- 2021-01-12 08:32:31
- ព័ត៌មាន
ដំណឹងល្អសម្រាប់យុវជនមានទេពកោសល្យតែងនិពន្ធបទចម្រៀង Galaxy ប្រកាសទិញក្នុងតម្លៃកប់ៗមិនធ្លាប់មាន
- 2021-01-12 08:32:31
- ចំនួនមតិ 0 | ចំនួនចែករំលែក 0
ដំណឹងល្អសម្រាប់យុវជនមានទេពកោសល្យតែងនិពន្ធបទចម្រៀង Galaxy ប្រកាសទិញក្នុងតម្លៃកប់ៗមិនធ្លាប់មាន
ចន្លោះមិនឃើញ
ផលិតកម្ម Galaxy Navatra នៅថ្ងៃនេះ ប្រកាសពីផែនការទិញរាល់បទចម្រៀងដែលនិពន្ធថ្មីៗដែលជាស្នាដៃរបស់យុវជនខ្មែរទាំងអស់ជាមួយតម្លៃខ្ពស់មិនធម្មតា ១បទតម្លៃចន្លោះពី៦០០ដុល្លារ ទៅ១៥០០ដុល្លារអាមេរិកឯណោះ។
ផែនការនេះ Galaxy Navatra បញ្ជាក់ថា ធ្វើឡើងដើម្បីលើកកម្ពស់ស្នាដៃនិពន្ធបទចម្រៀងថ្មី ក៏ដូចជាលើកទឹកចិត្តដល់យុវជនខ្មែរដែលមានទេពកោសល្យខាងផ្នែកតែងនិពន្ធបទចម្រៀង ជាបច្ច័យជួយឲ្យពួកគេអាចរកបានចំណូលតាមរយៈទេពកោសល្យផ្ទាល់ខ្លួន។
នៅក្នុងសេចក្ដីប្រកាសនៅលើទំព័រហ្វេសប៊ុករបស់ខ្លួន ផលិតកម្ម Galaxy Navatra បញ្ជាក់ថា ក្រុមហ៊ុន នឹងទទួលទិញយកស្នាដៃបទចម្រៀងថ្មីទាំងអស់ក្នុងតម្លៃ១បទចាប់ពី ៦០០ដុល្លារ រហូតដល់១៥០០ដុល្លារ។ ផែនការនេះ នឹងចាប់ផ្ដើមពីថ្ងៃទី ១២ មករា ២០២១ នេះតទៅ។ ប៉ុន្តែមិនទាន់មានកាលបរិច្ឆេទបទបញ្ចប់ការទិញនៅពេលណានៅឡើយទេ។
បែបនេះក្ដី មិនមែនន័យថា រាល់ស្នាដៃដែលផ្ញើមក សុទ្ធតែត្រូវទទួលយកនោះទេ ពោលគឺ ស្នាដៃទាំងអស់ត្រូវឆ្លងកាត់ការត្រួតពិនិត្យជាមុនសិន។ ក្រុមការងារម្នាក់នៃផលិតកម្មខាងលើ បានប្រាប់ Sabay ថា រាល់ស្នាដៃទាំងអស់ដែលផ្ញើនឹង ផលិតកម្មនឹងមានគណៈកម្មការត្រួតពិនិត្យលើគុណភាព មុនពេលសម្រេចថា ស្នាដៃណាទទួលយកបាន ឬមិនបាន។
នេះជាផែនការថ្មីមួយ នៅក្នុងឧស្សាហកម្មតែងនិពន្ធបទចម្រៀង ដែលគេមើលឃើញថា នឹងអំណោយផលទៅអ្នកនិពន្ធនានា ទាំងអ្នកអាជីព និងអ្នកមិនទាន់អាជីពអាចរកចំណូលតាមរយៈស្នាដៃរបស់ខ្លួនបាន។ ផលិតករវ័យក្មេង យន ប៊ុនរាជ យល់ថា វាជារឿងល្អមួយ សម្រាប់អ្នកនិពន្ធទំនុកច្រៀង និងអ្នកនិពន្ធបទភ្លេងទាំងឡាយ ព្រោះថា តម្លៃដែលផលិតកម្មប្រកាសទិញ គឺជាតម្លៃខ្ពស់មួយ។ យ៉ាងណា លោកថា លុះត្រាតែអ្នកផលិត មានស្នាដៃ ក៏ដូចជាសមត្ថភាពខ្ពស់ដែរ។
សម្រាប់ម្ចាស់ស្នាដៃ ដែលប្រាថ្នាចង់លក់បទចម្រៀងដែលជាស្នាដៃផ្ទាល់ខ្លួន អាចផ្ញើស្នាដៃទៅកាន់ក្រុមការងារផលិតកម្ម តាមរយៈ Telegram ឬប្រអប់សារក្នុងទំព័រហ្វេសប៊ុកផ្លូវការរបស់ផលិតកម្ម៕