- 2020-10-10 02:46:49
- ព័ត៌មាន
ប្លែកទៀតហើយ! វីជេ ដាដា មិនទទួលចំណងដៃដោយហេតុផលមនុស្សធម៌ទាំងពីរនេះ
- 2020-10-10 02:46:49
- ចំនួនមតិ 0 | ចំនួនចែករំលែក 0
ប្លែកទៀតហើយ! វីជេ ដាដា មិនទទួលចំណងដៃដោយហេតុផលមនុស្សធម៌ទាំងពីរនេះ
ចន្លោះមិនឃើញ
តារាសម្ដែង និងជាពិធីករ វីជេ ដាដា សម្រេចចិត្ដមិនទទួលយកចំណងដៃ ឬបាច់ផ្កាពីភ្ញៀវរបស់លោកដែលជាសិល្បករ-សិល្បការិនីល្បីៗប្រមាណ៣០០នាក់ ចូលរួមសម្ពោធភោជនីយដ្ឋានរបស់លោកកាលពីយប់មិញ។
លោកបានបង្វែរពីការទទួលចំណងដៃ ឬបាច់ផ្កា ទៅដាក់ហិបមូលនិធិចំនួនពីរនៅក្នុងពិធីនោះជំនួសវិញ។ ហិបមួយសម្រាប់ជួយដល់មន្ទីរពេទ្យគន្ធបុប្ផា និងហិបមួយទៀតសម្រាប់ជួយដល់សាលាដូងនៅតំបន់ទេសចរណ៍គិរីរម្យ ខេត្តកំពង់ស្ពឺ។ លោកនឹងប្រគល់ហិបទាំងពីរនេះដល់តំណាងមន្ទីរពេទ្យគន្ធបុប្ផា និងសាលាដូង ដោយលោកមិនអ៊ុតមើលមុនថាតើមានចំនួនទឹកប្រាក់ប៉ុន្មានឡើយ ព្រោះលោកចង់ឲ្យភ្ញាក់ផ្អើលទាំងអស់គ្នានៅថ្ងៃណាដែលបើកហិបទាំងនេះឡើង។
តារាសម្ដែងរូបសង្ហា ដាដា បញ្ជាក់ថា ថវិកានៅក្នុងហិបត្រូវប្រគល់ជូនស្ថាប័នទាំងពីរទាំងអស់ ហើយបើថវិកាដែលជាការចែករំលែកពីភ្ញៀវរបស់លោកកាលយប់មិញនេះមិនទទួលបានច្រើនដូចការរំពឹងទុក គឺលោកនឹងដកប្រាក់ភាគហ៊ុនលោកមួយចំនួនទៀតដើម្បីបន្ថែមជួយដល់ស្ថាប័នទាំងពីរ។
លោកប្ដេជ្ញាថា នឹងបន្ដជួយដល់មន្ទីរពេទ្យ និងសាលារៀនដែលលោកគិតថាជាផ្នែកមួយជួយសង្គម និងសង្គ្រោះជីវិតកុមារជាច្រើននោះ តាមរូបភាពផ្សេងៗទៀត ជាពិសេសតាមរយៈអាជីវកម្មរបស់លោកនាពេលថ្មីៗនេះ។
វីជេ ដាដា បានសម្ពោធបើកភោជនីយដ្ឋានឈ្មោះ"GM" កាលពីយប់ថ្ងៃទី៩ ខែតុលា ឆ្នាំ២០២០។ តាមដំណឹង នេះមិនមែនជាអាជីវកម្មទី១របស់លោកទេ ពោលគឺលោកមានអាជីវកម្មពីរផ្សេងទៀតក្រៅពីអាជីពសិល្បៈ។ ទីតាំងភោជនីយដ្ឋានថ្មីរបស់លោកនេះ គឺស្ថិតនៅក្បែរសាលា ACE ក្នុងខណ្ឌដូនពេញ រាជធានីភ្នំពេញ៕