- 2017-06-16 08:38:11
- ភាពយន្ត
ធ្លាយព័ត៌មានរសើបមួយពីរឿង "ហ្លួងព្រះស្ដេចកន" ដែលធ្វើឲ្យប្រិយមិត្តដឹងហើយ នឹងកាន់តែមានមោទនភាព
- 2017-06-16 08:38:11
- ចំនួនមតិ 0 | ចំនួនចែករំលែក 0
ធ្លាយព័ត៌មានរសើបមួយពីរឿង "ហ្លួងព្រះស្ដេចកន" ដែលធ្វើឲ្យប្រិយមិត្តដឹងហើយ នឹងកាន់តែមានមោទនភាព
ចន្លោះមិនឃើញ
បន្ទាប់ពី Trailer ផ្លូវការរបស់រឿង "ហ្លួងព្រះស្ដេចកន" បានចេញជាផ្លូវការ និងទទួលបានការគាំទ្រខ្លាំងក្រៃលែងមក ថ្មីៗនេះមានដំណឹងលេចឮថាដំបូងឡើយ PNN ចង់ឲ្យក្រុមផលិតថៃ សហការជាមួយ ឯកឧត្ដម ម៉ៅ អាយុទ្ធ ដើម្បីផលិតរឿងនេះឡើង។
ប្រភពដែលសុំមិនបញ្ចេញឈ្មោះមួយ បង្ហើបប្រាប់ Sabay ថា ដំបូងឡើយ ទូរទស្សន៍ PNN ដែលគេដឹងថាជាម្ចាស់ថវិកាប្រើសម្រាប់ផលិតរឿងប្រវត្តិសាស្ត្រនេះ បានព្យាយាមឲ្យក្រុមការងារផលិតមួយក្រុមជាជនជាតិថៃ បានចូលរួមមួយផ្នែកដើម្បីផលិតរឿងនេះ "ស្ដេចកន" ខណៈដឹងថា ទូរទស្សន៍ចាយលុយធំមួយនេះ មានក្រុមការងារជនជាតិថៃជាច្រើន។ ប៉ុន្តែយ៉ាងណា បំណងនេះត្រូវបានបង្អាក់ដោយឯកឧត្តម ម៉ៅ អាយុទ្ធ ដែលទទួលបន្ទុកដឹកនាំថតរឿងនេះ។
"តាមខ្ញុំដឹង លឺថា ភីអ៊ិនអ៊ិន ចង់ឲ្យថៃមួយក្រុមចូលរួមផលិតរឿងហ្នឹង ប៉ុន្តែឯកឧត្តម ម៉ៅ អាយុទ្ធ ថាអត់ព្រមទេ ដោយគាត់(ឯកឧត្តម) បើហ៊ានឲ្យថៃមកចូលរួម តែកាលណារឿងល្អមើល ល្បីទៅ មហាជននឹងមានពាក្យសំដីថា ហ្នឹងដោយសារថៃ អីចឹងគាត់អត់ព្រមទេ"។ ប្រភពលើកឡើង
យ៉ាងណា បញ្ហានេះ ភាគីភីអ៊ិនអ៊ិន បានច្រានចោល។ កញ្ញា ទូច បុប្ផា ប្រធានផ្នែកកម្មវិធីផ្សាយរបស់ ស្ថានីយទូរទស្សន៍ PNN បានថ្លែងមកកាន់ Sabay ថា បញ្ហានេះ អាចនឹងមានការយល់ច្រឡំ ដោយសារតែក្រុមការងាររបស់ PNN មួយចំនួនជាជនជាតិថៃ។ ប៉ុន្តែជាក់ស្ដែងរឿង "ហ្លួងព្រះស្ដេចកន" នេះ ជាស្នាដៃរបស់ក្រុមផលិតកម្ពុជា សុទ្ធសាធ ដែលដឹកនាំដោយឯកឧត្ដម ម៉ៅ អាយុទ្ធ។
កញ្ញា បន្តថា ថ្នាក់ដឹកនាំ ចង់ឲ្យប្រជាពលរដ្ឋខ្មែរមោទនភាពនឹងរឿងប្រវត្តិិសាស្ត្ររបស់ខ្មែរមួយនេះ។ ដូច្នេះគ្មានហេតុផលអី ដែលត្រូវបញ្ចូលក្រុមផលិតប្រទេសផ្សេងមកជួយនោះទេ។
”ជាក់ស្ដែងរឿងហ្នឹង គឺថតអំពីប្រវត្តិសាស្ត្រខ្មែរសុទ្ធសាធ ដូច្នេះគឺក្រុមការងារខ្មែរសុទ្ធសាធជាអ្នកផលិត យើងចង់ឲ្យប្រជាជនយើងមានមោទនភាពចំពោះរឿងនេះ ចំពោះស្នាដៃរបស់ខ្មែរយើង"។ កញ្ញា ថ្លែង។
ទាក់ទងនឹងបញ្ហានេះដែរ ឯកឧត្ដម ម៉ៅ អាយុទ្ធ ដែលជាអ្នកដឹកនាំរឿងនេះផ្ទាល់ សុំមិនធ្វើការបកស្រាយ។ រឿងស្ដេចកន គឺជារឿងភាពយន្តខ្នាតធំប្រវត្តិសាស្ត្រ ដែលត្រូវបានប្រកាសផលិតដោយទូរទស្សន៍ PNN ក្នុងនោះ តាមព័ត៌មានកន្លងមករឿងនេះ វិនិយោគជាមួយកញ្ចប់ថវិកាប្រមាណ ១លានដុល្លារអាមេរិក ដែលតួលេខវិនិយោគលើភាពយន្តខ្ពស់បំផុតមួយរបស់សិល្បៈភាពយន្តខ្មែរ។
ក្រោយពីបានបញ្ចេញ Trailer ធ្វើឲ្យមានការគាំទ្រខ្លាំងកាលពីដើមខែនេះ រឿង "ស្ដេចកន" មិនទាន់ប្រកាសថ្ងៃបញ្ចាំងផ្លូវការនៅឡើយទេ៕
