មាន សូនីតា ស្ទើរស្រក់ទឹកភ្នែក ថ្លើមស្រុតដល់ដី ពេលឃើញទិដ្ឋភាពលោកនៅវត្ត១នាខេត្តកំពង់ឆ្នាំង

2020-04-30 04:12:42
ព័ត៌មាន

2020-04-30 04:12:42
ចំនួនមតិ 0 | ចំនួនចែករំលែក 0

ចន្លោះមិនឃើញ

រាជិនីក្រមា មាន សូនីតា រួមជាមួយម្ដាយនៅព្រឹកនេះ បាននាំយកចង្ហាន់ និងគ្រឿងឧបភោគ បរិភោគមួយចំនួនទៀតទៅវេរប្រគេនព្រះសង្ឃនៅវត្តមួយស្ថិតនៅក្នុងទឹកដីខេត្តកំពង់ឆ្នាំង ជាទីដែលនាងអះអាងថា នាងស្ទើរស្រក់ទឹកភ្នែក ឯថ្លើមស្រុតចុះដល់ដី ក្រោយទិដ្ឋភាពព្រះសង្ឃគង់នៅវត្តមួយនេះ។

"ពេលទៅដល់ភ្លាមឃើញលោកឆុងមីកញ្ចប់ ១អង្គ ឃើញហើយចង់ស្រក់ទឹកភ្នែក ស្រុតថ្លើមដល់ដី" នីតា ថ្លែង។វត្តដែលស្ថិតនៅលើខេត្តជាទឹកដីនាងកង្រី មានឈ្មោះថា "វត្តទួលមេត្រី" ដែលពេលនេះ ព្រះសង្ឃស្ទើរដាច់ចង្ហាន់ ដោយព្រះសង្ឃដែលឃើញមានទាំងចាស់ និងកូននេនតូចៗផងនោះ គឺឆាន់តែមីកញ្ចប់ប៉ុណ្ណោះ។

តារាស្រីបានបញ្ជាក់ថា នាងបានដឹងដំណឹងពីវត្តនេះតាមរយៈអ៊ុំរបស់នាងម្នាក់ដែលធ្លាប់ទៅដល់វត្តនេះតាំងពីច្រើនឆ្នាំមកហើយ និងបានដឹងថា វត្តមានខ្សត់ណាស់ទើបសម្រេចនាំអ្នកម្ដាយរបស់នាងទៅធ្វើបុណ្យសន្សំកុសលម្ដងទៀតនៅថ្ងៃនេះ និងបានឃើញទិដ្ឋភាពជាក់ស្ដែងផ្ទាល់ភ្នែកធ្វើឲ្យនាងសង្វេគចិត្តតែម្ដង។ តាម នីតា វត្តនេះខ្សត់ខ្សោយស្រាប់ លុះមកដល់បច្ចុប្បន្ន ជាកាលៈទេសៈ ខូវីដ ១៩ រាតត្បាតទៀត រឹតតែខ្សត់ថែមទៀត។

បញ្ហានេះ ម្ចាស់គម្រោង "ស្រឡាញ់" ឲ្យដឹងថា ដោយសារភ័យខ្លាច Covid-19 វត្តនេះ មិនមានឧបាសក ឧបាសិកាចំណុះជើងវត្តដាក់វេនទេ ទើបជាហេតុធ្វើឲ្យលោកខ្វះចង្ហាន់។ ជាក់ស្ដែងពេលដែលនាងទៅដល់ព្រឹកនេះ គឺព្រះសង្ឃ និងយាយជីផង ឆាន់ និងពិសាតែមីស្រុះម្នាក់១កញ្ចប់ប៉ុណ្ណោះ។

មាន សូនីតា និងម្ដាយបានទៅដល់វត្ត "ទួលមេត្រី" នៅព្រឹកនេះ ដោយមុនពេលទៅដល់ នាងបានជួបរឿងជាច្រើន ដោយសារតែនាងមិនបានស្គាល់ទីតាំងភូមិសាស្ត្រច្បាស់លាស់។ ដោយសារតែបែបនេះ នាងបានចំណាយពេលយ៉ាងច្រើន សួរនាំគេគ្រប់គ្នា ទម្រាំអាចតែអាចនាំផ្លូវម្ដាយទៅដល់វត្តគោលដៅបាន ដោយស្ទើរផុតចង្ហាន់លោកថែមទៀត។

ប៉ុន្តែយ៉ាងណា ដូចធ្វើបុណ្យចំខែភ្លឺ ព្រោះជាក់ស្ដែង នាងបានទៅទាន់ចង្ហាន់ ពិសេសបានធ្វើបុណ្យដោយចិត្តជ្រះថ្លាជាមួយវត្តដ៏ខ្សត់ខ្សោយមួយនេះ។ សូនីតា និងម្ដាយបានប្រគេនចង្ហាន់ និងគ្រឿងឧបភោគ បរិភោគមួយចំនួនជូនព្រះសង្ឃ ទុកដោះស្រាយការលំបាកនៅក្នុងកាលៈទេសៈដ៏លំបាកនេះ។ ជាមួយគ្នា នាងបានអំពាវនាវដល់ពុទ្ធបរិស័ទទាំងឡាយ សូមទៅសាងកុសលជាមួយវត្តខាងលើបាន ដោយទំនាក់ទំនងតាមលេខទូរស័ព្ទ ០១២ ៥៦៣ ៦០១៕