- 2020-10-14 04:06:03
- ព័ត៌មាន
អត់ជាប់ចំណាត់មែន តែដោយសារស្អាតអីចឹង ទើបកញ្ញាឯកតំណាងខេត្តសៀមរាប មានគេទាក់ទងបណ្ដើរៗហើយ!
- 2020-10-14 04:06:03
- ចំនួនមតិ 0 | ចំនួនចែករំលែក 0
អត់ជាប់ចំណាត់មែន តែដោយសារស្អាតអីចឹង ទើបកញ្ញាឯកតំណាងខេត្តសៀមរាប មានគេទាក់ទងបណ្ដើរៗហើយ!
ចន្លោះមិនឃើញ
កញ្ញាឯកតំណាងខេត្ត សៀមរាប កញ្ញា អ៊ុច សុគន្ធដាវី ត្បិតថា នាងមិនបានទទួលបានលទ្ធផលល្អនៅក្នុងវគ្គផ្តាច់ព្រ័ត្រក្នុងកម្មវិធីប្រកួតសម្រស់ Miss Grand Cambodia 2020 ក្ដី ប៉ុន្តែតាមដំណឹងនាង ទទួលបានការចាប់អារម្មណ៍ច្រើនតាមរយៈរូបសម្រស់ស្រស់ស្អាត ជាហេតុធ្វើឲ្យនាងទទួលបានការងារសិល្បៈបណ្ដើរៗហើយ។
ថ្មីៗនេះគេបានឃើញ សុគន្ធាដាវី លេចមុខថតសម្អាងការ ក្នុង ការ ថត ឈុត ប្រណិតរបស់សម្អាងការមួយនៅភ្នំពេញ គឺសម្អាងការ ម្កុដមាសខ្មែរ។ សម្រស់ដ៏ស្រស់ផូរផង់គួបផ្សំជាមួយការតុបតែងមុខធ្វើសក់ រំលេចដោយសំលៀកបំពាក់ប្រណីត និងស្រោចដោយគ្រឿងអលង្ការភ្លឺផ្លេកក្នុងឈុតកូនក្រមុំក្នុងថ្ងៃមង្គលជ័យ គឺពិតជាធ្វើឲ្យអ្នកគាំទ្រនាងមិនសរសើរមិនបាន។
សាមីខ្លួនបានបញ្ជាក់យ៉ាងខ្លីណា នេះគឺជាការងារសិល្បៈទី១ របស់នាងចាប់តាំងពីនាងបានបញ្ចប់ការប្រឡងក្នុងកម្មវិធីខាងលើ។ យ៉ាងណា នាងថាមានការងារមួយចំនួនទៀត បាន និងកំពុងទាក់ទងមកនាងដែរ ប៉ុន្តែអ្វីៗស្ថិតក្នុងការចរចាគ្នានៅឡើយ។ ទាំងនេះ គឺជាឱកាសថ្មីបន្ថែមសម្រាប់នាងដែលអាចក្ដាប់បានឱកាសទីផ្សារថ្មីក្រោយពីបញ្ចប់ការប្រកួត។
កញ្ញា អ៊ុច សុគន្ធដាវី បញ្ជាក់ថា នាងពិតជារីករាយដែលទទួលបានឱកាសការងារសិល្បៈទាំងនេះ ព្រមទាំងមើលឃើញឱកាសការងារបន្តបន្ទាប់នាពេលខាងមុខ ដូចបានបញ្ជាក់ពីខាងលើ គឺថា នាង និងភាគីម្ខាងទៀត បាន និងកំពុងចរចាគ្នា។ ដូច្នេះហើយ នាងថា នឹងខិតខំប្រឹងប្រែងពង្រឹងសមត្ថភាពបន្ថែមដើម្បីបំពេញចិត្តអ្នកគាំទ្រ និងលើកទឹកចិត្តនាងកន្លងមក។
ជាមួយគ្នា កញ្ញាឯកតំណាងខេត្តសៀមរាប ក៏ឆ្លៀតថ្លែងអំណរគុណចំពោះសម្អាងការម្កុដមាសខ្មែរ ដែលបានផ្តល់ឱកាសសម្រាប់រូបនាង ធ្វើជាការចាប់ផ្ដើមរបស់នាងនៅវិថីសិល្បៈ ហើយនាងរំពឹងថាការងារថ្មីនេះក៏ជាការបើកផ្លូវសម្រាប់នាងឈានជើងទៅមុខមួយជំហានទៀតក្នុងវិស័យនេះដែរ។
ងាកមកលោកស្រី គង់ សុត្រាវី នាយិកាសម្អាងការវិញ បានមានប្រសាសន៍ថា បេក្ខនារីជាង២០នាក់ដែលបានឈានជើងចូលក្នុងវគ្គផ្ដាច់ព្រ័ត្រសុទ្ធតែមានសម្រស់ស្រស់សោភា ប៉ុន្តែលោកស្រីបានចាប់អារម្មណ៍ខ្លាំងទាំងរូបសម្រស់ និងអត្តចរិត ព្រមទាំងបុគ្គលិកលក្ខណៈរបស់កញ្ញា អ៊ុច សុគន្ធដាវី ទើបលោកស្រីបានអញ្ជើញនាងឲ្យថតឈុតប្រណីតមួយចំនួនរបស់លោកស្រីតែម្ដង។
សុគន្ធាដាវី ត្រូវបានតម្រូវឲ្យស្លៀកឈុតប្រពៃណីប៉ុន្មានឈុតរៀបចំដោយសម្អាងការខាងលើ ដែលគេមើលឃើញ ទាំងមនុស្ស និងសំលៀកបំពាក់ គឺស្អាតទាំងព្រម។ នាយិកាសម្អាងការដដែល បញ្ជាក់ថា នេះជាឈុតសំលៀកបំពាក់ប្រពៃណីខ្មែរក្នុងពិធីមង្គលការ ។សកម្មភាពនេះ លោកស្រី ប្រាប់ថា ធ្វើឡើងដើម្បីលើកទឹកចិត្តលើកកម្ពស់តម្លៃស្ត្រី ពិសេសធនធានមនុស្សដ៏កម្រ ដើម្បីឲ្យពួកគាត់មានឱកាសបង្ហាញសមត្ថភាព និងសក្ដានុពលរបស់ខ្លួនជូនមហាជន៕