លើកទី ១ថតរឿងបុរាណ វ៉ៃហាំងដាច់ចិត្តទម្លាយឈុតពិសេស១ដក់ក្នុងចិត្តគ្មានថ្ងៃភ្លេច

2019-09-06 09:08:33
ភាពយន្ត

2019-09-06 09:08:33
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្តែងប្រុសដែលទទួលបានប្រជាប្រិយភាពលើស្រទាប់យុវវ័យ និងភាគច្រើន គេឃើញលោកត្រូវបានផលិតកររឿងតម្រូវឱ្យចាប់ដៃគូជាមួយកញ្ញា ស៊ីន យូប៊ីន នោះគឺលោក ខាត់ វ៉ៃហាំង។

នៅប៉ុន្មានឆ្នាំចុងក្រោយនេះ វ៉ៃហាំង ហាក់ស្ទុះឡើងកូដខ្លាំងបន្ទាប់ពីបានប្រឡូកចូលក្នុងវិស័យខ្សែភាពយន្តកន្លងមក។ ទន្ទឹមនឹងនេះដែរ លោកក៏បានគ្រងតំណែងជាតួឯកប្រុស ក្នុងរឿងភាគបុរាណខ្មែរមួយដែលកំពុងតែធ្វើការចាក់ផ្សាយនៅលើកញ្ចក់ទូរទស្សន៍ភីអិនអិននោះគឺរឿង និស្ស័យស្នេហ៍នាងមនោរាហ៍។

ជំនួបសម្ភាសផ្ទាល់ទាក់ទងនឹងចំណាប់អារម្មណ៍មួយចំនួនក្នុងការសម្តែងនៅក្នុងរឿងបុរាណដ៏ល្អមើលមួយនេះ តារាប្រុសវ័យក្មេង សម្បុរស វ៉ៃហាំង ហាក់បញ្ចេញនូវក្ដីរំភើបរីករាយយ៉ាងពន់ពេក។ ក្នុងនោះ លោកបានបញ្ជាក់ប្រាប់ថា នេះជារឿងទីមួយហើយដែលខ្លួនបានស្លៀកនូវសម្លៀកបំពាក់បែបប្រពៃណីបុរាណរបស់ខ្មែរ មើលទៅពិតជាស្រស់ស្អាតខ្លាំងណាស់ ដែលពីមុនលោកពុំធ្លាប់បានសម្តែងភាពយន្តបុរាណណាឡើយ។

ជាក់ស្តែង ក្នុងរឿងនេះលោកត្រូវសម្ដែង ជាមេទ័ពខ្លាំងពូកែម្នាក់ ហើយលោកបានដាក់ចិត្ដដាក់កាយបញ្ចូលអារម្មណ៍ទៅក្នុងសាច់រឿងឱ្យដូចពិតដូច្នោះដែរ។ ជាមួយនឹងឈុតមេទ័ពសម័យបុរាណដ៏អង់អាចក្លាហាននេះ ធ្វើឱ្យអារម្មណ៍របស់វ៉ៃហាំងនៅដិតជាប់ក្នុងចិត្ត ចងចាំមិនភ្លេចឡើយ ជាពិសេសឈុតមួយដែលថតនៅប្រាសាទបុរាណមួយកន្លែង ស្ថិតក្នុងទឹកដីខេត្តតាកែវ។

វាជាឈុតបង្ហាញពីការប្រារព្ធពិធីបុណ្យក្នុងភូមិ ដែលមានការជួបជុំមនុស្សមកពីគ្រប់ទិសទី ហើយមានការបង្ហាញជាមួយនឹងរបាំប្រពៃណីជាច្រើនទម្រង់ផងដែរ។ ជាមួយនឹងទឹកមុខញញឹមតិចៗ បែបមានមន្តស្នេហ៍ វ៉ៃហាំងបានរៀបរាប់ថា៖ «ពេលហ្នឹង ខ្ញុំដើរមើលគេ ព្រោះយើងជាមេទ័ព យើងដើរមើលគេអញ្ចឹង មានអារម្មណ៍ថា សប្បាយចិត្ត សិល្បករ សិល្បការិនី តែងខ្លួនជាអ្នករបាំ ទៅតាមប្រភេទនីមួយៗ ខុសប្លែកពីគ្នា ដូចនេះ វាស្រស់ស្អាតខ្លាំង ហើយក៏ដក់ជាប់អារម្មណ៍ខ្លាំងដូចគ្នា ជាពិសេស បានឃើញតួឯកស្រីនៅទីនោះតែម្តង»។

ជាមួយគ្នានឹងការបង្ហាញពីឈុតដែលខ្លួនលង់ចិត្ត ដកមិនរួចនោះ តួឯកប្រុសមេទ័ពម្នាក់នេះ បានបង្ហើបឈុតដែលពិបាកថតជាងគេក្នុងចំណោមឈុតទាំងអស់ក្នុងរឿងនេះ តួយ៉ាងដូចជាឈុតធ្វើសង្គ្រាម ដែលតម្រូវឱ្យមានមនុស្សច្រើន ហើយអ្វីដែលប្រឈមមុខខ្លាំង គឺអាកាសធាតុក្តៅ ហើយមានពេលខ្លះប៉ះពាល់ដល់ស្បែកក៏មាន។

ទោះជាយ៉ាងនេះក្តី លោកបានបន្តថា យើងទទួលបានជោគជ័យក្នុងការថតឈុតដ៏លំបាកមួយនេះ ក្រោមទឹកមុខដ៏រីករាយពីក្រុមការងារទាំងអស់គ្នា។ យ៉ាងណាមិញ ដើម្បីឱ្យដឹងកាន់តែច្បាស់ទៀតថា តើការសម្តែងរបស់តារាប្រុស តួឯកមេទ័ពរូបសង្ហានៅក្នុងរឿង «និស្ស័យស្នេហ៍នាងមនោរាហ៍» មានលក្ខណៈដូចម្តេច និងល្អមើលយ៉ាងណានោះ សូមទស្សនិកជនរង់ចាំតាមដានទស្សនាចាប់ពីថ្ងៃ ព្រហស្បតិ៍ ដល់ថ្ងៃសុក្រ វេលាម៉ោង ០៨ យប់ ដល់ម៉ោង ០៩យប់ និងមានតែមួយគត់នៅលើកញ្ចក់ទូរទស្សន៍ភីអិនអិន៕

សូមទស្សនាវីដេអូខាងក្រោម៖

អត្ថបទ៖ យី សុធារី