បេសកកម្មអ្វីខ្លះ ស្រីស្អាត Virginia Prak កូនខ្មែរ-អាមេរិក ធ្វើនៅកម្ពុជា?
ស្រីស្អាត Virginia Prak កូនខ្មែរសញ្ជាតិអាមេរិក ជាជយលាភីលេខ ២ Miss Global 2015 ដែលអញ្ជើញមកទស្សនកិច្ចប្រទេសកម្ពុជាថ្មីៗ ហើយបានចូលរួមតន្ត្រីសប្បុរសធម៌ជាមួយបវរកញ្ញា៣នាក់ផ្សេងទៀតនោះ នៅមិនទាន់ត្រឡប់ទៅស្រុកកំណើតវិញនៅឡើយទេ ខណៈដៃគូផ្សេងទៀត បានត្រឡប់ទៅវិញអស់ហើយ។ ក្នុងដំណើរទស្សនកិច្ចនេះ ក្រុមរបស់នាងបានធ្វើកិច្ចការមនុស្សធម៌ជាច្រើន។ នេះបើតាមអ្នករៀបចំដំណើររបស់នាងមកកម្ពុជា។
តាមគម្រោង Virginia Prak គ្រោងទៅសហរដ្ឋអាមេរិកមិញនេះ ថ្ងៃទី៣១ ខែ ឧសភា ឆ្នាំ ២០១៦ ខាងមុខនេះ។ មូលហេតុដែលនាំឲ្យស្រីស្អាតម្នាក់នេះមិនទាន់ត្រឡប់ទៅវិញ ជាមិត្តភក្ដ័ផ្សេងទៀតដែលរួមដំណើរមកកម្ពុជា ក៏ព្រោះតែនាង នៅមានគម្រោងសប្បុរសធម៌ជាច្រើនទៀតត្រូវធ្វើ ។ លោក Dy Pech ប្រធានក្រុម Miss Cambodian-American ដែលបានដឹកនាំ Virginia Prak មកទស្សនកិច្ចលើកនេះ បានរៀបរាប់ពីសមិទ្ធផលដែលក្រុមរបស់លោក បានធ្វើនៅទឹកដីកម្ពុជា និងផែនការបន្តបន្ទាប់ទៀត ។
លោកបានប្រាប់ឲ្យដឹងថា ការប្រគំតន្ត្រីសប្បុរសធម៌កាលពីពេលកន្លងទៅដែលក្រុមរបស់លោកចូលរួមសម្ដែងជាមួយតារាល្បីៗមួយចំនួនទៀត ប្រារព្ធធ្វើនៅសាលសន្និសីទចតុមុខ ទទួលបានទឹកប្រាក់ជាង៣ម៉ឺនដុល្លារ ដោយនៅក្នុងនោះ ត្រូវបានគណៈកម្មការរៀបចំ បែងចែងទៅមន្ទីរពេទ្យ កុមារអង្គរមួយចំណែក និងមន្ទីរពេទ្យគន្ធបុប្ផា មួយចំណែក។
ជាមួយគ្នានោះដែរ ក្នុងដំណើរទស្សនកិច្ចនេះ ក្រុមរបស់លោក ក៏បានយកអំណោយមួយទៅចែកនៅតាមសាលារៀនមួយចំនួនក្នុងប្រទេសកម្ពុជាផងដែរ។ បច្ចុប្បន្ន កំពុងតែស្វែងរកសាលារៀនផ្សេងទៀតដែលខ្វះខាត ដើម្បីយកអំណោយទៅចែកជូនទៀត មុនក្រុមរបស់លោកត្រឡប់ទៅសហរដ្ឋអាមេរិកវិញ។
ខាងក្រោមនេះ គឺជាវីដេអូស្ដីពីបទសម្ភាសន៍របស់ Sabay ជាមួយលោក Dy Pech ស្ដីពីសមិទ្ធផលដែលស្រីស្អាត Virginia Prak បានធ្វើនៅកម្ពុជា។ នៅទំព័រក្រោយSabay នឹងលើកពីប្រវត្តិ Virginia Prak បន្តទៀត ដើម្បីឲ្យ ប្រិយមិត្តស្គាល់នាងកាន់តែច្បាស់៕
អត្ថបទ៖ ខុត សីហា
