តារាខ្មែរទាំងពីរដួងនេះ សំណូមពររឿងដូចគ្នាទៅកាន់សម្ដេចតេជោ ជួយអន្ដរាគមន៍បន្ទាន់

2021-03-18 04:09:21
ព័ត៌មាន

2021-03-18 04:09:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រី សួង សាខារ៉ានីត និងម៉ា នីកា បាននិយាយរឿងដូចគ្នាក្នុងបរិបទកូវីដ-១៩ ហើយស្នើសុំសម្ដេចអគ្គមហាសេនាបតីតេជោ ហ៊ុន សែន ជួយអន្តរាគមន៍លើបញ្ហាចំពោះមុខរបស់ប្រជាពលរដ្ឋទូទៅមួយចំនួន ខណៈដែលបញ្ហាជំងឺកូវីដ-១៩ នៅតែអូសបន្លាយ។

តារាសម្ដែង ម៉ា នីកា បានសំណូមពរចំនួន៤ចំណុចទៅកាន់សម្ដេច។ ទី១ គឺបញ្ហាប្រេងសាំងឡើងថ្លៃ ដែលបញ្ហានេះសម្ដេច គួរអន្ដរាគមន៍បញ្ចុះមកនៅក្នុងតម្លៃមួយសមរម្យ ដោយសារសេដ្ឋកិច្ចពលរដ្ឋសម័យកូវីដ-១៩ ធ្លាក់ចុះ។ ទី២ ជួយអន្តរាគមន៍ទៅម្ចាស់ផ្ទះជួល ឬម្ចាស់កន្លែងជួលរកស៊ី ត្រូវបញ្ចុះតម្លៃពាក់កណ្ដាលមួយរយៈ ហើយពេលស្ថានភាពល្អប្រសើរវិញចាំគិតតម្លៃដូចដើម។

ទី៣ នាងបានស្នើសុំឲ្យសម្ដេចជួយអន្ដរាគមន៍ទៅធនាគារ ឬគ្រឹះស្ថានមីក្រូហិរញ្ញវត្ថុទាំងរដ្ឋ និងឯកជន គួរឲ្យប្រជាពលរដ្ឋដែលជាកូនបំណុលផ្អាកបង់មួយរយៈ ហើយនឹងបង់ទៀងទាត់ដូចដើមឡើងវិញនៅពេលស្ថានភាពល្អប្រសើរ។ និងទី៤ នាងស្នើសុំឲ្យសម្ដេចជួយអន្ដរាគមន៍កំណត់តម្លៃទឹក និងភ្លើងឲ្យស្ថិតនៅក្នុងតម្លៃមួយដែលប្រជាពលរដ្ឋអាចទទួលយកបាននៅក្នុងកាលៈទេសៈនេះ។

ចំណែកតារាសម្ដែង សួង សាខារ៉ានីត វិញ បានស្នើសុំឲ្យសម្ដេចជួយអន្តរាគមន៍ចំនួន៣ចំណុច។ ទី១ សុំផ្អាកការបង់រំលស់ផ្ទះទាំងជាមួយបុរីផ្ទាល់ និងជាមួយធនាគារមួយរយៈពេលខ្លី គឺផ្អាកបង់ទាំងការទាំងដើម។ ទី២ សុំផ្អាកបង់ថ្លៃទឹក និងថ្លៃភ្លើងមួយរយៈ។ និងទីទី៣ នាងសុំឲ្យផ្អាកការបង់ថ្លៃបន្ទប់ ឬផ្ទះជួលមួយរយៈពេលសិន ហើយការអនុវត្តបង់ថ្លៃដូចដើមនឹងចាប់ផ្ដើមនៅពេលស្ថានភាពជំងឺកូវីដ-១៩ បានធូរស្រាល។

ទាំងតារាសម្ដែង សួង សាខារ៉ានីត និងម៉ា នីតា សុទ្ធតែអះអាងដូចគ្នាថា ផលប៉ះពាល់ផ្នែកសេដ្ឋកិច្ចនេះ មិនមែនកើតមានតែចំពោះរូបពួកនាងនោះទេ គឺប៉ះពាល់ដល់ប្រជាពលរដ្ឋទូទៅ។ តារាខ្មែរទាំងពីរដួងនេះ ស្នើសុំសម្ដេច ពិចារណា និងអន្ដរាគមន៍លើចំណុចដែលបានលើកឡើងទាំងនេះ ខណៈដែលបញ្ហាជំងឺកូវីដ-១៩ នៅតែអូសបន្លាយ៕

អត្ថបទ៖ Chin Sopheak