- 2019-05-24 03:54:17
- ភាពយន្ត
ហេតុផលមួយនេះ លោក ហ្វៃ សំអាង ចង់ឲ្យ "កូនពស់កេងកង” ទៅដល់ថៃ ជាងប្រទេសណាទាំងអស់
- 2019-05-24 03:54:17
- ចំនួនមតិ 0 | ចំនួនចែករំលែក 0
ហេតុផលមួយនេះ លោក ហ្វៃ សំអាង ចង់ឲ្យ "កូនពស់កេងកង” ទៅដល់ថៃ ជាងប្រទេសណាទាំងអស់
ចន្លោះមិនឃើញ
លោក ហ្វៃ សំអាង បានបញ្ចេញឲ្យដឹងថា លោកចង់ឲ្យភាពយន្តភាគ (Film Serei) របស់លោករឿង "កូនពស់កេងកង" បានទៅចាក់បញ្ចាំងនៅលើកញ្ចក់ទូរទស្សន៍នៅប្រទេសថៃជាងប្រទេសណាៗទាំងអស់។
ថ្លែងបែបនេះ បន្ទាប់ពីថ្មីៗមានព័ត៌មានថា Film Serei ខាងលើដែលបាន និងកំពុងទទួលបានការគាំទ្រនេះ មានផលិតកម្មបរទេសជាច្រើន បានចូលមកចែចូវ ចង់សុំទិញសិទ្ធិយកទៅចាក់បញ្ចាំងលើកញ្ចក់ទូរទស្សន៍របស់គេ។ ក្រុមបរទេសទាំងនោះមានជាអាទិ វៀតណាម និងក្រុមហ៊ុនធំៗនៅប្រទេសថៃជាដើម។ បញ្ហានេះជារឿងដ៏កម្រសម្រាប់សិល្បៈភាពយន្តខ្មែរ ព្រោះតែច្រើនឆ្នាំមកហើយ ភាពយន្តក្នុងស្រុកជួបឧបសគ្គក្នុងការឈានជើងចូលទៅទីផ្សារអន្តរជាតិ ដោយសារតែគុណភាពនៅមានកម្រិត និងលក្ខខណ្ឌស្តង់ដារភាពយន្តជាដើម។
ដោយទទួលស្គាល់ចចាមអារ៉ាមខាងលើជាការពិត លោក ហ្វៃ សំអាង ដែលបានសហនិពន្ធជាមួយអ្នកស្រី ប៉ុល ពិសី នៃរឿងខាងលើ បានថ្លែងបន្ថែមថា លោកពិតមោទកភាពមែនទែន ព្រោះនោះក៏ជាអ្វីដែលលោកខ្លួនឯងចង់បាន និងបានដាក់ផែនការតាំងពីចាប់ផ្ដើមផលិតម្ល៉េះ គឺលោកចង់ឲ្យរឿងនេះ បានចេញទៅបញ្ចាំងបរទេស ទើបលោកសម្រិតសម្រាំងខ្លាំងលើគុណភាព ក្នុងនោះទាំងសាច់រឿង រូបភាព សំឡេង ប្លង់ជាដើម ធ្វើឲ្យមានស្តង់ដារ។
បើទោះមានជាមានក្រុមហ៊ុនមកពីប្រទេសជាច្រើនក្ដី ប៉ុន្តែអ្នកនិពន្ធ និងដឹកនាំរូបនេះ អះអាងថា លោកចង់ភាពយន្តភាគដ៏ធំរបស់លោក បានទៅបញ្ចាំងនៅប្រទេសថៃជាង។ "ខ្ញុំចង់ឲ្យ Film Serei របស់ខ្ញុំនេះ ទៅបញ្ចាំងនៅលើកញ្ចក់ទូរទស្សន៍ថៃជាងគេ សួរថាហេតុអី ព្រោះថាថៃ មិនងាយនឹងចាប់អារម្មណ៍រឿងរបស់ខ្មែរយើងទេ...អីចឹងហើយទើបខ្ញុំខំធ្វើឲ្យល្អ ឲ្យវាស្តង់ដារ ហើយជាលទ្ធផល គឺខ្ញុំធ្វើបានមែន"។
អ្នកនិពន្ធល្បីឈ្មោះរូបនេះ បញ្ជាក់ថា ក្រុមហ៊ុនធំៗជាច្រើនពីប្រទេសថៃ បានទាក់ទងសួរនាំពីរឿង "កូនពស់កេងកង" តាំងពីរឿងនេះ ទើបចាក់បញ្ចាំងនៅលើកញ្ចក់ទូរទស្សន៍ហង្សមាសតាំងពីដំបូងមកម្ល៉េះ។ យ៉ាងណាក៏ដោយ ខាងហង្សមាស មិនទាន់ទទួលការចរចាទិញលក់ផ្លូវការជាមួយភាគីណាមួយនៅឡើយ ដោយសារតែ ភាគីដែលចង់បាន មានច្រើន។
មួយវិញទៀត ក៏ដោយសារថា ភាពយន្តភាគប្រមូលផ្ដុំដោយតួល្បីៗមួយនេះ កំពុងតែចាក់បញ្ចាំងលើកញ្ចក់ទូរទស្សន៍ មិនទាន់ចង់នៅឡើយ។ លោក ហ្វៃ សំអាង បញ្ជាក់ថា ការចរចាណាមួយលើទិញលក់ អាចនឹងកើតមាននៅក្រោយការបញ្ចាំងចប់នៅលើកញ្ចក់ទូរទស្សន៍ក្នុងស្រុក ដែលតាមការប៉ាន់ប្រមាណ គឺអាចអំឡុងចុងឆ្នាំ ២០១៩នេះ។
ភាពយន្តភាគ "កូនពស់កេងកង" ត្រូវបានគេប៉ាន់ប្រមាណថា បានចំណាយទុនមហាសាល ព្រោះតែបានប្រមូលផ្ដុំដោយតួល្បីៗជួរមុខរបស់កម្ពុជាច្រើន។ ការរៀបចំ សំលៀកបំពាក់ ស្ទូឌីយ៉ូ ជាដើម ត្រូវបានគេដឹងថា មានការចំណាយខ្ពស់ខ្លាំងដែរ។ បន្ថែមពីលើនេះ គេមើលឃើញថា "កូនពស់កេងកង" បានចុះទៅថតនៅទីកន្លែងឆ្ងាយៗ មានទេសភាពស្អាតៗ និងល្បីៗរបស់កម្ពុជាជាច្រើន។
បញ្ហានេះ លោក ហ្វៃ សំអាង ថា លោកចង់ប្រើ Film Serei មួយនេះផ្សព្វផ្សាយពីសក្ដានុពលទេសចរណ៍ធម្មជាតិ ដែលមានទឹកដី ព្រៃភ្នំ និងព្រៃឈើ ដែលផ្គុំគ្នាបានជាទិដ្ឋភាពដ៏ប្រណិត របស់កម្ពុជាទៅកាន់ពិភពលោក។ ដូច្នេះហើយ ទើបលោកដាក់ផែនការ ធ្វើយ៉ាងណាឲ្យ "កូនពស់កេងកង" បានចេញទៅទីផ្សារអន្តរជាតិឲ្យខាងតែបាន ពិសេសនោះ គឺប្រទេសថៃតែម្ដង៕
