- 2017-11-21 10:00:00
- ភាពយន្ត
សំណើព្យួរពន្ធ១០ឆ្នាំ របស់ក្រុមផលិតករ ទំនងមិនទទួលបានផ្លែផ្កា
- 2017-11-21 10:00:00
- ចំនួនមតិ 0 | ចំនួនចែករំលែក 0
សំណើព្យួរពន្ធ១០ឆ្នាំ របស់ក្រុមផលិតករ ទំនងមិនទទួលបានផ្លែផ្កា
ចន្លោះមិនឃើញ
ការទទូចសុំពីសំណាក់ក្រុមផលិតករទៅកាន់រដ្ឋាភិបាល ដោយសុំព្យួរពន្ធរយៈពេល១០ឆ្នាំ ដើម្បីឱ្យផលិតករឹងដៃជើង ស្របពេលវិស័យភាពយន្ត កំពុងតែស្ទុះឡើងវិញ ទំនងជាមិនអាចទៅរួច ព្រោះនេះជាកាតព្វកិច្ច ដែលក្រុមផលិតករ ត្រូវបង់ពន្ធជូនរដ្ឋ។ នេះបើតាមការបញ្ជាក់ពីលោក ប៉ុក បូរក្ស ប្រធានស្ដីទី នាយកដ្ឋានភាពយន្ត និងផ្សព្វផ្សាយ វប្បធម៌ នៃក្រសួងវប្បធម៌ និងវិចិត្រសិល្បៈ ក្រោយបានចូលរួមដាក់សំណើទៅកាន់រដ្ឋាភិបាល និងការជួយជ្រោមជ្រែងនានា ដើម្បីជួយដល់ផលិតករ។
លោកបន្តថា សំណើបានដាក់ជូនរដ្ឋាភិបាលរួចហើយ ចំពោះកង្វល់របស់ក្រុមផលិតករ ជាពិសេសសំណើសុំព្យួរពន្ធរយៈពេល ១០ឆ្នាំនេះ។ យ៉ាងណាគោលការណ៍រដ្ឋាភិបាល គឺតម្រូវឲ្យបណ្ដាផលិតកម្មត្រូវបង់ពន្ធជូនរដ្ឋជាដាច់ខាត ដែលធ្វើឲ្យនាយកស្ដីទីរូបនេះ ហាក់មិនសូវមានសង្ឃឹម។
យ៉ាងណាក៏ដោយលោក ប៉ុក បូរក្ស នៅតែមានសុទិដ្ឋិនិយមថា រាជរដ្ឋាភិបាលអាចពិចារណាលើបញ្ហានេះ ដើម្បីសម្រួលដល់បណ្ដាផលិតកម្មក្នុងស្រុកនានា។ ទន្ទឹមនឹងការសង្ឃឹមនេះ លោកបានអះអាងថា ក្រសួងពាក់ព័ន្ធ និងរដ្ឋាភិបាល បានខ្នះខ្នែងជួយដល់ផលិតករជាច្រើនមកហើយ។ ក្នុងនោះ ដោយចាប់ពីឆ្នាំ២០១៨ តម្លៃសំបុត្រនៅតាមរោងភាពយន្តនានា នឹងត្រូវដំឡើង ដើម្បីឲ្យផលិតករមានចំណូលថែមមួយកម្រិតទៀត។
មួយវិញទៀត រាល់ឧបករណ៍ដែលផលិតករទិញមកពីបរទេស មិនត្រូវបង់ពន្ធនោះទេ ហើយអ្វីដែលពិសេស គឺទីតាំងថតផ្សេងៗ ដែលក្រុមផលិតករតែងត្អូញត្អែរពីផលលំបាកក្នុងការស្នើសុំ ក្រសួង និងរដ្ឋាភិបាល បានជួយសម្រួលអស់ហើយដែរ ដោយមិនឲ្យមានការព្រួយបារម្ភតទៀតទេ។
ទាក់ទងបញ្ហានេះ ផលិតករវ័យក្មេងលោក ចាន់ណា រ៉ូណាន់ ធ្លាប់ប្រកាសថា លោកនឹងឈប់ផលិតកុន ប្រសិនបើក្រសួងនៅតែមានវិធានការឲ្យបង់ពន្ធដ៏ច្រើនបែបនេះ។ លោកលើកឡើងថា លោកហាក់មិនជំទាស់នោះទេ ប្រសិនបើរដ្ឋតម្រូវដាច់ខាតត្រូវតែបង់ពន្ធបែបនេះ។ លោកបន្តថា គោលការណ៍រដ្ឋាភិបាល បានដាក់ចេញបែបនេះហើយ ក្នុងនាមផលិតករដូចលោក គឺត្រូវតែអនុវត្តន៍តាម។ យ៉ាងណាលោកស្នើឲ្យក្រសួង និងរដ្ឋាភិបាល ពិចារណា ឬអាចបន្ធូរបន្ថយបន្ថែមទៀត ខណៈការផលិតភាពយន្តនេះ ផលិតករទើបតែរឹងដៃរឹងជើងតិចមួយប៉ុណ្ណោះ។
សំណើសុំព្យួរពន្ធរយៈពេល ១០ឆ្នាំនេះ ត្រូវក្រុមផលិតករស្នើសុំពីរដ្ឋាភិបាលយូរណាស់មកហើយ ប៉ុន្តែសំណើនេះ ហាក់មិនទទួលផ្លែផ្កានោះទេ។ យ៉ាងណា ក្រសួង និងរដ្ឋាភិបាល បានជួយដោះស្រាយបញ្ហាផ្សេងៗជាច្រើន ដើម្បីឲ្យផលិតករកាន់តែមានភាពប្រសើរឡើង ក្នុងការផលិតភាពយន្ត៕
ចុចអាន៖
