ស្ត្រីកំពុងពពោះដែលបានទម្លាក់លេខត្រៀមទទួលរ៉ូបស្អាតៗ សួស វីហ្សា ផ្ញើទៅហើយ!

2020-11-17 02:50:37
ព័ត៌មាន

2020-11-17 02:50:37
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងស្រីរបស់ផលិតកម្មរស្មីហង្ស មាស សួស វីហ្សា បានបំពេញពាក្យសន្យារបស់ខ្លួនហើយនៅយប់មិញនេះ បន្ទាប់ពីនាងធ្លាប់សន្យាថា នៅពេលនាងរឹងដៃរឹងជើងពីការសម្រាលកូនដំបូងរបស់នាង នាងនឹងចែករ៉ូបពោះធំជូនស្រ្ដីដែលកំពុងពពោះចាប់ពី១ខែ រហូតដល់ថ្ងៃសម្រាល ដោយឥតគិតថ្លៃ ហើយថ្លៃដឹកជញ្ជូនឲ្យទៀតផង។

នៅក្នុងវីដេអូ Live រយៈពេលជិត១ម៉ោង សួស វីហ្សា បញ្ជាក់ថា រ៉ូបពោះធំដែលនាងធ្លាប់ប្រើនេះ គឺជាម៉ូដស្អាតៗមានរាប់រយរ៉ូប។ នាងចង់ឃើញរ៉ូបទាំងនេះបានទៅដល់ដៃ និងប្រើប្រាស់បន្តដោយស្ត្រីពោះធំដែលមានជីវភាពខ្វះខាតទាំងនៅក្នុងរាជធានីភ្នំពេញ និងតាមបណ្ដាខេត្ត ហើយរូបនាង និងស្វាមី គឺជាអ្នកជ្រើសរើសលេខទូរស័ព្ទដែលទម្លាក់មកចង់បានរ៉ូបនោះ ហើយចាត់ចែងផ្ញើជូនស្រ្ដីទាំងនោះដោយផ្ទាល់។

វីហ្សា បញ្ជាក់ថា ថ្លៃដឹកជញ្ជូននៅក្នុងក្រុងថ្លៃ២ដុល្លារ និងតាមខេត្តថ្លៃប្រហែល១ម៉ឺនរៀលនោះ គឺនាងជាអ្នកចេញថ្លៃឲ្យ ហើយគ្រាប់តែសុំម្យ៉ាងបើអ្នកដែលបានទទួល ឬស្រ្ដីដែលកំពុងពពោះនោះបានស្លៀកហើយសូមជួយថតរូបផ្ញើឲ្យនាងបានមើលផង។

តារាចម្រៀងស្រីល្បីឈ្មោះម្នាក់ប្រចាំនៅផលិតកម្មរស្មីហង្ស មាស សួស វីហ្សា បានរៀបការជាមួយលោក ថមមី ហើយបង្កើតបានកូនស្រីដ៏គួរឲ្យស្រឡាញ់ម្នាក់កាលពីខែតុលា ឆ្នាំ២០២០។ នៅអំឡុងពេលពពោះវីហ្សា បានចំណាយលុយជាច្រើនដើម្បីទិញរ៉ូបស្អាតៗ និងប្រេនៗដែលមានតម្លៃថ្លៃទៅប្រើប្រាស់ក្នុងរយៈពេលខ្លី។ ចុងក្រោយនាងក៏សម្រេចចិត្តយករ៉ូបទាំងនេះធ្វើជាអំណោយដល់ស្ត្រីពោះធំផ្សេងទៀត៕

អត្ថបទ៖ ជិន សុភ័ក្ដ្រ