- 2021-03-01 05:00:00
- ព័ត៌មាន
ខ្សែជីវិត Ng Man Tat: ធ្លាប់ល្បីខ្លាំង ធ្លាក់ខ្លួនជាប់បំណុលជុំទិស ញៀនស្រីស្រា រហូតចង់សម្លាប់ខ្លួន
- 2021-03-01 05:00:00
- ចំនួនមតិ 0 | ចំនួនចែករំលែក 0
ខ្សែជីវិត Ng Man Tat: ធ្លាប់ល្បីខ្លាំង ធ្លាក់ខ្លួនជាប់បំណុលជុំទិស ញៀនស្រីស្រា រហូតចង់សម្លាប់ខ្លួន
ចន្លោះមិនឃើញ
កាលពីថ្ងៃទី២៧ ខែកុម្ភៈ ឆ្នាំ២០២១ មានដំណឹងតក់ស្លុតមួយបានផ្ទុះឡើង ទាក់ទងនឹងមរណភាពរបស់តារាសម្ដែងជើងចាស់លោក Ng Man Tat។
តារាប្រុសរូបនេះបានលាចាកលោក ឆ្ងាយពីអ្នកគ្រប់គ្នាលែងវិលត្រឡប់ជារៀងរហូត ក្រោយឈឺរ៉ាំរ៉ៃ ដោយសារជំងឺមហារីកថ្លើម។ ការបាត់បង់តារាសម្ដែងជើងចាស់រូបនេះ បន្សល់ទុកនូវការសោកស្ដាយអាល័យពីក្រុមគ្រួសារ មិត្តភ័ក្តិ និងអ្នកគាំទ្រជាច្រើន។
ងាកចេញពីដំណឹងសោកសៅនេះ បើក្រឡេកទៅជោគវាសនានៃជីវិតការងារ និងជីវិតផ្ទាល់ខ្លួនជាច្រើនទសវត្សកន្លងមកនេះ អ្នកគាំទ្រនឹងកាន់តែច្បាស់ថាលោកជួបរឿងឡើងចុះច្រើនយ៉ាងណា។
លោក Ng Man Tat កើតនៅឆ្នាំ១៩៥៣ ក្នុងក្រុង Xiamen ខេត្ត Fujian ប្រទេសចិន ប៉ុន្តែក្រោយមកពេលមានអាយុ ៧ឆ្នាំ លោក និងគ្រួសារក៏បានប្ដូរទៅនៅទីក្រុងហុងកុងវិញ។ នៅពេលនោះ ស្ថានភាពគ្រួសារត្រូវធ្លាក់ក្នុងសភាពដុនដាបខ្លាំងបំផុត។
ឪពុករបស់លោក Ng សង្ឃឹមថាកូនច្បងរបស់ខ្លួនម្នាក់នេះអាចបន្តរបរតូចរបស់គ្រួសារបាន ប៉ុន្តែលោក Ng បានតាំងចិត្តធ្វើជាតារាសម្ដែងទៅវិញ តបតាមក្ដីសុបិនផ្ទាល់។ លោកបានកុហកឪពុកថារៀនអង់គ្លេសពេលយប់ ប៉ុន្តែតាមពិត លោកលួចទៅចូលរៀនសម្ដែងនៅ TVB សោះ។ ទោះជាយ៉ាងណា ថ្ងៃមួយឪពុកស្រាប់តែឃើញកូនរបស់ខ្លូនក្នុងកញ្ចក់ទូរទស្សន៍ដោយចៃដន្យ ហើយស្រាប់តែខឹងសម្បារជាខ្លាំង។
រៀនចប់ភ្លាម លោក Ng ក៏បានទទួលការងារថតរឿងជាច្រើន តែត្រឹមជាតួរងសិនទេ។ នៅក្នុងឆ្នាំ ១៩៧៩ ដោយសារសមត្ថភាពសម្ដែងរឿង «Chor Lau-heung» លោកក៏ស្រាប់តែល្បីខ្លាំង ដល់ថ្នាក់ល្បីជាងតារាសម្ដែង Chow Yun Fat ទៀតកាលនោះ។ លោក Ng ខ្លួនឯងធ្លាប់បានទម្លាយដែរថា «ពេលនោះគ្រប់ពេលដែលខ្ញុំបើកទ្វារសណ្ឋាគារ តែងមាននារីម្នាក់រង់ចាំខ្ញុំពីក្នុងជានិច្ច»។ នៅអាយុ ២៦ឆ្នាំនោះហើយ ជាពេលដែលលោក Ng ស្គាល់រសជាតិល្បីខ្លាំងបំផុតលើកដំបូងក្នុងឆាកជីវិត។
ដោយសារតែជោគវាសនាតម្រូវឲ្យលោកឡើងកូដលឿន រកលុយបានច្រើនសន្ធឹកសន្ធាប់ក្នុងរយៈពេលដ៏ខ្លី ហើយពេលនោះ ក៏ជាពេលដែលលោកភ្លើតភ្លើនសេពគប់សុទ្ធតែមិត្តមិនល្អ។ លោកចាយលុយដូចជះទឹកចោល គិតតែពីសប្បាយតែមួយមុខគត់ ដោយសារតែលុយរកបានស្រួលៗពេក។ រហូតក្រោយមកច្រើនឆ្នាំ ពេលរម្លឹកទៅពេលនោះ លោក Ng ធ្លាប់បាននិយាយថា វាជាពេលដ៏ខ្មៅងងឹតបំផុតក្នុងជីវិត ព្រោះលោកក្លាយជាមនុស្សប្រមឹក និងចូលចិត្តឲ្យគេលើកតម្កើងខ្លួនឯងរហូត។
លុះក្រោយមក លុយត្រូវអស់ជាបណ្ដើរៗ រហូតលោកត្រូវដល់ពេលដើរខ្ចីលុយគេចាយគ្រប់កន្លែង។ ស្រាប់តែពេលមួយលោកឈ្នះរង្វាន់បានលុយ បែរជាលោកងាកសេពគ្រឿងស្រវឹងជាថ្មី។ ក្រោយមកត្រឹម ១ឆ្នាំប៉ុណ្ណោះ លោក Ng ក្លាយជាមនុស្សមានតែសម្បកខ្លួន ព្រោះលុយដែលខំរកបានមកពីការថតទាំងប៉ុន្មាន ត្រូវរលាយខ្ទេចគ្មានសល់ ហើយមានឈ្មោះជាមនុស្សជាប់បំណុលគ្រប់កន្លែង។ ក្នុងនោះ ក៏ធ្លាប់មានព័ត៌មានផ្សាយថា លោក Ng ធ្លាប់សុំខ្ចីលុយតារាសម្ដែង Chow Yun Fat ដែរ ប៉ុន្តែត្រូវ Yun Fat បដិសេធមិនឲ្យខ្ចី ព្រោះតែលោកចង់ឲ្យលោក Ng ភ្ញាក់ខ្លួនដោយខ្លួនឯង និងចេះទទួលខុសត្រូវនូវអ្វីដែលខ្លួនសាង។ពេលនោះលោក Ng ខឹងលោក Chow ណាស់ តែក្រោយមកច្រើនឆ្នាំ ទើបដឹងការពិតពីបំណងរបស់មិត្តខ្លួនម្នាក់នេះ។ មួយវិញទៀត ស្ថិតក្នុងពេលពិបាកបែបនេះលោក Ng ក៏ធ្លាប់កើតគំនិតចង់បញ្ចប់ជីវិតខ្លួនឯងដែរ។
លោក Ng Man Tatបានប្រើវិធីគ្រប់យ៉ាងត្រឡប់ចូលសិល្បៈវិញ ប៉ុន្តែមិនបានជោគជ័យ រហូតបានជួប Stephen Chow ឬទិនហ្វី ទើបលោកមានក្ដីសង្ឃឹមជាថ្មី ដោយសារទិនហ្វីជួយឲ្យលោកមានការងារសម្ដែងហូរហែ និងបានជោគជ័យជាបន្តបន្ទាប់ជាមួយនឹងស្នាដៃភាពយន្តជាច្រើន។
ប៉ុន្តែបើងាកទៅជីវិតគ្រួសារវិញ ក៏មានរឿងភ្ញាក់ផ្អើលច្រើនគួរសមដែរ។ កាលពីឆ្នាំ ១៩៧៦ លោក Ng បានរៀបការលើកដំបូង និងមានកូនភ្លោះស្រី ២នាក់។ ដោយសារពេលនោះដល់ពេលលោកជួបវិបត្តិរឿងលុយ ទើបប្រពន្ធត្រូវចេញមុខជួយរកលុយបន្ថែម ដើម្បីដោះស្រាយជីវភាពគ្រួសារ ចិញ្ចឹមកូន២នាក់ ក៏ដូចជារកលុយដោះបំណុលប្ដី។ ប៉ុន្តែក្រោយមក ស្រាប់តែលោកសម្រេចលែងលះជាមួយប្រពន្ធទី១ ដោយគ្មានស្រណោះ។
ក្រោយមកលោកបានជួបប្រពន្ធទី២ ដែលជាតារាសម្ដែងរបស់ទូរទស្សន៍ TVB អ្នកស្រី Lo Siuchi ក្នុងឆ្នាំ ១៩៨៩ ហើយនៅជាមួយគ្នាមិនបានប៉ុន្មានក៏មានកូនស្រី ម្នាក់ភ្លាម។ ទោះជាយ៉ាងណា រំលងបានជាង ៣ឆ្នាំក្រោយ ពេលលោក Ng សម្ដែងរឿងថ្មីមួយនៅសិង្ហបុរី លោកក៏បានភ្ជាប់ចំណងស្នេហ៍ជាមួយនឹងតារាសម្ដែងម៉ាឡេស៊ី Hou Shanyan ក្នុងឆ្នាំ ១៩៩៣។ ពួកគេរៀបការជាមួយគ្នានៅឆ្នាំ ១៩៩៦ ហើយមានកូនស្រីប្រុសរួមគ្នា ២នាក់ទៀត។
រហូតដល់ដង្ហើមចុងក្រោយ លោក Ngនៅតែខំប្រឹងសម្ដែង ដើម្បីបានលុយផ្គត់ផ្គង់គ្រួសារ ព្រោះលោកមានបន្ទុកច្រើនពេក។ បណ្ដាញសារព័ត៌មានបានឲ្យដឹងថា កាលលោកនៅមានសុខភាពរឹងមាំ លោករកលុយបាន និងឲ្យប្រពន្ធដល់ទៅ ៨សែនដុល្លារហុងកុង (ខ្ទង់ ១០៣ ១៣៦ដុល្លារអាមេរិក) ប៉ុន្តែពេលសុខភាពចាប់ផ្ដើមទន់ខ្សោយ លោកមានលទ្ធភាពរកបានត្រឹម ៦សែនដុល្លារហុងកុង (ខ្ទង់ ៧៧ ៣៥២ដុល្លារអាមេរិក) ប៉ុណ្ណោះ។ ដោយសារចំនួនទឹកប្រាក់ដែលបានមកច្រើនដែរ ហេតុនេះទើបលោកសុខចិត្ត យកជីវិតទៅប្ដូរទាំងឈឺ ដើម្បីបានសម្ដែង។
ងាកចូលស្ថានភាពសុខភាព គឺកាលពីឆ្នាំ ២០១៤ សភាពរបស់តារាប្រុសរូបនេះចាប់ផ្ដើមមិនស្រួលខ្លាំង ទាក់ទងនឹងជំងឺខ្សោយបេះដូង ស្ទើរតែស្លាប់។ ជាសំណាងល្អ ក្រុមគ្រូពេទ្យខិតខំព្យាបាលទាល់តែជា ហើយលោកក៏បានផ្ដាច់ស្រា ឈប់ជក់បារី ជាហេតុសុខភាពប្រែជាល្អវិញ។ ប៉ុន្តែក៏នៅមិនបានមានន័យថា លោករឹងមាំ ១០០ភាគរយដែរ ព្រោះពេលត្រូវសម្ដែង ឬត្រូវចូលរួមកម្មវិធីអ្វីមួយ លោកត្រូវដាក់អុកស៊ីហ្ស៊ែន ហើយពេលខ្លះប៊ិះសន្លប់ទៀត។
ឈានដល់ថ្ងៃទី២១ ខែកុម្ភៈ Apple Daily បានរាយការណ៍ថាលោក Ng Man Tat ត្រូវបានគេបញ្ជូនទៅព្យាបាលនៅមន្ទីរពេទ្យ Hong Kong ភ្លាមៗ ដោយសារមហារីកថ្លើមធ្វើទុក្ខខ្លាំង។ ប៉ុន្តែដោយសារសភាពលោក Ng ធ្ងន់ធ្ងរទៅៗ ទើបមិនដល់ ១សប្ដាហ៍ផង លោកត្រូវផុតដង្ហើមនៅរសៀលថ្ងៃទី២៧ ខែកុម្ភៈ ឆ្នាំ ២០២១៕