តារាសម្ដែង ជុំ ស៊ីថា ព្យាយាមលាក់៣ឆ្នាំ មិនឲ្យគេដឹងលោកជាប៉ូលីសចរាចរណ៍
សប្ដាហ៍មុន Sabay បានចុះផ្សាយអត្ថបទមន្ទិលចំពោះតារាសម្ដែង "ជុំ ស៊ីថា មិនត្រឹមជាតារាសម្ដែងថែមទាំងជាប៉ូលិសចរាចរណ៍ទៀត?”។ ថ្មីៗនេះ ក្រុមការងារយើងបានចុះមកជួបដល់កន្លែងផ្ទាល់ ហើយលោកបានបញ្ជាក់ផ្ទាល់មាត់ថាលោកពិតជាប៉ូលិសពិតប្រាកដមែន ដោយបានចូលបម្រើការងារ៣ឆ្នាំហើយ ប៉ុន្តែលោកព្យាយាមលាក់មិនឲ្យគេដឹងឡើយ ដោយទើបតែបើកចំហរនារយៈពេលចុងក្រោយប៉ុណ្ណោះ។
សម្រាប់មូលហេតុ តារាសម្ដែងរូបនេះ ប្រាប់ទៀតថា លោកមានអារម្មណ៍ខ្មាស់អៀន ស្របនឹងឃើញប្រជាពលរដ្ឋយើងមួយចំនួន មិនចូលចិត្តប៉ូលិសចរាចរណ៍ផង។ លោកឲ្យដឹងទៀតថា ឆ្លងតាមរយៈការងារ៣ឆ្នាំនេះ លោកបានជួបទាំងអ្នកដែលយល់ពីច្បាប់ និងអ្នកដំណើរមិនយល់ពីច្បាប់ចរាចរណ៍ ថែមទាំងពេលខ្លះប្រើសម្ដីមិនសមរម្យមកលើពួកលោកទៀត។
“ការចុះអនុវត្តច្បាប់ ឬជួយសម្រួលចរាចរណ៍មានផលលំបាកច្រើន ជាពិសេសខែនេះអាកាសធាតុក្ដៅ និងមានបងប្អូនខ្លះយល់ច្បាប់ចរាចរណ៍ តែបែរជាមកមាក់ងាយប៉ូលិសវិញ តែក៏មានបងប្អូនខ្លះគេយល់ដឹងដែរ។”
លោកបន្តទៀតថាបើទោះជាជួបការលំបាកច្រើនលោកក៏មិនបោះបង់អាជីពមួយនេះដែរ ព្រោះជាក្ដីស្រមៃតាំងពីក្មេង និងចង់ជួយដល់ប្រជាជនខ្មែរទាំងអស់។ លោកក៏សំណូមពរថាឲ្យប្រជាពលរដ្ឋទាំងអស់មេត្តាគោរពច្បាប់ចរាចរណ៍ឲ្យបានខ្ជាប់ខ្ជួន ដើម្បីជៀសវាងការគ្រោះថ្នាក់។ ម្យ៉ាងវិញទៀតសូមកុំស្អប់ប៉ូលិសចរាចរណ៍ទាំងអស់អី ព្រោះមានអ្នកល្អច្រើនជាងអ្នកអាក្រក់៕
អត្ថបទ៖ទ្រី រ៉ាវី
