
YG កំពុងពិចារណាកាត់ប្លង់នេះចេញពី MV ថ្មីរបស់ BLACKPINK
- 2020-10-06 03:07:43
- ចំនួនមតិ 0 | ចំនួនចែករំលែក 0
YG កំពុងពិចារណាកាត់ប្លង់នេះចេញពី MV ថ្មីរបស់ BLACKPINK
ចន្លោះមិនឃើញ
នាព្រឹកថ្ងៃទី៦ ខែតុលានេះ ផលិតកម្ម YG បានឆ្លើយតបនឹងបញ្ហាជុំវិញវីដេអូចម្រៀង "Lovesick Girls” របស់ក្រុមចម្រៀង BLACKPINK ដែលបានចេញផ្សាយកាលពីថ្ងៃទី២ ខែតុលាកន្លងទៅ។
គួរដឹងថានៅថ្ងៃទី៥ ខែតុលា សហភាពបុគ្គលិកផ្នែកសុខភាពនិងសុខាភិបាលកូរ៉េ បានបង្ហាញការយល់ឃើញរបស់ខ្លួនថាការតុបតែងខ្លួនជាគិលានុបដ្ឋាយិការបស់ Jennie នៅក្នុងវីដេអូចម្រៀង បានចូលរួមចំណែកបង្កើតការយល់ច្រឡំចំពោះគិលានុបដ្ឋាយិកា និងបានស្នើសុំឲ្យផលិតកម្ម YG ចាត់វិធានការឲ្យបានសមរម្យ។ សហភាពបានសង្កត់ធ្ងន់ថាការតុបតែងជាគិលានុបដ្ឋាយិកាមានភាពខុសឆ្គងត្រង់មួក សំពត់ខ្លី និងស្បែកជើងកែង ដែលខុសគ្នាទាំងស្រង់ពីឈុតគិលានុបដ្ឋាយិកាពិតប្រាកដ។
ហើយខាងក្រោមនេះគឺជាការឆ្លើយតបពីខាងផលិតកម្ម YG ៖
“ដំបូងពួកយើងសូមសម្ដែងការគោរពយ៉ាងជ្រាលជ្រៅចំពោះគិលានុបដ្ឋាយិកាដែលតែងតែនៅក្បែរអ្នកជំងឺ និងកំពុងតែសកម្មក្នុងការប្រយុទ្ធប្រឆាំងនឹងជំងឺឆ្លង។
Lovesick Girls គឺជាបទចម្រៀងដែលលើកឡើងនូវសំនួរសួរថាហេតុអ្វីយើងបន្តស្វែងរកស្នេហាទាំងដែលយើងត្រូវឈឺចាប់ដោយសារវា ហើយទន្ទឹមនឹងនោះក៏មានបង្កប់នូវសារផ្ដល់ក្ដីសង្ឃឹមផងដែរ។
ក្នុងវីដេអូចម្រៀង Lovesick Girls ត្រង់ប្លង់ដែលមានគិលានុបដ្ឋាយិកានិងអ្នកជំងឺ គឺចង់បង្ហាញអំពីប៉ារូលចម្រៀងដែលមានន័យថា «គ្រូពេទ្យមិនអាចជួយបានទេ ពេលដែលខ្ញុំមានជំងឺស្នេហា»។
ប្លង់នេះមិនមានចេតនាបង្កើតការយល់ច្រឡំចំពោះគិលានុបដ្ឋាយិកានោះទេ ប៉ុន្តែយើងក៏ព្រួយបារម្ភដែរអំពីការធ្វើឲ្យមានការយល់ច្រឡំ។
យើងសូមឲ្យអ្នកគិតដល់វីដេអូចម្រៀងថាជាសិល្បៈឯករាជ្យមួយ ហើយយើងពិតជាអរគុណណាស់ប្រសិនបើអ្នកអាចយល់បានថាប្លង់នីមួយៗដែលបង្កើតឡើងគឺគ្មានចេតនាអ្វីផ្សេងក្រៅតែពីបង្ហាញអំពីចម្រៀងនោះទេ។
ក្រុមផលិតរបស់យើងនាពេលនេះកំពុងតែពិភាក្សា ថាតើប្លង់នេះគួរតែកាត់ចេញឬយ៉ាងណា៕”
