- 2020-10-06 10:08:29
- ព័ត៌មាន
ដូណាល់ ត្រាំ ប្រាប់ពលរដ្ឋអាមេរិកកុំអោយខ្លាច Covid-19 ស្រាប់តែតួអង្គ Captain America បកវិញចាស់ដៃ
- 2020-10-06 10:08:29
- ចំនួនមតិ 0 | ចំនួនចែករំលែក 0
ដូណាល់ ត្រាំ ប្រាប់ពលរដ្ឋអាមេរិកកុំអោយខ្លាច Covid-19 ស្រាប់តែតួអង្គ Captain America បកវិញចាស់ដៃ
ចន្លោះមិនឃើញ
តារាសម្ដែង Chris Evans ដែលត្រូវគេស្គាល់ច្បាស់តាមរយៈការសម្ដែងជាតួអង្គ Captain America ក្នុងសែស្រឡាយរឿងរបស់ Marvel នោះ បានចេញមកវាយបកចាស់ដៃទៅការថ្លែងរបស់ប្រធានាធីបតីរបស់ខ្លួន លោក ដូណាល់ ត្រាំ ដែលស្នើពលរដ្ឋអាមេរិក កុំអោយមានការភ័យខ្លាចចំពោះជំងឺ Covid-19។
ប្រធានាធីបតីអាមេរិកលោក ដូណាល់ ត្រាំ បានត្រឡប់ទៅសេតវិមានវិញហើយកាលពីថ្ងៃច័ន្ទម្សិលមិញនេះ បន្ទាប់បានសម្រាកទទួលយកការព្យាបាលនៅមន្ទីរពេទ្យរយៈពេល៣ថ្ងៃ ក្រោយលោកត្រូវបានធ្វើតេស្តវិជ្ជមានខូវីដ១៩។
នៅថ្ងៃដដែល លោកប្រធានាធិបតី បានសរសេរនៅលើ Twitter របស់ខ្លួនប្រាប់ពលរដ្ឋអាមេរិកថា លោកនឹងចាកចេញពីមន្ទីរពេទ្យនៅវេលាល្ងាចថ្ងៃទី ០៥ តុលា ហើយលោកពិតជាមានអារម្មណ៍ល្អណាស់។ ដូច្នេះហើយ សូមកុំអោយមានការភ័យខ្លាចចំពោះ Covid-19 និងកុំ អោយមេរោគនេះចូលមកចាត់ចែងជីវិតរបស់អ្នក។
លោកលើកឡើងថា "យើងបានដើរទៅមុខហើយ ក្រោមការដឹកនាំរបស់ ដូណាល់ ត្រាំ ចំណេះដឹង និងឱសថខ្លះពិតជាអស្ចារ្យណាស់ ខ្ញុំមានអារម្មណ៍ល្អជាងកាលដែលខ្ញុំមានអាយុទើប ២០ឆ្នាំទៅទៀត!”។ សំណេរនេះ ត្បិតថាអ្នកគាំទ្រលោកជាច្រើនបានសាទរ ប៉ុន្តែក៏មានមនុស្សមិនតិចដែរដែលមិនយល់ស្របចំពោះការលើកឡើងដោយស្នើកុំអោយគ្រប់គ្នាភ័យខ្លាចចំពោះមេរោគសាហាវនេះ។
សំណេររបស់លោកប្រធានាធិបតី បានធ្វើឲ្យតារាសម្ដែង Chris Evans នៅមិនសុខ ហើយបានសរសេរឆ្លើយតបទៅលោកប្រធានាធិបតីជិតផុតអាណត្តិរូបនេះ។ Crish សរសេរសារថា "មិនឲ្យខ្លាចជំងឺ Covid-19?...គ្រប់នាទី លោកត្រូវបានយកចិត្តទុកដាក់ព្យាបាលដោយគ្រូពេទ្យចំណានៗបំផុត ព្រមទាំងប្រើប្រាស់ថ្នាំព្យាបាលល្អៗបំផុតថែមទៀត។ តើលោកគិតថា គេគ្រប់គ្នាសុទ្ធតែទទួលបានការយកចិត្តទុកដាក់ពិសេសបែបនេះ?”។
សំណេររបស់តារាសម្ដែង ត្រូវបានការយល់ស្របអំពីអ្នកប្រើប្រាស់បណ្ដាញ Twitter ជាច្រើន ហើយពួកគេបានចែកចាយបន្តសារនេះបន្តឲ្យគ្នា។
មកទល់បច្ចុប្បន្ន សហរដ្ឋអាមេរិកមានអ្នកឆ្លងជំងឺខូវីដ១៩សរុប ប្រមាណ ៧,៥លាននាក់ ក្នុងនោះអ្នកជំងឺជាង ២០ម៉ឺននាក់បានបាត់បង់ជីវិត៕