- 2020-09-14 03:58:51
- ព័ត៌មាន
ផ្អែកលើ Business Insider គេប៉ាន់ប្រមាណ Galaxy អាចរកចំណូលពី Youtube បានច្រើនណាស់១ខែៗ
- 2020-09-14 03:58:51
- ចំនួនមតិ 0 | ចំនួនចែករំលែក 0
ផ្អែកលើ Business Insider គេប៉ាន់ប្រមាណ Galaxy អាចរកចំណូលពី Youtube បានច្រើនណាស់១ខែៗ
ចន្លោះមិនឃើញ
ផលិតកម្ម Galaxy Navatra ត្រូវបានគេធ្វើការប៉ាន់ប្រមាណថា អាចរកចំណូលបានមិនតិចឡើយក្នុង១ថ្ងៃៗ ក៏ដូចជា ១ខែៗ ស្របពេលដែលផលិតកម្មនេះ បច្ចុប្បន្នមានចំនួនអ្នកចុចតាមដាន (Subscribed) ចំនួន ១,២៧ លាននាក់(តួលេខត្រឹមពាក់កណ្ដាលខែកញ្ញា) និងមានអ្នកចុចចូលទស្សនា និងស្ដាប់បទចម្រៀងរបស់ផលិតកម្មសកម្មរាប់លានដងថែមទៀតក្នុង១ថ្ងៃៗ។
កាលពីចុងសប្ដាហ៍មុន លោក យឹម តាស្រង់ នាយកគ្រប់គ្រងទូទៅ របស់ផលិតកម្មទើបនឹងបានបញ្ចេញតួលេខស្ដីអត្រាចំនួនដងនៃអ្នកចូលទៅក្នុងចុចទស្សនាបទចម្រៀងទាំងឡាយដែលមាននៅលើ Galaxy Navatra Channel ហើយត្រូវបានកត់ត្រាដោយប្រព័ន្ធគ្រប់គ្រងទិន្នន័យរបស់ Youtube។ តាមរបាយ Channel របស់ផលិតកម្មខាងលើនេះ មានចំនួនដងនៃការចូលទស្សនាបទចម្រៀងទាំងអស់ចំនួន 4 424 024(តួលេខថ្ងៃទី ១០កញ្ញា ២០២០)។
នេះជាតួលេខដ៏ខ្ពស់មួយសម្រាប់ Youtube Channel មានមូលដ្ឋាននៅក្នុងស្រុក។ យ៉ាងណា គេមិនទាន់ដឹងថា នេះជាតួលេខខ្ពស់ដាច់គេនៅកម្ពុជានៅឡើយទេ ដោយសារតែមិនមានរបាយការណ៍ដូចគ្នារបស់ Youtube Channel ក្នុងស្រុកដទៃទៀតមកផ្ទៀងផ្ទាត់។ បែបនេះក្ដី តួលេខនេះ បាននាំទៅដល់ការសន្និដ្ឋានថា Galaxy Navatra អាចរកចំណូលមិនតិចឡើយពីសែស្រឡាយអាជីវកម្មរបស់ Google មួយនេះក្នុង១ខែៗ។
មិនមានតួលេខណាមួយអំពីរបាយការណ៍ប្រាក់ចំណូលពីយូធូបរបស់ Galaxy ត្រូវបានបើកបង្ហាញឡើយ។ ប៉ុន្តែឯកសារយោងមួយផ្សេងពីបរទេស អាចបញ្ជាក់ក្នុងភាគរយច្រើនពីករណីនេះ។ បើយោងតាម Business Insider ចុះផ្សាយកាលពីពេលថ្មីៗនេះ បានឱ្យដឹងថា សម្រាប់ Youtube Channel នៅអឺរ៉ុប ចូលមើលដោយមនុស្សនៅអឺរ៉ុប ដែលមានចំនួនអ្នកចូលមើលមានចាប់ពី ១០០០ដងឡើងទៅ ម្ចាស់ Channel អាចទទួលបានប្រាក់កម្រៃជើងសារពីពាណិជ្ជកម្មមានក្នុងវីដេអូនីមួយៗ ជាមធ្យមពី ១.៥ដុល្លារ ទៅ ៣ដុល្លារ ពេលខ្លះអាចលោតដល់ ៧ដុល្លារក៏មាន ទៅតាមប្រភេទពាណិជ្ជកម្ម។
បន្ថែមពីលើនេះ ប្រសិនបើមានការចូលមើលទៅដល់ ១លានដង កម្រៃដែលទទួលបានអាចចាប់ពី ៣ ០០០ដុល្លារអាមេរិក ទៅ១៥ ០០០ដុល្លារក្នុងមួយវីដេអូឯណោះ សម្រាប់យូធូបដែលមានមនុស្សនៅអឺរ៉ុបចូលមើល។ ប៉ុន្តែបើសិនជា Channel ខ្មែរហើយមានអ្នកមើលនៅតែក្នុងស្រុកខ្មែរមើលវិញ គឺមិនមានវាសនាដូចគ្នាឡើយ ពោលគឺបានប្រមាណពី ១៨០ដុល្លារ ដល់ ៣០០ដុល្លារតែប៉ុណ្ណោះក្នុង១វីដេអូ។
យោងលើរបាយការណ៍បរទេសខាងលើនេះ ផលិតកម្ម Galaxy Navatra ដែលមានចំនួនចូលមើលច្រើនជាង ៤លានដង ក្នុង១ថ្ងៃ និងមានអ្នកចុចតាមដាន (Subscribed) ជាង១លាននោះ ផលិតកម្មនេះត្រូវបានគេប៉ាន់ប្រមាណថា ទំនងអាចរកបានប្រមាណ យ៉ាងតិចពី ៥០០-៧០០ដុល្លារក្នុង១ថ្ងៃ និងប្រមាណជាង ១ម៉ឺន-ជាង២ម៉ឺនដុល្លារក្នុង១ខែពី Youtube។
លោក យឹម តាស្រង់ ដែលជាអ្នកបញ្ចេញតួលេខអ្នកចូលទៅក្នុងយូធូបរបស់ Galaxy Navatra ប្រចាំថ្ងៃ កាលពីចុងសប្ដាហ៍មុននោះ ពុំព្រមបញ្ចេញពីតួលេខពិតនៃចំណូលពី Youtube របស់ផលិតកម្មឡើយ។ លោកថា លោកមិនចង់និយាយពីរឿងនេះនោះទេ។
យោងតាមរបាយការណ៍របស់ Business Insider ដដែល បានបញ្ជាក់ដែរថា ក្នុង១ឆ្នាំ YouTuber នៅក្នុងស្រុក ឬ Youtube Channel ក្នុងស្រុកខ្មែរអាចរកលុយពី Youtube បានរហូតដល់ជាង ៥៧,២០០ដុល្លារឯណោះ ឬក៏ច្រើនជាងនេះទៅទៀត ប្រសិនបើមានចំនួនអ្នក Subscribers ឡើងដល់ ១លាននាក់៕