- 2020-12-11 07:23:23
- ព័ត៌មាន
ទើបចូលហង្សមាសបានជាង ២ ខែ Tho Meet សម្រុកធ្វើបទចេញដូចព្យុះ
- 2020-12-11 07:23:23
- ចំនួនមតិ 0 | ចំនួនចែករំលែក 0
ទើបចូលហង្សមាសបានជាង ២ ខែ Tho Meet សម្រុកធ្វើបទចេញដូចព្យុះ
ចន្លោះមិនឃើញ
អ្នកនិពន្ធ Tho Meet បានសម្រុកធ្វើបទចម្រៀងចេញដូចព្យុះ ក្រោយបានចូលរួមជាមួយហង្សមាសប្រមាណ២ខែមកនេះ ខណៈសប្ដាហ៍មុន លោកទើបនឹងបានធ្វើឲ្យមានការចាប់អារម្មណ៍ខ្លាំងរួចមកហើយ ក្រោយធ្វើបទ "ប្ដីលើផែនដី អស់ល្អត្រឹមប្ដីអូនហើយ!” ឲ្យ សុគន្ធ និសា ទទួលបានការគាំទ្រយ៉ាងសម្បើម។
លោក Tho Meet ដែលធ្លាប់បម្រើការនៅផលិតកម្មធំៗជាច្រើននៅកម្ពុជា បានទៅចូលរួមជាមួយផលិតកម្មហង្សមាស កាលពីចុងខែកញ្ញា ២០២០ ដែលគិតមកដល់ពេលនេះមានរយៈពេលជាង ២ខែមកហើយ។ មកដល់ភ្លាម អ្នកនិពន្ធរូបនេះ ត្រូវបានតម្រូវឲ្យបទចម្រៀងមួយឲ្យជយលាភី I Am A Singer Cambodia រដូវកាលទី2 កញ្ញា វី ឌីណែត តែម្ដង។
បន្តមកទៀត លោកក៏បានធ្វើបទចម្រៀងឲ្យតារាចម្រៀងជួរមុខរបស់ហង្សមាសស្ទើរតែគ្រប់គ្នាច្រៀងថែមទៀត ក្នុងនោះជាលោក ខេមរៈ សិរីមន្ត ឆន សុវណ្ណារាជ នី រតនា គង់ ចំរើន កែវ សុបញ្ញា ណុប បាយ៉ារិទ្ធ ប៉ាច គីមមួយ ឈិន រតនៈ និង ធែល ថៃ ជាដើម។ សរុបមកដល់បច្ចុប្បន្នមានបទចម្រៀងប្រមាណ ជាង ១០បទមកហើយ ដែលជាស្នាដៃរបស់លោក។
បទដែលទទួលបានការគាំទ្រខ្លាំងមានដូចជា “ទម្រាំបែកបង" "ដើម្បីបង អូនលះបង់អស់ហើយ!” និងបទ "ប្ដីលើផែនដី អស់ល្អត្រឹមប្ដីអូនហើយ!” ជាដើម ដែលផ្ទុះខ្លាំងកាលពីសប្ដាហ៍មុនដោយចេញត្រឹមរយៈពេល២ថ្ងៃប៉ុណ្ណោះ មានអ្នកចូលស្ដាប់ដល់ទៅ ជិត១លានដងឯណោះ។
តាមការបញ្ជាក់របស់ Tho Meet បានឲ្យដឹងថា ជារួម គឺលោកមានចម្រៀងថ្មីៗ ចេញឲ្យតារាចម្រៀងក្នុងផលិតកម្មហង្សមាសដាច់ ពោលគឺមានជារៀងរាល់សប្ដាហ៍ ខណៈលោកនិពន្ធ ស្ទើរតែគ្មានពេលសម្រាក។ "បទខ្ញុំមានរាល់សប្ដាហ៍បង ដែលពេលខ្លះ១ ពេលខ្លះ២ ព្រោះនិពន្ធវាត្រូវការអារម្មណ៍ដែរ បើអារម្មណ៍ល្អធ្វើបានលឿនទៅ តែជារួមមេឡូឌី ខ្ញុំធ្វើ១ថ្ងៃ បារ៉ូល ២ថ្ងៃ ហើយសម្រួលបទភ្លេងអីហើយ សរុបទៅខ្ទង់ ៣-៤ថ្ងៃ រួចហើយ!”។
ក្រោយពីបានធ្វើឲ្យមានការចាប់អារម្មណ៍តាមរយៈបទ "ប្ដីលើផែនដី អស់ល្អត្រឹមប្ដីអូនហើយ!” Tho Meet ទើបនឹងបញ្ចេញបទចម្រៀងថ្មីមួយបទនាម្សិលមិញនេះ បទនោះមានចំណងជើងថា "ឆ្នាំថ្មី អ្វីៗក៏ល្អ" ច្រៀងដោយ ចាន់ សុបញ្ញា និង សុខ សុជាតា៕