- 2020-05-19 06:22:04
- ព័ត៌មាន
បកស្រាយលម្អិតជុំវិញព័ត៌មានតារា ៤នាក់ចូលក្លឹបនៅ Itaewon តំបន់កំពុងផ្ទុះករណីឆ្លង COVID-19
- 2020-05-19 06:22:04
- ចំនួនមតិ 0 | ចំនួនចែករំលែក 0
បកស្រាយលម្អិតជុំវិញព័ត៌មានតារា ៤នាក់ចូលក្លឹបនៅ Itaewon តំបន់កំពុងផ្ទុះករណីឆ្លង COVID-19
ចន្លោះមិនឃើញ
វិបសាយព័ត៌មានធំរបស់កូរ៉េ Dispatch បានលើកឡើងថាតារាប្រុស ៤នាក់មានដូចជា Jungkook (ក្រុម BTS), Cha Eunwoo (ក្រុម ASTRO), Jaehyun (ក្រុម NCT) និង Mingyu (ក្រុម SEVENTEEN) បានចេញក្រៅ ដើរចូលក្លឹបក្នុងតំបន់ Itaewon កន្លែងដែលកំពុងផ្ទុះការឆ្លងមេរោគ COVID-19 ពេញទំហឹងនាពេលនេះ។
នៅថ្ងៃទី១៨ ខែឧសភា ឆ្នាំ ២០២០ Dispatch បានចេញផ្សាយព័ត៌មានថាសមាជិករបស់ BTS, NCT, ASTRO និង SEVENTEEN ខាងលើ បានទៅក្លឹបកម្សាន្តនៅកន្លែងផ្សេងៗគ្នានៅក្នុងតំបន់ Itaewon ស្របពេលដែលជំងឺឆ្លង COVID-19 កំពុងវាយលុកខ្លាំងនៅទីនោះ។
ប្រភពព័ត៌មានបានបញ្ជាក់ថា តារាប្រុសទាំង ៤បានទៅភោជនីយដ្ឋាន និងក្លឹបកម្សាន្ត ២កន្លែងទៀតនៅម្ដុំ Itaewon កាលពីថ្ងៃទី ២៥ និង ២៦ខេមេសាកន្លងទៅ។ ជាមួយគ្នានោះក៏មានការឲ្យដឹងដែរ ថាអ្នកទាំង ៤ក៏បានធ្វើតេស្តសុខភាពដែរ ហើយលទ្ធផលចេញមកគឺ អវិជ្ជមាន មិនមានអ្វីគួរឲ្យបារម្ភឡើយ។ ប៉ុន្តែបើយោងតាមច្បាប់ អ្នកដែលបានចេញទៅក្លឹបនៅ Itaewonពីថ្ងៃទី ២៤ ខែមេសា ដល់ទី ០៦ ខែឧសភា ត្រូវនៅផ្ទះរយៈពេល ១៤ថ្ងៃ មិនអាចចេញទៅណាផ្ដេសផ្ដាសបានទេ។
ទោះជាយ៉ាងណា Cha Eunwoo បានចេញ Promote បទថ្មីជាមួយក្រុមមិនបានសំងំនៅផ្ទះដូចបម្រាមទេ។ ដោយក្នុងនោះរួមមានកម្មវិធី “CulTwo Show”, “Hidden Track”, “Music Bank”, និង “Show! Music Core” ជាដើម។ ចំណែក Jaehyun វិញ ក៏បានទៅធ្វើជាពិធីករដូចធម្មតាក្នុងកម្មវិធី "Inkigako” កាលពីថ្ងៃទី ២៦ ខែមេសា, ថ្ងៃទី០៣ និងទី ១០ខែ ឧសភាកន្លងទៅ។ ចំណែក Jungkook និង Mingyu មិនទាន់មានសេចក្ដីបញ្ជាក់ថាមានចេញមុខចូលរួមកម្មវិធីអ្វីនោះទេ។
យ៉ាងណាមិញ បន្ទាប់ពីមានការផ្សាយព័ត៌មានពី Dispatch ផលិតកម្មរបស់តារាប្រុសទាំង ៤ខាងលើរួមមាន Big Hit, SM, Fantagio និង Pledis ក៏បានចេញសេចក្ដីប្រកាសរៀងៗខ្លួនជាផ្លូវការ ដោយទទួលស្គាល់ថាតារារបស់ពួកគេពិតជាបាន ទៅម្ដុំតំបន់ Itaewon នោះមែន ព្រមទាំងបញ្ជាក់ឲ្យច្បាស់ត្រង់ចំណុចខ្លះ កុំឲ្យមានការយល់ច្រឡំ។
ខាងក្រោមជាការសង្ខេប នូវការប្រកាសរបស់ ផលិតកម្មទាំង ៥៖
១. ផលិតកម្ម Big Hit ពិតជាទទួលស្គាល់ថា Jungkook បានទៅម្ដុំនោះមែន ប៉ុន្តែមិនបានទៅកន្លែងដែលកើតចលាចល កាលពីដើមខែឧសភានោះទេ ព្រោះថា Jungkook បានទៅម្ដុំនោះ១សប្ដាហ៍មុនកើតមានករណីថាមានអ្នកឆ្លង COVID-19 ទៅទៀត។ ជាមួយគ្នានោះ តារាប្រុសរបស់គេរូបនេះក៏បានទទួលយកការធ្វើតេស្តរកមេរោគដែរ លទ្ធផលចេញមកគឺអវិជ្ជមាន។ សម្រាប់សាមីខ្លួនវិញ ក៏មានការសោកស្ដាយចំពោះទង្វើដែលខ្លួនបានធ្វើដែរ។
២. ផលិតកម្ម Pledis ក៏បានសុំទោសនូវរឿងរ៉ាវដែលបានកើតឡើង ដោយសារទង្វើរបស់ Mingyu ដែលធ្វើខុសពីអ្វីដែលរដ្ឋាភិបាលហាមប្រាម។ ប៉ុន្តែភ្លាមៗក្រោយមក លោកក៏បានទៅធ្វើតេស្តដែរ លទ្ធផលគឺអវិជ្ជមាន។ ក្រៅពីនោះផលិតកម្មក៏បានទទួលស្គាល់ថានេះជាការធ្វេសប្រហែសរបស់ថ្នាក់ដឹកនាំផលិតកម្ម ជាហេតុមិនអាចមើលថែតារារបស់ខ្លួនឲ្យបានល្អរហូតមានរឿងបែបនេះ ប៉ុន្តែពួកគេសន្យានឹងប្រយ័ត្នឲ្យបានខ្ពស់ជាងមុន។
៣. ផលិតកម្ម Fantagio វិញ ក៏មិនខុសពីផលិតកម្ម ២ខាងលើដែរ ដោយបានសុំទោសដែល Eunwoo មិនបានគោរពតាមបម្រាមរបស់រដ្ឋាភិបាល ប៉ុន្តែពួកគេបានបញ្ជាក់ថា Eunwoo មិនបានទៅកន្លែងដែលកើតហេតុនោះទេ។ ទោះជាយ៉ាង Eunwoo ក៏ត្រូវធ្វើតេស្តដដែល ដើម្បីឲ្យប្រាកដថាលោកមានសុវត្ថិភាព១០០ភាគរយ។
៤. ផលិតកម្ម SM ក៏ដូចគ្នា ដោយបានសុំទោសដោយផ្ទាល់នូវរឿងដែលបានកើតឡើង។ បន្ថែមពីលើនោះ SM បានបញ្ជាក់ថា Jaehyun ពិតជាបានចេញក្រៅមែនកាលពីថ្ងៃទី ២៥ ខែមេសា ប៉ុន្តែលោកបានទៅភោជនីយដ្ឋាន និងបារមួយកន្លែងនៅជិតនោះប៉ុណ្ណោះ មិនបានទៅកន្លែងដែលមានបញ្ហាទេ។ មួយវិញទៀត ក៏គ្មានរោគសញ្ញាអ្វីបញ្ជាក់ថា Jaehyun កើតអាការៈមិនស្រួលដែរ សរុបមកក្រោយធ្វើតេស្ត លោកមានសុខភាពល្អធម្មតា។ ជាមួយគ្នានោះសាមីខ្លួនក៏បានសុំទោសនូវទង្វើខ្លួនបានធ្វើ ដោយមិនបានពិចារណាល្អិតល្អន់បែបនេះ។ ឯផលិតកម្មវិញ ក៏សន្យាថា មើលថែគ្រប់គ្រងតារារបស់ខ្លួនឲ្យបានល្អជាងមុនទ្វេដង និងមិនឲ្យមានរឿងបែបនេះកើតឡើងម្ដងទៀតនោះទេ៕