អ៊ិន សុខលីដា តារាស្រីស្អាតដែលមានរូបរាងស្អាតសមសួនអត់ទាស់ បាត់មុខរាប់ឆ្នាំ តាមពិតកំពុងរស់នៅឯនាយសមុទ្រ

2021-10-13 04:03:51
ព័ត៌មាន

2021-10-13 04:03:51
ចំនួនមតិ 0 | ចំនួនចែករំលែក 0

ចន្លោះមិនឃើញ

អ៊ិន សុខលីដា គឺជាតារាស្រីមួយរូបដែលមានរូបរាងអំណោយផលល្អកម្ររកបាន ពោលគឺស្អាតសមសួនល្អទាំងព្រម។ នាងបានមុខពីសិល្បៈប្រមាណ ១០ឆ្នាំមកហើយ ដោយឥឡូវទើបដឹងថា នាងកំពុងរស់នៅសហរដ្ឋអាមេរិកជាមួយស្វាមី និងកូនម្នាក់។

សម្អាងលើរូបរាងអំណោយផលនោះ លីដា ត្រូវបានគេដឹងថាជាដៃគូសម្ដែងសាកសមបំផុតមួយជាមួយលោក ព្រាប សុវត្ថិ ដែលគេអាចរកឃើញការសម្ដែងរបស់ពួកគេនៅក្នុងបទចម្រៀងមួយចំនួនរបស់កំពូលតារាចម្រៀងប្រុស មានដូចជាបទ "ស្រក់ទឹកភ្នែកពីភ្នំពេញដល់បាត់ដំបង" និងបទ "យំឲ្យធ្លាយទ្រូង" ជាដើម។

ក្រៅពីនោះនាងក៏បានចូលរួមសម្ដែងក្នុងខ្សែភាពយន្ត និងបទចម្រៀងរបស់ផលិតកម្មជាច្រើនទៀត។ ប៉ុន្តែក្រោយពីបានសាងកេរ្តិ៍ឈ្មោះឲ្យទទួលបានការចាប់អារម្មណ៍ខ្លាំងក្នុងរយៈពេលខ្លី ស្រីស្អាត លីដា ក៏បានបាត់មុខឈឹងពីការសម្ដែងនានា។ ចុងក្រោយនេះ ក៏ដឹងថា នាងបាន និងកំពុងរស់នៅសហរដ្ឋអាមេរិក។

តាមការបញ្ជាក់របស់សាមីខ្លួន បានឲ្យដឹងថា នាងបានចាកចេញពីកម្ពុជាមករស់នៅសហរដ្ឋអាមេរិកក្នុងឆ្នាំ ២០១០ មកដល់បច្ចុប្បន្ន។ លីដា ត្រូវបានគេមើលឃើញថា នាងរស់នៅយ៉ាងមានសុភមង្គលជាមួយស្វាមី និងកូន ក្នុងជីវភាពយ៉ាងសមរម្យ។ ចំណុចនេះ អតីតតារាស្រី បានសរសើរសំណាងខ្លួនឯងដែលជួបប្រសព្វជាមួយស្វាមីរបស់នាងនាពេលបច្ចុប្បន្ន។

នាងថ្លែងថា "ជីវិតរស់នៅប្រទេសអាមេរិករបស់ខ្ញុំមានសំណាង ក៏ដោយសារស្វាមុីរបស់ខ្ញុំ! បើគ្មានគាត់ទំនុកបម្រុងនឹងណែនាំផ្លូវ និងការខិតខំប្រឹងប្រែងធ្វើការទាំងពីរនាក់ប្តីប្រពន្ធ ក៏យើងគ្មានថ្ងៃនេះដែរ!”។

អ៊ិន សុខលីដា គឺជាអតីតបវរកញ្ញាទេសចរណ៍ឆ្នាំ ២០០៣ ហើយនាងបានផ្ដើមអាជីពសិល្បៈទាំងដែលខ្លួនគ្មានជំនឿ និងមិនបានព្រៀង។ លីដា ប្រាប់ថា នាងមិនមានទេពកោសល្យក្នុងការសម្ដែងទេ និងក៏មិនចង់សម្ដែងដែរ ប៉ុន្តែភាពចៃដន្យបាននាំនាងដើរលើវិថីសិល្បៈ។

"បន្ទាប់មកពីប្រឡងបវកញ្ញាអន្តរជាតិនៅប្រទេសម៉ាឡេសុី វិញក៏មានការចុះផ្សាយព្រោងព្រាតពីខាងទស្សនាវដ្ដី កាសែត...ថ្ងៃមួយក៏មានខាងក្រុមហ៊ុនមួយអញ្ជើញខ្ញុំទៅធ្វើ Even ជាមួយបងប្រុស ព្រាប សុវត្ថិ. ពេលនោះបងប្រុស ព្រាប សុវត្ថិ បានសាកសួរចង់អញ្ជើញខ្ញុំអោយចូលរួមថតបទចំរៀងរបស់គាត់! ខ្ញុំប្រាប់គាត់ថាខ្ញុំអត់ចេះសម្តែងទេ! តែគាត់ចង់អោយខ្ញុំសាកល្បងសិនទៅ!”។

ក្រោយបានការលើកទឹកចិត្តពីលោក ព្រាប សុវត្ថិ រួចមក សុខលីដា ក៏បានបោះជំហានចូលការសម្ដែង ដោយបានសម្តែងខារ៉ាអូខេលើកដំបូងជាមួយកំពូលតារាប្រុសក្នុងបទ "ស្រក់ទឹកភ្នែកពីភ្នំពេញទៅបាត់ដំបង" បន្ទាប់ពីនោះក៏បានបន្តសម្តែងជាច្រើនអោយផលិតកម្មក្នុង និងក្រៅស្រុក។

ក្រោយពីកសាងកេរ្តិ៍ឈ្មោះធ្វើឲ្យគេចាប់អារម្មណ៍ អ៊ិន សុខលីដា បានបន្សាត់ខ្លួនចេញពីសិល្បៈអំឡុងឆ្នាំ ២០១០ ទៅរស់នៅសហរដ្ឋអាមេរិក និងបានជួបប្រសព្វនឹងស្វាមីដែលនាងអះអាងថា ជាផ្ដល់សំណាងថ្មីមកឲ្យនាង។ បច្ចុប្បន្ន អ៊ិន សុខលីដា មិនបានបន្តអាជីពសិល្បៈទៀតទេ ប៉ុន្តែនាងជាម្ចាស់អាជីវកម្មផលិតផលថែរក្សាសម្រស់មួយ ដែលធានាដល់ជីវភាពរបស់នាង និងក្រុមគ្រួសារអាចរស់នៅសុខស្រួលបាន៕