WOW! លៀក លីដា គ្រោងបញ្ចេញទុន៧០ម៉ឺនដុល្លារ ដើម្បីផលិតរឿងខ្មែរមួយឲ្យHollywood បានស្គាល់

2021-03-11 03:15:41
ភាពយន្ត

2021-03-11 03:15:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាងហ្វាងផលិតកម្ម អិល ឌី និងជាផលិតករខ្មែរល្បីឈ្មោះមួយរូប គឺលោក លៀក លីដា គ្រោងផលិតខ្សែភាពយន្តខ្មែរខ្នាតធំមួយដែលចំណាយទុនរហូតដល់៧០ម៉ឺនដុល្លារ។ ត្បិតថាលោកមិនអានអាចប្រាប់ពីចំណងជើងរឿង ប៉ុន្តែលោកថាតាមរយៈរឿងនេះ នឹងជួយលើកកម្ពស់វិស័យភាពយន្តខ្មែរ ព្រមទាំងលើកមុខមាត់ជាតិខ្មែរលើឆាកអន្តរជាតិ។

លោក លៀក លីដា និយាយថា បច្ចុប្បន្នលោកមានថវិកាពាក់កណ្ដាល នៃគម្រោងចំណាយសរុប៧០ម៉ឺនដុល្លារនោះហើយ ហើយកំពុងអង្គុយគិតរកដៃគូសហការ ដើម្បីសម្រេចនូវគោលបំណងនេះ។ លោកច្បាស់ក្នុងចិត្តថា បើទោះបីជាការផលិតរឿងខ្មែរមួយនេះចេញទៅខាតបង់ក៏ជាឱកាសនាំយកភាពយន្តខ្មែរឲ្យពួកHollywood បានស្គាល់ដែរ។

លៀក លីដា៖"វាជារឿងបង្ហាញពីសមត្ថភាពរបស់ផលិតករខ្មែរ និងបង្ហាញពីវប្បធម៌ខ្មែរសម័យមុន។ ខ្ញុំជឿថា រឿងនេះនឹងជោគជ័យលើទីផ្សារអន្តរជាតិ ហើយខ្ញុំនិយាយហើយមិនងាយនឹងចោលទេ ដូចជារឿងThe Clock អីចឹង"។

ចាងហ្វាងផលិតកម្ម អិល ឌី រូបនេះ ទើបប្រកាសថាខ្លួនបានខាតបង់ទុនយ៉ាងសន្ធឹកលើការថតរឿង"ជញ្ជាំងក្រហម" ដែលទើបតែថតបានប្រហែល១០% ក៏អាក់ខានទៅវិញដោយសារតែបញ្ហាជំងឺកូវីដ-១៩ និងបញ្ហាតួអង្គឯកប្រុសនៅប្រទេសភូមាមានបញ្ហាបាត់ខ្លួនហើយទើបរកឃើញវិញក្នុងព្រឹត្តិការរំជើបរំជួលដោយរដ្ឋប្រហារនៅក្នុងប្រទេសនោះ។

ប៉ុន្តែលោក លៀក លីដា នៅតែមិនអល់អែក ឬចាវម្ដងណាសោះក្នុងការផលិតរឿងថ្មីៗដែលចំណាយទុនច្រើន។ ក្នុងរយៈពេលជាង១៥ឆ្នាំដែលលោកប្រឡូកក្នុងវិស័យភាពយន្ត គេទើបឮលោកត្អូញថាខាតបង់លើរឿង"ជញ្ជាំងក្រហម" មួយប៉ុណ្ណោះ ហើយរឿងខ្មែរដែលលោកគ្រោងផលិតនេះនឹងទទួលបានការគាំទ្រទាំងនៅថ្នាក់ជាតិ និងអន្តរជាតិ៕

អត្ថបទ៖ ជិន សុភ័ក្ដ្រ