- 2017-04-19 09:11:48
- ភាពយន្ត
៦ សន្លឹកផ្ទៀងផ្ទាត់ឈុត កេន្នី សុំបែក សេនី
- 2017-04-19 09:11:48
- ចំនួនមតិ 0 | ចំនួនចែករំលែក 0
៦ សន្លឹកផ្ទៀងផ្ទាត់ឈុត កេន្នី សុំបែក សេនី
ចន្លោះមិនឃើញ
អ្នកគាំទ្រប្រលោមលោករឿង "មន្តស្នេហ៍លេខា" នឹងបានទស្សនាបានរឿងនេះជាវីដែអូភាគ និងភាពយន្តក្នុងពេលឆាប់ៗនេះហើយលើកញ្ចក់ទូរទស្សន៍ CTN។ មុននឹងបានទស្សនាជាវីដេអូ មកអានរឿង ហើយផ្ទៀងផ្ទាត់សកម្មភាពសម្ដែងត្រង់ឈុតមួយដែល កេន្នី សុំបែក សេនី បន្តិចមើលតើគួរឲ្យគួរឲ្យទាក់ទាញបែបណា?
សេនី ក្ដាប់មានដើរទៅរកស្រីស្រស់ដែលរាំតិចៗហាក់ស្រវឹងទន់ស្រឿងៗ គាប់ជួនបុរសម្នាក់នៅក្បែរនាងអោនមកញញឹមខ្សឹប ធ្វើអោយចិត្តអ្នកដែលទើបនឹងមកដល់នេះឡើងភ្លើងកម្ដៅ។ «ទៅផ្ទះបាននៅ?» សម្លេងគេនិយាយល្មមៗតែអាចជម្នះស្នូរតន្ត្រីក្បែរត្រចៀកនាងបាន។ កេន្នីងាកមកវឹង។
មនុស្សស្គាល់គ្នាយូរយ៉ាងនេះ ឃើញតែមុខគេក៏ដឹងថាគេកំពុងគិតយ៉ាងណាដែរ។ តាមថានាងខឹងគេណាស់ មិនចង់សូម្បីតែឃើញមុខកុំថាឡើយនិយាយតបជាមួយ តែពេលនេះគឺផ្សេងៗ។ ភ្នែកគេទំាងទ្វេកំពុងបង្ហាញអណ្ដាតភ្លើងប្រចណ្ឌ ហើយសម្លក់នាង ។ មិត្តនាងខំញញឹមមករក សេនី ព្រោះមិនដឹងរឿង ហើយក៏និយាយគួរសម៖ «អ្នកណាហ្នឹង កេន្នី? ធ្វើការជាមួយគ្នា?»
កេន្នីបញ្ឈប់ចលនារាំ ស្របពេលសេនីសើចស្ងួតងាកទៅរកមិត្តនាងយ៉ាងឆ្មើងកន្ត្រើងហើយនិយាយតបមួយៗ៖ «មិត្តរួមគ្រែ!» កេន្នីបើកភ្នែកធំៗដែលវាចាអន់របៀបនេះក៏គេនិយាយចេញមកបាននៅទីសាធារណៈ។ នាងសម្លឹងទៅមិត្តនាងដែលភន្ត័ភាំងហើយងាកមករកសេនីដែលបៀមស្ករកៅស៊ូញ៉ាច់ៗបញ្ឈឺនាង។ ពន្លឺភ្នែកនាងហាក់ចង់ប្រាប់គេថា តើគេនិយាយនេះចង់យ៉ាងណា រឺគេចង់បានការអាម៉ាសនៅកណ្តាលហ្វូងនេះ នាងនឹងអោយគេសមតាមបំណង។
សេនីឃើញនាងខឹងគេកាន់តែក្តៅចិត្តទ្វេរឡើងព្រោះយល់ថាគេនិយាយនេះធ្វើអាយនាងបាត់ ឱកាសទាក់ទងប្រុសៗ។ លោកនាយកព្រាននារីលូកដៃមកចាប់កដៃស្រីលេខាដែលនៅភាំងៗអូសចេញតម្រង់ក្រៅក្លឹប។ «ឈឺណា៎សេនី!លែងដៃ!» ភាគីខាងប្រុសមិនខ្ចីងាកមកអាណិតនាងដែលត្រូវអូសទៅទំាងស្បែកជើងកែងចោតកម្រាស់ពីរតឹកនោះទេ។
គេសង្គ្រឺតធ្មេញនិយាយតិចៗ៖ «ល្អហើយដែលមិនស៊ីកំផ្លៀងនៅមុខពួកអាចោលម្សៀតអស់នេះ!» «សាកមើលទៅ!» នាងតបផងរលាស់ដៃគេទាំងក្ដៅចិត្តផង។គេឃើញនាងមិនញិនរឹតតែអូសលឿនរហូតដល់ឡាន ធ្វើអោយអ្នកផងតាមមើលគ្រប់គ្នាជឿថានេះជាកូនអ្នកមានដែលដើរហើរយប់ព្រលប់រហូតដល់ប្តីមកចាប់បាន។ កេន្នីណាខ្មាស់ណាខឹងមកដល់ឡានគេ នាងស្រែកជំទាល៖ «ខ្ញុំមិនទៅ!នាំខ្ញុំទៅណា?អ្នកណាថាខ្ញុំត្រូវទៅជាមួយលោក?»
សេនីសម្លឹងសកម្មភាពដែលនាងមិនធ្លាប់ហ៊ានធ្វើមកលើគេពីមុនមក។ គេមិនដឹងទេថាភាពងប់ងល់នឹងតណ្ហារបស់គេបានធ្វើអោយនាងខូចចិត្តហើយជាតិស្រវឹងកំពុងធ្វើអោយនាងគ្រប់គ្រងទោសៈមិនបាន។គេខាំមាត់និយាយ៖ «គ្រាន់បើម៉េះ?មានសាហាយហើយនៅអូសក្រឡាទៀត?ម៉េចប្រុសម្នាក់វាមិនឆ្អែត?» សម្តីគេប្រមាថនាងផ្តួនៗធ្វើអោយកេន្នីក្តៅឆេវយារដៃពន្លែងមួយកំផ្លៀងតម្រង់មាត់គេ។ ទឹកមុខគេគឃ្លើនមកវិញបង្ហាញថាបើនាងទៅជាមួយគេនាងនឹងខ្ទេចឆ្អឹងហើយ ដូច្នេះនាងដកថយ ចេញពីឡានគេ ហើយនិយាយដាច់ណាត់៖ «ដាច់គ្នាទៅសេនី!លឺអត់?ដាច់គ្នា!»
នាងសម្លឹងគេមុតដល់បេះដូងហើយស្រក់ទឹកភ្នែកមកច្រោក ជាកិច្ចតបស្នងភាពភ្លឹកស្មារតីរបស់គេ។ ជាលើកទីមួយក្នុងជីវិតដែលសេនីត្រូវស្រីសុំបែក។ «ថាម៉េច!?» សេនី ភ្លាត់មាត់តិចៗទំាងជ្រួញចិញ្ចើមចូលគ្នា។ កេន្នី ងក់ក្បាលញាប់ស្មេរទាំងយំសស្រាក់៖ «ហ្នឹងហើយ!ស្តាប់អត់ច្រលំទេ!បែកគ្នា!ខ្ញុំសុំបែកលោក!យើងគ្មានអីពាក់ព័ន្ធគ្នាទេចាប់ពីយប់នេះទៅ!លឺនៅ?ប៉ុណ្ណឹងបានរឺនៅ?» គេនៅឈរទ្រឹងឯនាងខាំមាត់ឈ្ងោកដោះស្បែកជើងកម្រាស់ពីតឹកនោះហើយយួររត់ចេញទៅរកឡាននាងព្រោះបើពាក់ស្បែកជើងកែងនេះគឺរត់មិនទាន់ជំហ៊ានប្រុសម្នាក់នេះទេ។
សេនីនៅផ្អែកខ្នងនឹងឡាន។ គេសម្លឹងដំណើរនាងពីក្រោយរហូតដល់នាងចេញបាត់ទើបឡើងឡានបិទទ្វារគ្រាំងជិះចាកចេញដែរ។
