អាហារូបករណ៍១០កន្លែងសម្រាប់អ្នកចង់បន្តក្ដីស្រមៃកាន់តែធំក្នុងវិស័យតន្ត្រី

2018-05-25 08:40:03
ព័ត៌មាន

2018-05-25 08:40:03
ចំនួនមតិ 0 | ចំនួនចែករំលែក 0

ចន្លោះមិនឃើញ

«ពេលខ្ញុំចាប់ផ្ដើមប្រឡូកក្នុងវិស័យតន្ត្រីខ្មែរដំបូង ខ្ញុំមានក្ដីស្រមៃថាបទចម្រៀង Original ខ្មែរយើងនឹងត្រូវបានផ្ដល់តម្លៃ និងគាំទ្រ ដែលជាកម្លាំងចិត្តជំរុញឲ្យតន្ត្រីករខ្មែរផលិតបទថ្មីមិនចម្លងគេ កាន់តែច្រើន។មកដល់ពេលនេះឃើញថាបានក្លាយជាការពិតហើយ។ ឥលូវនេះខ្ញុំបានបន្តក្តីស្រមៃមួយទៀតហើយ គឺចង់ឲ្យបទខ្មែរយើងមានឈ្មោះបោះសម្លេងទៅក្រៅប្រទេសទៀត ហើយខ្ញុំជឿជាក់ថាខ្មែរយើងអាចធ្វើបាន»។នេះជាការលើកឡើងរបស់តារាចម្រៀង Laura Mam ថ្លែងក្នុងកម្មវិធីសន្និសីទសារព័ត៌មានស្តីពី ការប្រកាសផ្ដល់អាហារូបករណ៍សិក្សាតន្ត្រីរបស់ Music Academy នៃអង្គការតន្ត្រី The Sound Initiative កាលពីព្រឹកម្សិលមិញនេះនៅវិទ្យាស្ថានសិល្បៈភ្នំពេញអន្តរជាតិ PPIIA។

តារាចម្រៀង Laura Mam អគ្គរដ្ឋទូតសុច្ឆន្ទៈនៃ The Sound Initiative

តារាចម្រៀងក្រុមក្មេងខ្មែរ សុជាតិ ក៏បានលើកឡើងដែរថា៖«ខ្ញុំជឿជាក់ថានេះជាអ្វីដែលគ្រប់គ្នាចង់បានបំផុត ព្រោះខ្ញុំ និងពន្លឺបានឆ្លងកាត់រួចអស់ហើយ វាពិបាកខ្លាំងណាស់បើយើងចង់បង្កើតអ្វីថ្មី លេចធ្លោដើម្បីទទួលបានការគាំទ្រ។ ដូច្នេះខ្ញុំសង្ឃឹមថាអ្នកដែលស្រលាញ់តន្ត្រីពិតប្រាកដ និងមានការតាំងចិត្តខ្ពស់ កុំស្ទាក់ស្ទើរចូលរួមជាមួយពួកយើងដើម្បីធ្វើវិស័យតន្ត្រីខ្មែរយើងកាន់តែរីកចម្រើន»។

សុជាតិ សមាជិកក្រុមចម្រៀងក្មេងខ្មែរ និង ជាអគ្គរដ្ឋទូតសុច្ឆន្ទៈនៃ The Sound Initiative

ស្រដៀងគ្នានេះដែរ លោក ពន្លឺ នៃក្រុមក្មេងខ្មែរ ក៏ឲ្យដឹងដែរថា៖«គោលដៅតែមួយគត់ គឺធ្វើម៉េចឲ្យសិល្បករខ្មែរយើងក្លាយជាសិល្បករប្រកបដោយគុណភាពក្នុងវិស័យនេះ ហើយយើងនឹងរួមគ្នាធ្វើវិស័យសិល្បៈយើងកាន់តែខ្លាំង»។

ពន្លឺ សមាជិកក្រុមចម្រៀងក្មេងខ្មែរ និង ជាអគ្គរដ្ឋទូតសុច្ឆន្ទៈនៃ The Sound Initiative

លោកស្រី Laura Baker នាយកគ្រប់គ្រងរបស់អង្គការ The Sound Initiative នៃកម្មវិធីតន្ត្រី Music បានឲ្យដឹងថា៖ «បេក្ខជនជម្រុះចំនួន២០រូប ក្នុងចំណោមអ្នកដាក់ពាក្យជាង១០០នាក់ នឹងត្រូវតែឆ្លងកាត់វគ្គបញ្ចេញសមត្ថភាពនៅនឹងមុខគណៈកម្មការ វគ្គហ្វឹកហាត់ពីមូលដ្ឋានគ្រិស្តតន្ត្រីរយៈពេល១ខែ និងការវាយតម្លៃទេពកោសល្យ ហើយយើងនឹងជម្រុះយកបេក្ខជន១០រូបប៉ុណ្ណោះ សម្រាប់ទទួលបានអាហារូបករណ៍ដើម្បីសិក្សារយៈពេល១ឆ្នាំ។»

«នេះគឺជាការបំពាក់បំប៉នសមត្ថភាព សម្រាប់អ្នកដែលត្រៀមខ្លួនរួចជាស្រេច។ ក្រោយបញ្ចប់ការសិក្សា គេនឹងក្លាយជាតន្ត្រីករឯករាជ្យ ខ្លាំងទាំងចំណេះជំនាញ និងមានការច្នៃប្រឌិតថ្មីក្នុងវិស័យតន្ត្រី»។

លោកស្រី Laura Baker នាយកគ្រប់គ្រងរបស់អង្គការ The Sound Initiative

ចាប់អារម្មណ៍? អាចដាក់ពាក្យចូលរួមឥលូវបាន តាមវិបសាយ www.thesoundinitiative.com/apply។

ការទទួលដាក់ពាក្យផុតកំណត់នៅថ្ងៃទី ២៨ ឧសភា ២០១៨ សូមរួសរាន់ឡើងកន្លែងមានកំណត់។

The Sound Initiative នឹងមាន Concert ធ្វើនៅ Hard Rock Café នៅ ថ្ងៃសៅរ៍ ទី១៦ ខែ មិថុនា ២០១៨ ខាងមុខនេះ ដែលមានការចូលរួមសំដែងដោយ ក្មេងខ្មែរ និង កញ្ញា Laura Mam ក៏ដូចជាតារាចម្រៀង Original ជាច្រើនទៀតផងដែរ។

ដើម្បីទទួលបានព័ត៌មានថ្មីៗ សូម Follow ផេកហ្វេសប៊ុកផ្លូវការ The Sound Initiative។

នេះជាគម្រោងដំបូងនៃអង្គការ The Sound Initiative ដែលមានតារាចម្រៀង Laura Mam និងក្រុមចម្រៀងក្មេងខ្មែរ ជាអ្នកតំណាង និងផ្សព្វផ្សាយ និងមាន លោក អ៊ួង សូរីយ៉ា Music Director ហើយទទួលបានការគាំទ្រផ្នែកហិរញ្ញវត្ថុដោយ ក្រុមហ៊ុនធានារ៉ាប់រងព្រូដិនសលកម្ពុជា ។

លោកស្រី អ៊ុន បូផាននី ប្រធានផ្នែក Brand & Communication នៃក្រុមហ៊ុនធានារ៉ាប់រង Prudential Cambodia បានលើកឡើងថា៖ «ហេតុផលដែលយើងគាំទ្រកម្មវិធីនេះព្រោះយើងមានគោលដៅស្របគ្នានឹងអង្គការ The Sound Initiative ដែលចង់មើលឃើញវិស័យសិល្បៈខ្មែរកាន់តែរីកចម្រើន ហើយកន្លងមកយើងក៏បានវិនិយោគលើគំនិតផ្ដួចផ្ដើមក្នុងវិស័យអប់រំសំខាន់ៗជាច្រើនដែរ។ យើងរីករាយគាំទ្រដល់តន្រ្តីករ និងផលិតករខ្មែរ ដើម្បីឲ្យពួកគេសម្រេចបាននូវក្ដីស្រមៃខ្លួន ហើយយើងនឹងរង់ចាំស្ដាប់តន្ត្រីដ៏ពីរោះៗ ដែលពួកគេនឹងផលិត»។

លោកស្រី អ៊ុន បូផាននី ប្រធានផ្នែក Brand & Communication of Prudential Cambodia

The Sound Initiative កំពុងធ្វើការជាមួយសិល្បករថ្មីៗ ដែលចង់ចូលរួមលើគ្រប់ទម្រង់នៃភាពច្នៃប្រឌិត ទាំងអ្នកចម្រៀង ទាំងអ្នកនិពន្ធបទចម្រៀង និងផលិតករផងដែរ។ ជាមួយការឧបត្ថម្ភពីកម្មវិធី Ableton Live ដែលជាកម្មវិធីសម្រាប់ការបង្កើត និងថតចម្លងបទចម្រៀងអង្គការ The Sound Initiative នឹងផ្ដល់ជូននូវឧបករណ៍ដែលមានគុណភាពសម្រាប់ផលិតកម្មតន្ត្រី៕