មានរឿងបរទេសតែ១រឿងគត់ ចូលហើយដកខ្លួនពីកម្ពុជាវិញ រង្វង់៣ឆ្នាំចុងក្រោយ

2017-12-28 03:39:11
ភាពយន្ត

2017-12-28 03:39:11
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមប្រធាននាយកដ្ឋានភាពយន្តទើបឡើងថ្មី លោក ប៉ុក បូរក្ស បានបញ្ចេញឲ្យដឹងថា គិតត្រឹមរយៈពេល៣ឆ្នាំចុងក្រោយនេះ គឺមានតែរឿងបរទេសមួយរឿងប៉ុណ្ណោះ ដែលបានសុំសិទ្ធិចូលមកថតនៅកម្ពុជាហើយ បានដកខ្លួនទៅវិញ។ នេះដោយមិនរាប់បញ្ចូលភាពយន្តហូលីវូដរឿង "មហាអធិរាជាណាចក្រខ្មែរ" ដែលបានសុំថតឆ្នាំ ២០០៩ ហើយដកខ្លួនវិញនៅឆ្នាំ ២០១៤ឡើយ។

លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌

ភាពយន្តបរទេសចុងក្រោយនោះ ត្រូវបានគេដឹងថាជាភាពយន្តរបស់ផលិតកម្មហុងកុង មានចំណងជើងថា "បេសកកម្មទន្លេមេគង្គ" ដែលបានសុំចូលខ្លួនមកថតនៅស្រុកខ្មែរដើមឆ្នាំ ២០១៥ តែចុងក្រោយសម្រេចមិនថត និងបានប្ដូរផែនការលើកទៅថតនៅថៃ និងម៉ាឡេស៊ីជំនួសវិញ។

ចំពោះបញ្ហានេះ អតីតប្រធាននាយកដ្ឋានភាពយន្តលោក ស៊ិន ច័ន្ទសាយ៉ា ធ្លាប់ប្រាប់ថា ដោយមានបញ្ហាលើកត្តាមួយចំនួនដូចជា ទីតាំងថត ពេលវេលា និងអាកាសធាតុជាដើម។ វិលមក លោក ប៉ុក បូរក្ស ប្រធាននាយកដ្ឋានថ្មី ក៏ប្រាប់ស្រដៀងគ្នាដែរថា បណ្ដាលមកពីប្រព័ន្ធធ្វើការរបស់ផលិតហុងកុងក្រុមនោះ ហាក់នៅថ្មីថ្មោងក្នុងការធ្វើការនៅកម្ពុជា។

“បញ្ហានៅត្រង់នេះ គឺថាបើយើងធ្វើការជាមួយផលិតករមកពីអាមេរិក អឺរ៉ុប អីគឺគេមានប្រព័ន្ធធ្វើការ ឯកសារ ពេលវេលាអីច្បាស់លាស់ទាំងអស់ អីចឹងយើងស្រួលធ្វើការ ប៉ុន្តែផលិតករចិន ដែលគាត់ទើបចូលទីផ្សារយើងថ្មីថ្មោង គាត់អត់ស៊ីជម្រៅរឿងអស់ហ្នឹង គឺគាត់ខ្វះឯកសារនេះ នោះ គាត់ចូលមកដោយឯកឯង អត់មានដៃគូណែនាំ ហើយគាត់មានពេលវេលាតិច ដល់ការស្នើសុំសិទ្ធិថត មានរយៈពេលយូរ អីចឹងគាត់មិនអាចរង់ចាំបាន គាត់ក៏ទៅវិញទៅ"។

ឈុតមួយក្នុងរឿង "បេសកកម្មទន្លេមេគង្គ"

ដើមឡើយភាពយន្ត "បេសកកម្មទន្លេមេគង្គ" ដែលនិយាយពីការចរាចរណ៍គ្រឿងញៀននៅក្នុងប្រទេស៣គឺ ភូមា ថៃ និង ចិន នោះ បានសម្លឹងឃើញទីតាំងមួយក្នុងខេត្តកំពង់ឆ្នាំងអាចថតជំនួសបាន ទើបចូលខ្លួនមក។ ប៉ុន្តែក្រោយពីមិនជោគជ័យលើការងារសម្របសម្រួលនានានោះ ពួកគេក៏បានដកខ្លួនទៅវិញ។

តាំងពីនោះមក មិនមានភាពយន្តហុងកុងណាមួយចូលខ្លួនមកទៀតទេ ទើបតែឆ្នាំ២០១៧នេះ។ តាមលោក ប៉ុក បូរក្ស មកទល់បច្ចុប្បន្ន មានភាពយន្តហុងកុងធំ៣រឿងហើយ ដែលបានចូលមកសុំសិទ្ធិថតនៅក្នុងកម្ពុជា។ លោកថា តួលេខនេះ គឺកើនឡើងសម្រាប់ភាពយន្តហុងកុងថតនៅលើទឹកដីកម្ពុជា ខណៈផលិតករមកពីអឺរ៉ុបធ្លាក់ចុះតិចតួច។

តាមប្រធាននាយកដ្ឋានដដែល លើកឡើងថា នេះផលចំណេញមួយរបស់កម្ពុជាពីភាពយន្តចិន ខណៈចិន គឺជាទីផ្សារធំមួយជាមួយចំនួនប្រជាជនជាង១ពាន់លាននាក់។

១ ក្នុងចំណោម៣នោះ គឺរឿង "Siam Code" ជាប្រភេទ TV Dramaបានថតរួចរាល់ហើយនៅកម្ពុជា រង់ចាំតែថ្ងៃដាក់បញ្ចាំងប៉ុណ្ណោះ។

និយាយជារួមពីតួលេខភាពយន្តបរទេសមកថតនៅកម្ពុជា ពេញ១ឆ្នាំ ២០១៧ នេះវិញ គឺមានប្រមាណ ៥០គម្រោង ក្នុងនោះមានមកពីអាមេរិក អឺរ៉ុប និងចិន។ តួលេខនេះ លោក បូរក្ស អះអាងថា នៅថេរក្នុងរង្វង់៣ឆ្នាំចុងក្រោយ៕

ភាពយន្តហុងកុងខ្នាតធំដែលគ្រោងមកថតនៅស្រុកខ្មែរ ឥឡូវដកខ្លួនវិញ

អត្ថបទ៖ ទារិកា