សាយ សៀរ៉ា ទើបទទួលបានឱកាសសម្ដែងជាតួអង្គឯក តែធ្លោយមាត់ថាលោកកំពុងភ័យខ្លាចទៅវិញ

2021-06-21 07:28:23
ព័ត៌មាន

2021-06-21 07:28:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ទទួលបានឱកាសសម្ដែងជាតួអង្គឯក គាប់ជួននឹងឱកាសការងារសិល្បៈផ្នែកផ្សេងៗមិនដំណើរការផង សាយ សៀរ៉ា ក៏បានសម្រេចចិត្តទទួលថតខ្សែភាពយន្តមួយរបស់ស្ថានីយទូរទស្សន៍ប៉ុស្តិ៍លេខ៥ គឺរឿង"ស្រមោលជីវិត" ប៉ុន្ដែលោកបែរជាមានអារម្មណ៍ភ័យខ្លាចទៅវិញក្រោយថតបានបី ឬបួនភាគ។

តារាសម្ដែងវ័យកណ្ដាលរូបសង្ហា សាយ សៀរ៉ា បានប្រាប់Sabay នៅរសៀលថ្ងៃទី២១ ខែមិថុនា នេះថា អ្វីដែលលោកខ្លាចបំផុតនោះ គឺខ្លាចឆ្លងជំងឺកូវីដ-១៩។ លោកថាគ្រប់ឈុតឆាកដែលលោកសម្ដែងប៉ុន្មានឈុតមកនេះ គឺថតតែនៅអហ្វីស ស្ទូឌីយោ និងទីតាំងមិនសូវមានមនុស្សប៉ុណ្ណោះ។

សាយ សៀរ៉ា៖"ខ្ញុំសម្រេចទទួលថតហ្នឹងតាំងពីខែ៥ណោះ ឥឡូវកំពុងថតបណ្ដើរភ័យបណ្ដើរ តែធ្វើម៉េចយើងទទួលគេហើយ ហើយម្យ៉ាងយើងក៏ខ្វះខាត ព្រោះត្រូវចំណាយច្រើន...ដល់ពេលយើងនៅផ្ទះរហូតអីចឹងថ្លៃទឹក ភ្លើងឡើង ហើយចំណាយលើសាំងឡានផងអីផងយើងរត់អត់ចង់រួច ព្រោះគាំងជិត២ឆ្នាំហើយ"។

សាយ សៀរ៉ា គឺជាតារាសម្ដែងប្រុសវ័យកណ្ដាលសែលនៅតែមានប្រជាប្រិយភាពក្នុងចង្កោមអ្នកសិល្បៈ ប៉ុន្ដែចំពោះការងារសិល្បៈវិញលោកក៏ជួបបញ្ហាដូចតារាដទៃដែរ គឺមិនអាចចេញសម្ដែង ឬច្រៀងបានពេញលេញជិត២ឆ្នាំហើយ ដោយសារបញ្ហាឆ្លងរាតត្បាត នៃជំងឺកូវីដ-១៩។ បើតាមលោក សាយ សៀរ៉ា នៅអំឡុងពេលដែលលោកទទួលថតរឿងនេះក៏មានផលិតកម្មមួយផ្សេងទៀតហៅលោកឲ្យថតដែរ តែលោកបដិសេធ ព្រោះលោកមិនចង់ប្រឈម នៃការឆ្លងជំងឺកូវីដខ្លាំងជាងនេះ៕

អត្ថបទ៖ ជិន សុភ័ក្ដ្រ