ហេតុផល១ គឺ រ៉ូណាន ចាន់ណា ចង់ត្រឡប់មកវិញក្នុងនាមជាចាងហ្វាង

2018-01-03 03:46:14
ភាពយន្ត

2018-01-03 03:46:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករភាពយន្ត រ៉ូណាន ចាន់ណា ដែលកំពុងស្ថិតក្នុងវេលាសម្រាកពីការផលិតភាពយន្តនោះ បានបង្ហើបប្រាប់ Sabay ថា លោកគ្រោងនឹងត្រឡប់មកវិស័យកុនវិញបន្ទាប់ពីអារម្មណ៍ស្មុគស្មាញបានធូរស្រាល ព្រមទាំងចង់វិលត្រឡប់មកវិញក្នុងនាមជាចាងហ្វាងតែម្ដង។

ថ្លែងបែបនេះ គឺរ៉ូណាន ប្រាប់ថា លោកចង់បើកផលិតកម្មខ្លួនឯងតែម្ដង នៅពេលណាដែលលោកសម្រេចត្រឡប់មកវិញ ខណៈការផលិតកន្លងមក គឺលោកផលិតក្រោមដំបូលផលិតកម្មផ្សេងដែលមិនមែនជារបស់ផ្ទាល់ខ្លួន។ រឿងដែលលោកផលិតបានកន្លងមក មាន"៧ថ្ងៃ" “ក្រមុំ៣១ កំលោះ៥២" “កំណត់ហេតុនាងនាថ" និងរឿង "សសរកន្លោង" ជាដើម។

រឿងទាំងនោះ គឺលោកផលិតឲ្យផលិតកម្ម Rich Kids Media និងផលិតកម្ម "ឥន្ទ្រានិម្មិត" ខណៈ "ឥន្ទ្រានិម្មិត" គឺជាកន្លែងចុងក្រោយដែលលោកជ្រកដើម្បីបង្កើតស្នាដៃភាពយន្ត មុនពេលសម្រេចផ្អាក ងាកទៅធ្វើជំនួញហាងកាហ្វេវិញ។ យ៉ាងណាផលិតកម្មនេះ គឺជាឈ្មោះរបស់បងស្រីលោក ខណៈបងស្រីដែលមិនមានជំនាញពាក់ព័ន្ធនឹងកុន បានងាកទៅរករបរផ្សេងជំនួសវិញ។

ដូច្នេះហើយ ទើបលោកថា ការវិលត្រឡប់វិញនាពេលខាងមុខ គឺលោកគ្រោងនឹងបើកផលិតកម្មមួយជារបស់ខ្លួនឯង។ "គម្រោងនេះ ខ្ញុំអត់ទាន់ហ៊ាននិយាយថាយូរ ឬឆាប់ប៉ុណ្ណាទេ គឺខ្ញុំចង់សម្រាកមួយរយៈធំសិន អាចថាហោចណាស់១ឆ្នាំ ឬ១ឆ្នាំកន្លះអី ព្រោះចង់ឲ្យហាងកាហ្វេរឹងមាំសិន ហើយពេលវិលមកផលិតកុនវិញ គឺខ្ញុំគ្រោងនឹងបើកជាផលិតកម្មខ្លួនឯង ធ្វើរឿងខ្លួនឯងតែម្ដង"។

រ៉ូណាន ចាន់ណា បានប្រកាសផ្អាកផលិតកុននៅចុងឆ្នាំ ២០១៧ ទន្ទឹមពន្ធនានាលើវិស័យភាពយន្តត្រូវបានប្រកាសដោយក្រសួងវប្បធម៌។ ហេតុផលនៅពេលនោះ គឺការផលិតកុនមានការលំបាកមួយចំនួនដែលធ្វើឲ្យលោករឿងតប់ប្រមល់ច្រើន ទើបសម្រេចដកខ្លួនមួយរយៈ ផ្សំនឹងលោកកំពុងដំណើរការរកស៊ីថ្មីបន្ថែមផង។

ដោយឡែក ការបង្ហើបនាពេលនេះ ពីការមិនបោះបង់សិល្បៈ ពិសេសភាពយន្ត ផលិតករមកពីខេត្តបន្ទាយមានជ័យរូបនេះ លើកឡើងថា ទី១ស្ដាយចំណេះជំនាញដែលខ្លួនមាន និងទី២ លោកមើលឃើញថា សិល្បៈភាពយន្តក្នុងស្រុកនៅមានចន្លោះរីកចម្រើនបាន។ ក្នុងន័យនេះ រ៉ូណាន សំដៅដល់រោងភាពយន្ត ដែលជាទីកន្លែងដាក់ផលិតផលភាពយន្តទៅទីផ្សារ កាន់តែរីកដុះដាល។

“ខ្ញុំមើលឃើញថា ឥឡូវរោងកុន ចាប់ផ្ដើមកើតឡើងច្រើន ហើយផ្សារទំនើបដែលមាន Screenកុន ក៏កើតមានច្រើនទៀតនាពេលខាងមុខ។ អីចឹងហើយ ខ្ញុំមើលឃើញពីឱកាសនេះ ទើបសម្រេចថា ខ្ញុំនឹងវិលត្រឡប់មកធ្វើកុននេះម្ដងទៀត!”។ រ៉ូណាន ចាន់ណា ថ្លែង៕

អត្ថបទ៖ ទារិកា