- 2022-01-16 04:27:07
- ព័ត៌មាន
កតញ្ញូបំផុត! ឱក សុគន្ធកញ្ញា ទៅក្រាបសំពះដល់បាតជើងដឹងគុណអ្នកមានគុណទី ២ ក្នុងថ្ងៃពិសេស
- 2022-01-16 04:27:07
- ចំនួនមតិ 0 | ចំនួនចែករំលែក 0
កតញ្ញូបំផុត! ឱក សុគន្ធកញ្ញា ទៅក្រាបសំពះដល់បាតជើងដឹងគុណអ្នកមានគុណទី ២ ក្នុងថ្ងៃពិសេស
ចន្លោះមិនឃើញ
ទោះបីពេលនេះ ឱក សុគន្ធកញ្ញា គឺជាតារាចម្រៀងយុវវ័យ ប៉ុន្តែយ៉ាងណាអ្នកនាងក៏ជាអតីតនាថការីរបាំបុរាណម្នាក់ ដែលទទួលបានការបណ្ដុះបណ្ដាលពីលោកគ្រូ អ្នកគ្រូជាច្រើននាក់។ គុណដែលលោកទាំងអស់មានចំពោះនាង កញ្ញាពិតជាចងចាំ និងតែងគោរពដឹងគុណគ្រប់ពេល។
ដូចកាលពីថ្មីៗនេះ ស្ថិតក្នុងពិធីចម្រើនជន្មាយុរបស់វីរសិល្បករ ព្រឿង ឈាង តារាចម្រៀង ឱក សុគន្ធកញ្ញា ក៏បានទៅចូលរួម និង សម្ដែងការគោរពដោយស្មោះទៅកាន់លោក ក៏ដូចជាលោកគ្រូ អ្នកគ្រូផ្សេងទៀតដែលបានបង្ហាត់បង្រៀននាង និងកូនខ្មែរជាច្រើននាក់ទៀតនូវមូលដ្ឋានគ្រឹះ និងធ្វើជាប្រទីបបំភ្លឺផ្លូវ ឈានមករកភាពជោគជ័យរៀងៗខ្លួនដូចថ្ងៃនេះ។
រូបភាពជាច្រើនសន្លឹកត្រូវបានបង្ហោះ ដោយក្នុងនោះ កញ្ញា ក៏បានសរសេរនូវអារម្មណ៍ពិតចេញពីការគោរពស្រឡាញ់ដ៏ខ្ពង់ខ្ពស់ចំពោះ លោកគ្រូអ្នកគ្រូទាំងអស់ដែលនាងចាត់ទុកជាឪពុកម្ដាយទី ២របស់ខ្លួនដែរថា៖ «ក្នុងនាមកូនជាសិល្បៈការិនីមួយរូបនិងជាអតីតនាថការីរបាំ កូនពិតជារំភើបសម្រាប់ថ្ងៃនេះដែលកូនបានមានឱកាសក្រាបសំពះស្រង់ទឹកជូនលោកគ្រូដែលជាឳពុកម្តាយទី២ជាការគោរពដឹងគុណបំផុតនូវការលះបង់ស្ទើរពេញមួយជីវិតដើម្បីសិល្បៈវប្បធម៍ជាតិនិងជាពិសេសបង្ហាត់បង្រៀន ផ្ទេរចំណេះជំនាញដល់សិស្សៗគ្រប់រូបឥតហត់នឿយទោះលោកមានព្រះជន្មច្រើនហើយក៏ដោយ។ ថ្ងៃនេះកូនពិតជារំភើបដែលបានរួមចំណែកក្នុងកម្មវិធីចម្រើនព្រះជន្មលោកគ្រូក៏ដូចជាការគោរពដឹងគុណគ្រូដ៏មានអត្ថន័យបំផុត កូនសូមបួងសួងវត្ថុសក្តិសិទ្ធិក្នុងលោកតាមបីបាច់ថែរក្សាលោកគ្រូអ្នកគ្រូជាវីរសិល្បករជា"មរតកមនុស្សរស់" សូមលោកមានសុខភាពល្អបរិបូរណ៍ អាយុយឺនយូរ ជាម្លប់នៃកូនៗជាសិល្បករបន្តវេណនិងក្នុងបុព្វហេតុរក្សាវប្បធម៌នៃដួងព្រលឹងជាតិខ្មែរ។ ឆ្លៀតក្នុងឱកាសនេះកូនសូមគោរពអរគុណ និងគោរពដឹងគុណអ្នកគ្រូឃួន អ្នកគ្រូមុំ និងលោកគ្រូអ្នកគ្រូទាំងអស់ដែលលោកបានបង្ហាត់បង្រៀនខ្ញុំ ដែលលោកទាំងអស់ ជាប្រទីបបំភ្លឺផ្លូវជាការផ្តល់មូលដ្ឋានគ្រឹះ និងជាចំណែកដ៏ធំដែលធ្វើអោយកូនមានថ្ងៃនេះ ។ កូននឹងចងចាំនូវរាល់បណ្តាំលោកគ្រូអ្នកគ្រូ រួមថែរក្សាសិល្បៈ វប្បធម៌ ក្នុងទម្រង់ជាខ្មែរ " បុរាណមិនយឺត សម័យមិនបរទេស" ដោយក្តីគោរពដឹងគុណពីកូន ១៥.០១.២០២២»។
ជាការពិត ឱក សុគន្ធកញ្ញា ឈានជើងចូលសិល្បៈដំបូង គឺត្រឹមជាកុមារីតូចដែលហាត់រៀនរាំរបាំបុរាណ ក្រោមការបណ្ដុះបណ្ដាលពីលោកគ្រូអ្នកគ្រូ មានន័យថាកុមារភាពរបស់នាងគឺនៅជាមួយសិល្បៈបុរាណរាល់ថ្ងៃ។ រហូតដល់ចម្រើនវ័យបន្តិច នាងក៏បានចូលប្រឡូកក្នុងវិស័យចម្រៀង ផ្អែកលើដុងមានពីកំណើតផង ហើយក៏តស៊ូពុះពារគ្រប់ឧបសគ្គ ជម្នះទាល់តែបានក្លាយជាតារាចម្រៀងក្នុងចិត្តយុវវ័យ និងល្បីឈ្មោះមិនធម្មតាដូចបច្ចុប្បន្ននេះ៕