- 2021-09-26 01:01:00
- ព័ត៌មាន
ក្រោយផ្ទុះរឿងពេជ្រជាមួយគ្នា ឥឡូវ សួស វីហ្សា បោះកន្លះលានវិនិយោគជាមួយ ទ្រី ដាណា តែមិនមែនលក់ពេជ្រទេ!
- 2021-09-26 01:01:00
- ចំនួនមតិ 0 | ចំនួនចែករំលែក 0
ក្រោយផ្ទុះរឿងពេជ្រជាមួយគ្នា ឥឡូវ សួស វីហ្សា បោះកន្លះលានវិនិយោគជាមួយ ទ្រី ដាណា តែមិនមែនលក់ពេជ្រទេ!
ចន្លោះមិនឃើញ
សួស វីហ្សា និងស្វាមី នៅព្រឹកថ្ងៃមិ្សលមិញនេះ បានបោះលុយកន្លះលានដុល្លារ វិនិយោគជាមួយលោកស្រី ទ្រី ដាណា តែមិនមែនវិនិយោគលើជំនួញពេជ្រនោះទេ។
ការវិនិយោគដ៏សម្បើមនេះ បន្ទាប់ពីប៉ុន្មានថ្ងៃមុន សួស វីហ្សា បានផ្ទុះកក្រើកតាមរយៈការ Live លើហ្វេសប៊ុករបស់នាង និងស្វាមី។ បញ្ហានោះលោកស្រី ទ្រី ដាណា ពោលថា ពួកគេបានទទួលលាភសំណាងក្រោយទិញគ្រឿងពេជ្ររបស់លោកស្រី។ ប៉ុន្តែអ្នកតាមដាន ថាពួកគេលេងល្ខោនដើម្បីទាក់ទាញចំណាប់អារម្មណ៍ជាមួយគ្នា។
បន្តពីនោះមិនប៉ុន្មានថ្ងៃ វីហ្សា បានចេញមកសរសេរនៅលើហ្វេសប៊ុករបស់នាង ដោយលើកឡើងពីការមិនអស់ចិត្តដែលប្រិយមិត្តមួយចំនួនយល់ច្រឡំថានាងសម្ដែង។ ដូច្នោះហើយ នៅក្នុងសារវែងអន្លាយ តារាស្រី បានឲ្យតម្រុយថា ថ្ងៃណាមួយ នាង និងលោកស្រី ទ្រី ដាណា វិនិយោគជាមួយគ្នាពិតមែន តើប្រិយមិត្តគិតថានាងសម្ដែងទៀតឬយ៉ាងណា?។
ស្រាប់តែព្រឹកម្សិលមិញនេះ រឿងនោះក៏លេចឡើងមកច្បាស់ ក្រោយ សួស វីហ្សា និងស្វាមី រួមជាមួយលោកស្រី ទ្រី ដាណា បានប្រកាសពីការចាប់ដៃគូវិនិយោគរួមគ្នាតែម្ដង។ យ៉ាងណា នោះមិនមែនជាការវិនិយោគលើអាជីវកម្មពេជ្រនោះទេ ប៉ុន្តែជាការវិនិយោគ លើផលិតផលបំប៉នសុខភាពប្រភេទសារ៉ាយសមុទ្រមួយប្រភេទនាំចូលពីសហរដ្ឋអាមេរិក។
ចំពោះរឿងនេះ ថៅកែស្រី ទ្រី ដាណា បានឲ្យដឹងថា លោកស្រីបានតាមមើលគូស្វាមីភរិយាមួយគូនេះយូរហើយ។ លោកស្រីថា វីហ្សា និង ថមមី ជាគូស្វាមីភរិយាមានចរិតល្អ មានការតស៊ូ ដាក់ចិត្តដាក់កាយក្នុងការរកស៊ី ពិសេសពួកគេមិនដែលមានរឿងមិនល្អជាមួយនរណា។ ទាំងនេះ ដែលនាំឲ្យលោកសម្រេចទទួលយកពួកគេទាំងពីរ ខណៈកន្លងមកមានចង់មកវិនិយោគជាមួយលោកស្រីជាច្រើននាក់ ប៉ុន្តែមិនទទួលបានភ្លើងខៀវព្រោះលោកស្រី មិនមែនចេះតែរើសដៃគូស្មានៗនោះទេ។
ងាកមក គូស្វាមីសិល្បករវ័យក្មេងវិញ ពួកគេលើកឡើងថា គ្រប់យ៉ាងដែលកើតឡើង គឺដោយសារនិស្ស័យ ត្បិតថាពួកគេ និងលោកស្រី ទ្រី ដាណា គឺស្គាល់គ្នារយៈពេលខ្លីប៉ុណ្ណោះ ប៉ុន្តែអាចឈានដល់កិច្ចព្រមព្រៀងពាណិជ្ជកម្មដ៏ធំជាមួយគ្នា ទាំងមិនគួរឲ្យជឿ។ ដូច្នេះហើយ ពួកគេមោទកភាព និងរីករាយបំផុត ចំពោះផ្លែផ្កានៅក្នុងពេលនេះ។
តាមលោកស្រី ទ្រី ដាណា កិច្ចព្រមព្រៀងរួមគ្នានាពេលនេះ គូស្វាមីភរិយាសិល្បៈវ័យក្មេង បានបោះទុនចំនួន ៥០ម៉ឺនដុល្លារជាមួយលោកស្រី ក្នុងការនាំអាហារបំប៉នសុខភាពចូលទៅកាន់ទីផ្សារ។ "ឥឡូវនេះ ពួកគាត់បានបោះទុនជាមួយខ្ញុំ ចំនួន ៥០ម៉ឺន...តែខ្ញុំចង់ប្រាប់ថា នេះគ្រាន់ជាជំហានទី១ប៉ុណ្ណោះ ប៉ុន្តែយើងនៅកិច្ចការច្រើនទៀតដែលត្រូវធ្វើជាមួយគ្នា!”។
សួស វីហ្សា និងស្វាមី ត្រូវបានគេដឹងថា បច្ចុប្បន្នពួកគេបានលូកកាន់តែជ្រៅទៅក្នុងមុខជំនួញ ខណៈគេដឹងថា ពួកគេមានអាជីវកម្មផ្ទាល់ខ្លួនជាច្រើន។ ប៉ុន្តែការដែលពួកគេមកចាប់ដៃរកស៊ីជាមួយលោកស្រី ទ្រី ដាណា ពេលនេះ ក៏ព្រោះតែ វាស្ថិតនៅក្នុងកន្លងតែមួយនៃអាជីវកម្មរបស់ពួកគេ ម្យ៉ាងពួកគេមានទំនុកចិត្តចំពោះអាហារបំប៉នប្រភេទសារ៉ាយសមុទ្រមួយនេះ របស់សេដ្ឋីនី៕