មហោស្រពភាពយន្តជប៉ុន បើកផ្លូវការជាមួយភាពយន្តមួយដែលធ្វើឲ្យផ្ទុះសំណើចពេញរោង

2020-11-07 04:02:08
ភាពយន្ត

2020-11-07 04:02:08
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលនិធិជប៉ុន សហការជាមួយស្ថានទូតជប៉ុនប្រចាំនៅកម្ពុជាបានប្រកាសបើកដំណើរមហោស្រពភាពយន្តជប៉ុននៅកម្ពុជានៅយប់មិញនេះ ជាមួយនឹងការនាំយកភាពយន្តល្អៗមើលជាច្រើនមកបញ្ចាំងជូនទស្សនាដោយឥតគិតថ្លៃ ខណៈយប់មិញភាពយន្តមួយរឿងបើកក្បាលមហោស្រពបានធ្វើឲ្យអ្នកទស្សនាផ្ទុះសំណើចពេញរោង។

ភាពយន្តបើកឆាកមហោស្រពភាពយន្តជប៉ុនឆ្នាំ ២០២០ នៅកម្ពុជាយប់មិញនេះ មានចំណងជើងថា "Talking the Picture”។ សាច់រឿង និយាយបកទៅអតីតកាលសម័យកាលចាប់ផ្ដើមដំបូងនៃភាពយន្តជប៉ុន ដែលភាពយន្តមិនមានសំឡេងឡើយ។ សាច់រឿងផ្ដើមចេញពីកុមារា កុមារី នៅតំបន់ជនបទមួយគូ ពួកគេម្នាក់មានទេពកោសល្យ ជាអ្នកបញ្ចូលសំឡេងកុន ម្នាក់ទៀតជាតួសម្ដែង។

ឆ្លងកាត់កុមារភាពដ៏រីករាយ ពួកបានវិវត្តមកវ័យកំលោះក្រមុំ ដ៏ស្រស់សង្ហាមួយគូ។ យ៉ាងណា ឆាកជីវិតរបស់គេ មិនជួបរឿងសមបប្រកបឡើយ ពិសេសភាគីខាងប្រុស ដែលជួបរឿងរ៉ាវមិនឈប់រហូតដល់ចុងបញ្ចប់។ ទោះបី មិនមានបច្ចេកទេសកាត់តទំនើប ប៉ុន្តែរឿង "Talking the Picture" ទទួលបានការសាទរច្រើន ទៅលើខ្លឹមសារសាច់រឿង មានបង្កប់ស្នេហាបរិសុទ្ធ ការអប់រំជីវិត និងបង្កប់ឈុតកំប្លែងស្ងួត ដែលជារឿយៗ បានផ្ដើមឲ្យផ្ទុះសំណើចឥតឈប់ពេញរោង។

នៅមានរឿងជាច្រើនទៀត ដែលនឹងត្រូវដាក់ឲ្យទស្សនាដោយឥតគិតថ្លៃតាមកាលវិភាគចំនួន២ ទី១ពីថ្ងៃសៅរ៍ទី ៧ វិច្ឆិកា ដល់ថ្ងៃច័ន្ទទី៩។ ទី២ គឺមានបញ្ចាំងនៅចុងសប្ដាហ៍ក្រោយថ្ងៃទី ១៤ និង ១៥វិច្ឆិកា ២០២០។ ទីតាំងបញ្ចាំងមាននៅរោងភាពយន្ត Major Cineplex by Smart នៅផ្សារទំនើបអ៊ីអន ២ និងនៅរោងភាពយន្ត Legend សួន Eden Garden។

កម្មវិធីបើកសម្ពោធមហោស្រពភាពយន្តជប៉ុនយប់មិញ ប្រព្រឹត្តក្រោមវត្តមានរបស់ឯកឧត្តម MIKAMI Masahiro ឯកអគ្គរាជទូតនៃប្រទេសជប៉ុនប្រចាំនៅកម្ពុជា រួមជាមួយវត្តមានលោក ជំទាវ ភឿង សុកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។ ថ្លែងនៅក្នុងពិធី ឯកឧត្តម អគ្គរាជទូតជប៉ុន បានឲ្យដឹងថា ខូវីដ បានធ្វើឲ្យជប៉ុនសម្រេចលុបចោលប្រព្រឹត្តិការណ៍ជាច្រើន។

ដូច្នេះហើយការដែលអាចបើកដំណើរការមហោស្រពភាពយន្តជប៉ុននៅកម្ពុជានាពេលនេះ ឯកឧត្តមពិតជាមានសេចក្ដីសោមនស្សរីករាយណាស់។ "ខ្ញុំសង្ឃឹមថា ប្រជាជនកម្ពុជាជាច្រើន នឹងចូលរួមមហោស្រពភាពយន្តជប៉ុន ព្រមទាំងរីករាយជាមួយខ្សែភាពយន្តជប៉ុនទាំងនេះ!”។

ក៏ដូចគ្នាដែរ លោកជំទាវ ភឿង សុកុណា បញ្ជាក់ថា ក្នុងនាមក្រសួង ក៏រីករាយដូចគ្នា។ ដូច្នេះហើយ ទើបដុតដៃដុតជើងរៀបចំព្រឹត្តិការណ៍វប្បធម៌នេះឡើងឲ្យខាងតែបាន។ ដើម្បីជំរុញការផ្លាស់ប្ដូរវប្បធម៌រវាងប្រទេសទាំងពីរ។ លោក ជំទាវ បញ្ជាក់ថា កម្ពុជា និងជប៉ុន មានទំនាក់ទំនងល្អនឹងគ្នាយូរអង្វែងណាស់មកហើយ ទាំងវប្បធម៌ និងទំនាក់ទំនងការទូត។ ដូច្នេះហើយ ព្រឹត្តិការណ៍នេះ នឹងរឹតចំណងទាក់ទង និងផ្លាស់ប្ដូរវប្បធម៌រវាងប្រទេសទាំងពីរបន្ថែមទៀត។

កម្ពុជា និងជប៉ុនបានសហការរៀបចំព្រឹត្តិការណ៍ខាងលើតាំងពីឆ្នាំ ២០១៥ មក។ ប៉ុន្មានឆ្នាំមកនេះ លោកជំទាវកត់សម្គាល់ឃើញថា មានចំណុចវិជ្ជមានជាច្រើន ដូចជា៖ ព្រឹត្តិការណ៍ បាននាំផលិតករជប៉ុនមកកម្ពុជាច្រើន ហើយជាហេតុឲ្យពួកគេបានដឹងថា កម្ពុជាដែនដីមួយសម្រាប់ការថតភាពយ្តបរទេស។

ចំណុចវិជ្ជមានមួយទៀត មហោស្រពនេះ បាននាំឲ្យយុវជនកម្ពុជាជាច្រើនបានយល់ និងចូលរួមសកម្មភាពក្នុងវិស័យភាពយន្តក្នុងស្រុកជាច្រើន។ ដូច្នេះហើយ តាងនាមក្រសួង លោកជំទាវ សូមគាំទ្រពេញទំហឹងសម្រាប់ព្រឹត្តិការណ៍រឹតចំណងទាក់ទងវប្បធម៌រវាងប្រទេសទាំងពីរមួយនេះ៕