- 2017-12-29 04:15:33
- ជីវិតតារា
ទ្រី ដារ៉ាវុធ ៖ កាលនៅជាតួ Background គេមើលលើមើលក្រោម
- 2017-12-29 04:15:33
- ចំនួនមតិ 0 | ចំនួនចែករំលែក 0
ទ្រី ដារ៉ាវុធ ៖ កាលនៅជាតួ Background គេមើលលើមើលក្រោម
ចន្លោះមិនឃើញ
ប្រើពេលត្រឹម២ឆ្នាំ ទ្រី ដារ៉ាវុធ បានវិវត្តខ្លួនមកជាតារាតួឯកម្នាក់ដែលមានប្រិយមិត្តស្គាល់ច្រើន។ប៉ុន្តែក្រឡេកទៅមើលកាលទើបចាប់ផ្ដើមលោកថា គ្មាននរណាចង់ស្គាល់លោកទេ។
"កាលមុនយើងតួ Background មិនសូវមានគេស្គាល់ទេ ជួនយើងខំសើចដាក់គេ គេធ្វើស្មើ...មិនសូវជាចង់ Welcome ដាក់យើងទេ អត់មាននរណាគេស្គាល់យើងទេ គេមើលលើមើលក្រោមដាក់យើងចឹងណាបង"។
ដារ៉ាវុធ បានចាប់ផ្ដើមសិល្បៈពាក់កណ្ដាលឆ្នាំ ២០១៥ ជាតួ Background(តួអម) មុនពេលអ្វីៗត្រូវផ្លាស់ប្ដូរក្រោយលោកជាប់ជយលាភីលេខ១ក្នុងកម្មវិធី Freshie Girls & Boys ជំនាន់ទី១៦។ រំលឹកទៅដល់ការចាប់ផ្ដើមសិល្បៈ អ្នកខេត្តបន្ទាយមានជ័យរូបនេះ ប្រាប់ថា កាលណោះ លោកបានត្រឹមជាតួអមឆាកប៉ុណ្ណោះ ក្នុងនោះលោកថត ភាពយន្តបានម្ដង ស្ប៉តម្ដង និង ខារ៉ាអូខេម្ដង។
ជាតួតូចតាច មិនសូវមានមុខមាត់ ទឹកមាត់មិនសូវប្រៃ ដារ៉ាវុធ ប្រាប់ថាលោកពិបាកចូលចុះចំណោមគេណាស់ បើទោះជារឿយៗលោករមែងធ្វើការរាក់ទាក់ទៅមនុស្សនានាជុំវិញខ្លួនមុនក៏ដោយ។ ប៉ុន្តែក្រោយជាប់លាភីលេខ១ក្នុងកម្មវិធីខាងលើ គាប់ជួនលោកបានបញ្ចប់ការសម្ដែងក្នុងរឿង "កំណត់ហេតុនាងនាថ" និងសម្ដែងជាតួឯកក្នុងរឿង "សសរកន្លោង" ថតស្ប៉តជាដើម ទើបអ្វីបានផ្លាស់ប្ដូរ។
“មកទល់ឥឡូវ ពួកគាត់ខ្លះបានបង្វែរមកធ្វើជាចង់ស្គាល់យើងវិញចឹងណាបង តែមិនអីទេវាជារឿងកាលពីមុន...តែនិយាយទៅដោយសារតែគេមិនចង់រាប់រង មិនចង់ស្គាល់ ទើបធ្វើឲ្យខ្លួនឯងចេះតែខំប្រឹងប្រែងជាប់មករហូត រហូតដល់មានគេស្គាល់ដូចរាល់ថ្ងៃ"។
ក្រោយតស៊ូពីចំណុចសូន្យ មកទល់បច្ចុប្បន្ន ទ្រី ដារ៉ាវុធ បានវិវត្តខ្លួនមកជាតារាពេញនិយមមួយរូប។ លោក បានក្ដាប់ជាប់តំណែងតួឯកបន្តបន្ទាប់ក្នុងខ្សែភាពយន្ត ពោលគឺបន្ទាប់ពីរឿង "សសរកន្លោង" លោកទើបថតចប់វីដេអូភាគទូរទស្សន៍អោយផលិតកម្មខ្មែរមេគង្គក្នុងតំណែងតួឯកដែរ។ ក្រៅពីនេះ លោក មានកិច្ចការជាច្រើនទៀត ដូចជា ពិធីករទូរទស្សន៍ ថតស្ប៉ត ថតខារ៉ាអូខេជាដើម។
ថ្មីៗនេះ ទ្រី ដារ៉ាវុធ ទើបក្លាយជាម្ចាស់ហាងកាហ្វេមួយកន្លែងនៅព្រែកតាមាក់យីហោ "Artist Coffee" ដែលមានទុនវិនិយោគប្រមាណ ៥ម៉ឺនដុល្លារអាមេរិកទៀតផង៕
