ទស្សនិកជនស្ទើរភ្លេចទៅហើយ សិល្បការិនី៤នាក់ បាត់មុខច្រើនឆ្នាំ ឥឡូវហក់ចូលសិល្បៈវិញ

2020-11-18 03:34:31
ព័ត៌មាន

2020-11-18 03:34:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារមានហេតុផលផ្សេងគ្នា ខ្លះជាប់កិច្ចការងារ ខ្លះជាប់មុខរបររកស៊ី ឬមានគ្រួសារជាដើម សិល្បការិនីខ្មែរមួយចំនួនបានដកថយពីការងារសិល្បៈខ្លះ ទៅបាត់រហូតមិនខ្ចីនឹក ប៉ុន្តែខ្លះទៀត នៅអាល័យ ឬកាលៈទេសៈផង បានវិលមកការងារសិល្បៈវិញ ក្រោយដកខ្លួនស្ងាត់ឈឹងច្រើនឆ្នាំ ប្រិយមិត្តស្ទើរតែភ្លេចទៅហើយនោះ។

១.ឌុច សុភា៖ សុភា គឺជាអតីតតារាស្រីជួរមុខ ដ៏ល្បីកាលពីប្រមាណជិត ១០ឆ្នាំមុន។ តារាស្រីទម្រង់មុខមានស្នេហ៍រូបនេះ បានជួបរឿងរ៉ាវជាច្រើនចាប់តាំងពីបានរៀបការស្វាមីមកកាលពីចុងឆ្នាំ ២០១០។ នាងបានដកថយពីការងារសិល្បៈតាំងពីពេលនោះ រហូតដល់មានរឿងលែងលះស្វាមីនៅ ១ឆ្នាំក្រោយ នាងក៏បានត្រឡប់មកការសម្ដែងវិញ។ យ៉ាងណា នាងនៅតែត្រូវភ្ជាប់ជាមួយចចាមអារ៉ាមជាច្រើន ពាក់ព័ន្ធទំនាក់ទំនងជាមួយមន្ត្រី អ្នកមានអំណាចមួយចំនួន។

ចចាមអារ៉ាមនោះ បានទាញ សុភា ឲ្យត្រឡប់ទៅក្រោយវាំងននសិល្បៈជាថ្មី។ តារាស្រីបានរស់នៅស្ងប់ស្ងាត់ច្រើនឆ្នាំ ហើយប្រមាណជា១ឆ្នាំមុន គេមើលប្រទះឃើញ សុភា បណ្ដោយខ្លួនឲ្យធាត់ខ្លាំងមើលស្ទើរពុំស្គាល់។ ស្ថានភាពនេះ គេប៉ាន់ប្រមាណថា អតីតតារាស្រីជួរមុខនេះ ទំនងមិនត្រឡប់មកសិល្បៈវិញនោះទេ។ ប៉ុន្តែខុសពីការប៉ាន់ប្រមាណនេះ ថ្មីៗនេះបានលេចដំណឹងថា សុភា បានមករកការសម្ដែងវិញហើយ។

តាមកញ្ញា ទឹម រដ្ឋា បានឲ្យដឹងថា ឌុច សុភា បានចូលរួមសម្ដែងជាមួយនាងនៅក្នុងខ្សែភាពយន្តរឿង "ម្ដាយ ២"។ យ៉ាងណា គេមិនទាន់ដឹងថា នេះជាវិលត្រឡប់វិញពេញលេញ ឬគ្រាន់ជាការឆក់កណ្ដៀតនោះទេ។

២.អេននី ហ្សាម៖ អេននី ហ្សាម បានបាត់មុខក្រោយពីនាងចេញបទឆ្លងឆ្លើយនាយ គ្រឿន មួយបទមានចំណងជើងថា "សង្ស័យតែឆេះអ៊ីសេ" និងបទ "មនុស្សក្នុងរូបថត" កាលពីអំឡុងឆ្នាំ ២០១៤-២០១៥។ ចាប់តាំងពីពេលនោះមក នាងស្រាប់តែបន្សាត់ខ្លួនចេញឆ្ងាយពីការងាររាំច្រៀងរបស់នាងបាត់ស្ងាត់ឈឹង។ ប្រិយមិត្តអាចត្រឹមឃើញសកម្មភាពផ្ទាល់ខ្លួនខ្លះរបស់នាងតាមរយៈបណ្ដាញសង្គមហ្វេសប៊ុក និង IG របស់នាង។

តាមរយៈរូបភាពនានា ដែលតារាស្រីបង្ហោះនៅលើបណ្ដាញសង្គមទាំងពីរ អំឡុងពេលសម្រាកពីសិល្បៈ អេននី ត្រូវបានគេឃើញថានាង ឡើងគីឡូខ្លួនខ្លាំងណាស់។ ប៉ុន្តែថ្មីៗនេះ គេស្រាប់តែឃើញម្ចាស់បទ "ខូចអារម្មណ៍" បង្ហាញខ្លួននៅក្នុងក្រុមការងារថតរបស់ផលិតកម្មថោន និងមិត្តរួមទ្រនំរបស់នាងឡើងវិញ។ ប្រភពមួយបានលួចបង្ហើបថា តារាចម្រៀងស្រី បានត្រឡប់មកវិញហើយ ដោយបច្ចុប្បន្ន កំពុងសម្ងំថតបទចម្រៀងឲ្យ ថោន នឹងគ្រោងចេញឆាប់ៗនេះ។

៣.សឿ សុធារ៉ា ៖ ភរិយារបស់លោក សាពូន មីដាដា ក៏ស្ថិតក្នុងចំណោមតារាស្រីដែលបានវិលត្រឡប់មកការសម្ដែងវិញដែរ ក្រោយបាត់មុខជិត ១០។ សុធារ៉ា បានដកខ្លួនឆ្ងាយពីសិល្បៈចាប់តាំងពីរៀបការជាមួយម្ចាស់បទ "ដើម្បីអ្វីទៅអូន" កាលពីឆ្នាំ ២០០៩។ មកដល់ឆ្នាំ ២០២០ នេះ តារាស្រីដែលមានរូបសម្រស់ស្រស់សោភា រូបនេះ ត្រូវបានគេឃើញមានមុខសម្ដែងក្នុងបទចម្រៀងរបស់លោក អេនឌី ថតសម្អាងការ និងសម្ដែងភាពយន្តមួយចំនួនផង។

៤.សម ម៉ាណា៖ មិនខុសពីតារាស្រីទាំង៣ខាងលើ សម ម៉ាណា បានបាត់ស្ងាត់ឈឹងពីសិល្បៈប្រមាណ ១០ឆ្នាំ។ ការរស់នៅយ៉ាងស្ងាត់កំបាំងនោះ ល្បីថា ម៉ាណា មានទំនាក់ទំនងជាមួយមន្ត្រីអ្នកមានអំណាចមួយចំនួន។ តែទើបថ្មីៗនេះប៉ុណ្ណោះ គេឃើញតារាសម្ដែងខាងលើ លេចមុខវិញក្រឡឺម។ តាមដំណឹង ម៉ាណា បានមកចូលរួមសម្ដែងភាពយន្តមួយរឿង ឲ្យអ្នកស្រី ពាន់ ភួងបុប្ផា៕

អត្ថបទ៖ ទារិកា