ឧបនាយករដ្ឋមន្រ្តី ម៉ែន សំអន ផ្ដល់កិត្តិយសចូលរួមសម្ពោធភាពយន្ត "ហ្លួងព្រះស្ដេចកន"

2017-08-18 02:58:35
ភាពយន្ត

2017-08-18 02:58:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីដាក់សម្ពោធភាពយន្តខ្នាតធំ "ហ្លួងព្រះស្ដេចកន" មានសុទ្ធតែវត្តមានដ៏ខ្ពស់របស់ឧបនាយករដ្ឋមន្ត្រី ម៉ែន សំអន និងឯកឧត្តម លោកជំទាវជាច្រើនរូបចូលរួមជាអធិបតី និងតារាសម្ដែងជាច្រើនកុះករនៅសាលមហោស្រពចតុមុខល្ងាចមិញនេះ។

ថ្លែងក្នុងកម្មវិធីខាងលើ លោកជំទាវ ម៉ែន សំអន លើកឡើងថា ការផ្សព្វផ្សាយសិល្បៈ វប្បធម៌តាមរយៈភាពយន្ត គឺជាមធ្យោបាយដ៏ប្រសើរបំផុត សម្រាប់ផ្ទេរមរតកទៅដល់កូនចៅជំនាន់ក្រោយឲ្យបានសិក្សាស្វែងយល់ និងស្គាល់ប្រវត្តិសាស្ត្រ។ ភាពយន្តរឿង "ហ្លួងព្រះស្ដេចកន" គឺជាផ្នែកមួយដ៏សំខាន់នៃផលិតផលវប្បធម៌ ដែលបានបង្ហាញពី អត្តសញ្ញាវប្បធម៌ គុណតម្លៃ និង អត្ថន័យមិនត្រឹមតែជាទំនិញឬ ការធ្វើអាជីវកម្មប៉ុណ្ណោះទេ តែជាកញ្ចក់ឆ្លុះបញ្ចាំពីតថភាពសង្គម និងប្រវត្តិសាស្ត្ររបស់កម្ពុជាមួយ។

ជាមួយគ្នានោះ លោកជំទាវក៏បានធ្វើការសំណូមពរ ដល់ផលិតករ តួសម្ដែង និងអ្នកពាក់ព័ន្ធក្នុងវិស័យភាពយន្តថា សូមព្យាយាមសម្រិតសម្រាំងផលិតស្នាដៃថ្មីៗ ដែលមានគុណភាព បង្កប់ការអប់រំ ដើម្បីផ្ដល់ការកម្សាន្តផង និងអប់រំដល់អ្នកទស្សនា។

ជុំវិញច្បាប់លួចចម្លង លោកជំទាវមានប្រសាសន៍ផ្ដាំផ្ញើថា ៖ "ខ្ញុំសូមអំពាវនាវប្រជាពលរដ្ឋខ្មែរ រួបគ្នាគាំខ្សែភាពយន្តខ្មែរ តាមរយៈការទិញសំបុត្រចូលទស្សនា និងជួយការពារកម្មសិទ្ធិបញ្ញា កុំលួចចំលងស្នាដៃ នេះបទល្មើសមួយដែលប្រឈមនឹងច្បាប់"។

រឿង "ហ្លួងព្រះស្ដេចកន" ចូលរួមសម្ដែងដោយ ទេព រិនដារ៉ូ ស៊ិន សក្កដា រស់ សោភ័ណ ឆុំ វត្តី ហេង ប៊ុនលាភ ឌី សាវ៉េត ទ្រង់. ស៊ីសុវត្ថិ សិរីវុឌ ខាត់ សុឃីម ជា សំនៀង សុខ ដែន ក្រុមកងកម្លាំងក្បាច់គុន ល្បុក្កតោ និង យុទ្ធគុនខម ព្រមសម្ដែងល្បីៗជាច្រើនទៀត។ រឿងនេះ ចំណាយពេលផលិតរយៈពេលជាង២ឆ្នាំ និងទឹកប្រាក់សរុប១លានដុល្លារនេះ នឹងដាក់បញ្ចាំងចាប់ពីថ្ងៃតទៅ នៅតាមរោងភាពយន្តក្នុងរាជធានីភ្នំពេញ និងខេត្តសៀមរាប៕