- 2021-01-08 09:50:22
- ភាពយន្ត
"រសស្នេហ៍ផ្លែល្វា" ក្លាយជារឿងភាគខ្មែរដំបូងគេដែលផលិតករហ៊ានចេញថតនៅដើមឆ្នាំ២០២១
- 2021-01-08 09:50:22
- ចំនួនមតិ 0 | ចំនួនចែករំលែក 0
"រសស្នេហ៍ផ្លែល្វា" ក្លាយជារឿងភាគខ្មែរដំបូងគេដែលផលិតករហ៊ានចេញថតនៅដើមឆ្នាំ២០២១
ចន្លោះមិនឃើញ
ស្ថានីយទូរទស្សន៍ប៉ុស្តិ៍លេខ៥ បានប្រកាសចេញថតខ្សែភាពយន្តភាគមុនគេនៅដើមឆ្នាំ២០២១ នេះ ខណៈដែលផលិតករ និងស្ថានីយទូរទស្សន៍មួយចំនួនរងផលប៉ះពាល់យ៉ាងដំណំផ្នែកហិរញ្ញវត្ថុដើម្បីផលិតរឿងថ្មីៗ ឬបន្តដំណើរការថតពេញលេញនៅឡើយ ដោយសារបញ្ហាជំងឺកូវីដ-១៩។
ពិធីក្រុងពាលីដើម្បីថតរឿងភាគដែលមានចំណងជើងថា "រសស្នេហ៍ផ្លែល្វា" ត្រូវបានធ្វើឡើងនៅព្រឹកថ្ងៃទី៨ ខែមករា ឆ្នាំ២០២១ ក្រោមការចូលរួមពីផលិតករ តំណាងស្ថានីយទូរទស្សន៍ និងសិល្បករ-សិល្បការិនីជាច្រើនរូប។
តួអង្គឯកស្រី ឈិន ស៊ាវម៉ី និយាយថា ក្រោយពីផ្អាកពីការងារសិល្បៈមួយរយៈដោយសារជាប់នឹងការងារផ្ទាល់ខ្លួន ពេលនេះស្រាប់តែបានក្លាយជាតួអង្គឯកស្រីតែម្នាក់ ដែលមានតួឯកប្រុសដល់ទៅ២នាក់ គឺលោកឈឹម សក្កដា និងលោក សេង មង្គល។
កញ្ញា ឈិន ស៊ាវម៉ី បន្ថែមថា ក្នុងរឿងនេះនាងដើរជាតួអង្គឈ្មោះ "វ៉ាន់ដាលី" ដែលមានរូបសម្បត្ដិស្អាត ឈ្លាសវៃ រួសរាយរាក់ទាក់ ហ្មឺងម៉ាត់ និងលាយភាពកាចឆ្នាសខ្លះដែរ។ នេះជាការបើកទំព័រការងារសិល្បៈឡើងវិញដែលនាងរំពឹងថាទទួលបានការគាំទ្រច្រើនពីទស្សនិកជន។
ក្រៅពីវត្តមានតារាសម្ដែង ឈិន ស៊ាវម៉ី លោក ឆឹម សក្កដា និងលោក សេង មង្គល ដែលជាតួអង្គឯកនៅក្នុងរឿងនេះ ក៏មានតារាសម្ដែងជាច្រើនដួងទៀតដែរដូចជា៖កញ្ញា ហាស់ ឌីជូលី កញ្ញា រីស្រីណេត លោក ម៉ុង ប៊ុនណូរ៉ា លោក អៀង ចេនឡា ជាដើម។
ខ្សែភាពយន្តភាគរឿង"រសស្នេហ៍ផ្លែល្វា" នេះ នឹងត្រូវចំណាយពេលថតចន្លោះពី៣ ទៅ៤ខែមុនពេល ចាក់បញ្ចាំងនៅលើកញ្ចក់ទូរទស្សន៍ប៉ុស្តិ៍លេខ៥៕