- 2020-12-01 08:57:20
- ព័ត៌មាន
សរុប ៤ឆ្នាំមកនេះ មានចម្រៀងច្រើនណាស់ ដែលក្រសួងលេងធម៌ក្ដៅ!
- 2020-12-01 08:57:20
- ចំនួនមតិ 0 | ចំនួនចែករំលែក 0
សរុប ៤ឆ្នាំមកនេះ មានចម្រៀងច្រើនណាស់ ដែលក្រសួងលេងធម៌ក្ដៅ!
ចន្លោះមិនឃើញ
ចំណាត់របស់ក្រសួងពាក់ព័ន្ធបានចាប់ផ្តើមជាបន្តបន្ទាប់នៅ ទៅបទចម្រៀង ឬ MV ដែលមានរូបភាព ឬអត្ថន័យធ្វើឲ្យប៉ះពាល់ដល់សង្គម។ តាំងពីឆ្នាំ ២០១៦ មក ក្រសួងបានហាមឃាត់ការចាក់ផ្សាយបទចម្រៀង និង MV លើប្រព័ន្ធផ្សព្វផ្សាយ បទចម្រៀងទាំងនោះរួមមាន៖
១.បទ «ស្អាតជានិច្ច»
បទចម្រៀង «ស្អាតជានិច្ច» ច្រៀងដោយ អ្នកនាង ពេជ្រ សោភា ជាមួយ អ្នកចម្រៀងរ៉េបលោក ជាដេវីត និពន្ធទំនុកដោយ នាង ពេជ្រ សោភា ស្ថិតក្នុងផលិតកម្មរស្មីហង្សមាស។ បទចម្រៀងនេះពេលដែលចេញភ្លាមមានការគាំទ្រខ្លាំងក្នុងស្រទាប់យុវវ័យ ប៉ុន្តែកាលពីថ្ងៃទី២៤ ខែកុម្ភៈ ឆ្នាំ២០១៦ រដ្ឋមន្ត្រីក្រសួងព័ត៌មានបានកំហិតឲ្យម្ចាស់ស្ថានីយទូរទស្សន៍ និងវិទ្យុទាំងអស់បញ្ឈប់ការចាក់ផ្សាយចម្រៀងមួយបទមានចំណងជើងថា «ស្អាតជានិច្ច»។ ក្រសួងព័ត៌មានបានចាត់ទុកថា ខ្លឹមសារទំនុកច្រៀងដែលនិពន្ធថ្មីនេះប្រាសចាកពីអត្ថន័យដើម ដែលបានអប់រំបណ្តុះគំនិតប្រាជ្ញាស្មារតីឲ្យកុមារឧស្សាហ៍ព្យាយាម រស់នៅស្អាត មានអនាម័យគ្រប់ពេលវេលា គ្រប់ទីកន្លែង ធ្វើឲ្យក្មេងមិនមានភាពខ្ជិលច្រអូស។
២.បទ «ស៊ីបានចេះតែស៊ីទៅ» និង បទ «ទាល់តែយូរទើបស៊ីអូនបាន»
ចម្រៀងនេះក៏រងការរិះគន់ពីពលរដ្ឋទូទៅយ៉ាងសម្បើមដែរ ក្រោយមកក្រសួងព័ត៌មានក៏បានដាក់ចេញនូវចំណាត់ការភ្លាមៗ ទៅលើបទចម្រៀងពីរបទ ដែលមានចំណងជើងថា «ស៊ីបានចេះតែស៊ីទៅ» ច្រៀងដោយលោក កែវ វាសនា ស្ថិតក្នុងផលិតកម្មថោន និងបទ «ទាល់តែយូរទើបស៊ីអូនបាន» ច្រៀងដោយ កញ្ញា ចាន់ ម៉ាលីស របស់ផលិតកម្ម U Production ដោយចេញសេចក្តីជូនដំណឹងចុះថ្ងៃទី ៦ ខែកក្កដា ឆ្នាំ២០១៦ ប្រាប់ដល់បណ្តាម្ចាស់ស្ថានីយទូរទស្សន៍ និងវិទ្យុ ទាំងអស់បញ្ឈប់ការចាក់ផ្សាយនូវបទចម្រៀងទាំងពីរបទនេះ។ ចំពោះមូលហេតុនៃការបញ្ឈប់ការចាក់ផ្សាយនោះ គឺដោយសារបទទាំងពីរនេះមានអត្ថន័យប្រាសចាកសីលធម៌ខ្មែរធ្ងន់ធ្ងរ ពិសេសប៉ះពាល់ដល់កិត្តិយស និងតម្លៃស្ត្រីខ្មែរ។
៣.បទ «គ្រូបង្រៀនស្រវឹងស្រា»
កាលពីពេលថ្មីបទចម្រៀង«គ្រូបង្រៀនស្រវឹងស្រា»នេះ រងការរិះគន់ជាដំណំពីសាធារណៈជនមួយចំនួនដែរ រហូតក្រសួងព័ត៌មានចេញលិខិត កាលពីថ្ងៃទី១៩ ខែធ្នូ ឆ្នាំ២០១៧ហាមមិនឲ្យចាក់ផ្សាយតាមវិទ្យុ និងទូរទស្សន៍នោះទេ។ ក្រសួងលើកឡើងថាបទនេះបានប្រាសចាកអំពីអាកប្បកិរិយា និងសីលធម៌ថ្លៃថ្នូររបស់គ្រូបង្រៀនទូទៅ ធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្ដីថ្លៃថ្នូររបស់គ្រូបង្រៀន ដែលអាចជះឥទ្ធិពលមិនល្អដល់សង្គមទាំងមូល។ បទចម្រៀងដែលនេះជាការច្រៀងដោយតារាចម្រៀងខ្មែរសុរិន ចេន សាយចៃ និងនិពន្ធទំនុកច្រៀងដោយលោក យឹម តាស្រង់ ស្ថិតក្នុងផលិតកម្ម ថោន។
៤.បទ "សល់តែចិត្តស្មោះ" កាលពីឆ្នាំ ២០១៨
ក្រសួងព័ត៌មាន ព្រមទាំង ក្រសួងការងារនិងបណ្ដុះបណ្ដាលវិជ្ជាជីវៈ នាថ្មីៗនេះ បានចេញសេចក្ដីជូនដំណឹង ដើម្បីឲ្យបញ្ឈប់ការចាក់បទចម្រៀងដែលមានចំណងជើងថា "សល់តែចិត្តស្មោះ" ដែលច្រៀងដោយលោកស្រី កែវ ច័ន្ទសម្ផស្ស របស់ផលិតកម្មខ្មែរអមតៈ។
ក្រសួងបានរកឃើញថា បទ "សល់តែចិត្តស្មោះ" បានធ្វើឲ្យប៉ះពាល់យ៉ាងខ្លាំងដល់តម្លៃការងាររបស់អ្នកបម្រើការងារតាមផ្ទះដែលច្បាប់ស្តីពីគាំពារ ជាពិសេស រាជរដ្ឋាភិបាលកម្ពុជា បាននិងកំពុងផ្ដោតការយកចិត្តទុកដាក់និងផ្ដល់កិច្ចគាំពារដល់ពួកគាត់ដែលបម្រើការងារតាមផ្ទះ៕
៥.បទ "កណ្ដៀវអូនស្រួយ" ឆ្នាំ ២០១៩
មន្រ្តីក្រសួងវប្បធម៌ និងវិចិត្រសិល្បៈ បានឲ្យដឹងថា ក្រសួងអប់រំតាមរយៈក្រុមប្រឹក្សាពិន័យ និងលើកសរសើរនៃក្រសួងវប្បធម៌ បានហៅអ្នកនិពន្ធបទ «កណ្ដៀវអូនស្រួយ» មកអប់រំណែនាំ និងស្នើឲ្យបញ្ឈប់ការតែងនិពន្ធបទចម្រៀង ដែលមានអត្តន័យប៉ះពាល់ដល់សីលធម៌សង្គម។ អ្នកនិពន្ធឈ្មោះ អ៊ិច ចន្ថា បានទទួលការណែនាំពីមន្រ្តីក្រសួងវប្បធម៌ ធ្វើឡើងនៅព្រឹកថ្ងៃទី ១០ ខែមិថុនា ឆ្នាំ២០២០ នៅក្រសួងវប្បធម៌។
៦.មកដល់ឆ្នាំ ២០២០ បទ "ចាក់សាំង" របស់តារាចម្រៀងរ៉េប MC Bull បានរងការរិះគន់ជាច្រើនពីមហាជន។ ចុងក្រោយ ក្រសួងបានចេញសេចក្ដីជូនដំណឹងហៅម្ចាស់ស្នាដៃមកជួប។ មិនមានដំណឹងថា ម្ចាស់បទខាងលើបានចូលខ្លួនតាមការកោះហៅឬអត់ទេ ប៉ុន្តែក្រោយមក បទនេះ ត្រូវបានលុបចេញពីឆាណែលយូធូបរបស់ក្រុមផលិតមួយនេះ។
ក្រៅពីបទ ចាក់សាំង”របស់លោក MC Bull បទ “អូនធំ” របស់តារាចម្រៀង សោភា ទេពី បទ”អូនស្អាតពេលស្រាត” បទ”Hot Boy” របស់លោកវណ្ណដា និងបទ”នារីបឹងទំពុន” របស់លោក Tempo Tris ក៏ទទួលរងការរិះគន់ជាច្រើនពីមហាជនដែរ។ នេះសម្រាប់ឆ្នាំ ២០២០ ប៉ុន្តែក្រឡេកទៅអតីតកាល ក្រសួងក៏បានហាមឃាត់មិនឲ្យចាក់ផ្សាយក្នុងប្រព័ន្ធផ្សព្វផ្សាយ មានទូរទស្សន៍ និង វិទ្យុនូវបទចម្រៀងមួយចំនួនទៀត ដូចជា "ឈឺត្រង់ពកណា" "ពូកអូនប៉ុណ្ណា?" " ខ្ញុំចូលចិត្តញ៉ាំការ៉េម" "ដួលគងចំប៉ាន់" "ជីវិតអ្នកប្រដាល់" "បាត់បងដូចបាត់ hot dog” "អាម៉ុមពុំពីត" និងបទ "សង្សារខ្ញុំចរិតបាន" ជាដើម៕
