ជីវិតពិតរបស់ Alice (Alice In The Wonderland) ពេញទៅដោយភាពស្មុគស្មាញ

2018-06-14 03:54:00
ព័ត៌មាន

2018-06-14 03:54:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់តាំងពីចេញជាលើកដំបូងក្នុងឆ្នាំ ១៨៦៥ មក រឿង "Alice's Adventures in Wonderland” របស់លោក Lewis Carroll បានធ្វើឲ្យអ្នកអានមានការជក់ចិត្តដាក់អារម្មណ៍ទៅក្នុងពិភពពោរពេញទៅដោយមន្តអាគម វេទមន្ត។ សៀវភៅរឿងនេះដែរ គឺរៀបរាប់ពីដំណើរផ្សងព្រេងរបស់ក្មេងស្រីម្នាក់ឈ្មោះ Alice ដែលបានធ្លាក់ចូលទៅក្នុងរន្ធទន្សាយមួយ ដោយបានធ្វើឲ្យនាងជួបទៅនឹងរឿងចម្លែកៗជាច្រើនដែលពោរពេញទៅដោយវេទមន្ត និងភាពសប្បាយរីករាយ។

ប៉ុន្តែ ប្រិយមិត្តជាច្រើនប្រាកដជាមិនបានដឹងទេថា រឿងបែបច្នៃប្រឌិតមួយនេះគឺនិពន្ធឡើងតាមខ្សែជីវិតពិតរបស់ក្មេងស្រីម្នាក់។ រឿង "Alice In Wonderland” គឺនិពន្ធឡើងពីជីវិតរបស់ក្មេងស្រីមួយរូបវ័យ ១០ឆ្នាំដែលមានឈ្មោះថា Alice Liddell។

Alice Liddell កើតនៅថ្ងៃទី ០៤ ខែឧសភា ឆ្នាំ១៨៥២ ក្នុងតំបន់ Westminster នៃទីក្រុងឡុងដុង។ នាងជាកូនស្រីទី ៤របស់ប្ដីប្រពន្ធ Henry និង Lorina Liddell។ ក្នុងឆ្នាំ ១៨៥៦ ក្រុមគ្រួសារត្រកូល Liddell បានផ្លាស់ទីលំនៅទៅទីក្រុង Oxford។ នៅទីនោះហើយដែលពួកគេបានជួបជាមួយនឹងជាងថតរូប និងជាអ្នកនិពន្ធរឿង "Alice In Wonderland” លោក Charles Lutwidge Dodgson ដែលគ្រប់គ្នាស្គាល់លោកតាមរយៈឈ្មោះហៅក្រៅ Lewis Carroll។ ក្រោយពីបានជួបគ្នាជាញឹកញាប់ លោក Liddell និងលោក Lewis បានក្លាយជាមិត្តជិតស្និទ្ធនឹងគ្នា។ លោក Lewis តែងតែយកកាមេរ៉ារបស់លោកមកផ្ទះ លោក Liddell ដើម្បីថតរូបឲ្យកូនៗរបស់នាង។

ក្នុងឆ្នាំ ១៩៦២ ដើម្បីទាក់ចិត្តកូនស្រីទាំង៣ របស់លោក Liddell (Alice, Edith និង Lorina) លោក Lewis បាននិពន្ធរឿងមួយដោយដាក់ឈ្មោះតួអង្គសំខាន់ស្រីថា Alice។ ដំណើរផ្សងព្រេងរបស់នាងក្នុងរន្ធទន្សាយបានធ្វើឲ្យ Alice មានភាពសប្បាយរីករាយជាខ្លាំង។ រឿងនេះដែរ ជារឿងដែលAlice បានសុំអង្វរឲ្យលោក Lewis និពន្ធពីនាង។

ក្រោយមក រឿងរ៉ាវពីទំនាក់ទំនងរវាងក្មេងស្រីអាយុ ១០ ឆ្នាំរូបនេះ ជាមួយបុរស Lewis ត្រូវបានគេរកឃើញថាមានភាពមិនប្រក្រតី ដែលទំនាក់ទំនងរបស់ពួកគេគឺលើសពីទំនាក់ទំនងធម្មតា។ អំឡុងពេលទាក់ទងគ្នារាប់ឆ្នាំជាមួយគ្រួសារ Liddell លោក Lewis បានញុះញង់ក្រុមគ្រួសាររបស់លោកLiddell ឲ្យថតរូបរបស់កូនៗស្រីពួកគេ។ លោក Henry និងប្រពន្ធរបស់លោក Lorina គឺមានភាពសប្បាយរីករាយជាខ្លាំងដែលមានជាងថតដ៏ល្អមួយរូបជួយថតរូបឲ្យគ្រួសាររបស់ពួកគេនោះ។ ក្នុងចំណោមកូនស្រីទាំងអស់របស់ពួកគេ Alice គឺមានភាពស្និទ្ធស្នាលជាមួយលោក Lewis ជាងគេ និងចំណាយពេលជាច្រើនក្នុងការថតរូបរបស់នាង។ ទោះជាយ៉ាងណាក៏ដោយ ក្នុងចំណោមរូបភាពរាប់ពាន់ប៉ុស្តិ៍ មានរូបភាពមួយចំនួនដែលប្ដីប្រពន្ធគ្រួសារមួយនេះមានការភ្ញាក់ផ្អើលនិងរកឃើញថា ជាងថតរូបនេះកំពុងព្យាយាមថតលើសពីអ្វីដែលពួកគេចង់បាន។

ឧទាហរណ៍ជាក់ស្ដែង ក្នុងរូបថតមួយ Alice បានស្លៀករ៉ូបពណ៌សជាមួយអាវដាច់រយះលើស្មា។ រូបមួយផ្សេងទៀត ជារូបក្មេងស្រីអាយុ ៧ឆ្នាំម្នាក់ឈ្មោះ Beatrice Hatch ស្រាតននលគោកអង្គុយលើច្រាំងថ្មនៅឯសមុទ្រ។ រូបភាពអាក្រក់មើលទាំងនេះ ត្រូវបានលោក Lewis លាក់ក្នុងអាល់ប៊ុមរូបផ្ទាល់ខ្លួនរបស់លោក ហើយរាប់ឆ្នាំក្រោយលោកស្លាប់ រូបភាពមួយចំនួនទៀតក៏ត្រូវបានរកឃើញ។ ក្នុងចំណោមរូបដ៏គួរឲ្យភ្ញាក់ផ្អើលទាំងនោះ គឺមានរូបរបស់ Lorina ដែលត្រូវជាបងស្រីរបស់ Aliceមួយផងដែរ មិនមានស្លៀកសម្លៀកបំពាក់អ្វីទាំងអស់។

ក្នុងឆ្នាំ ១៨៦៣ ទំនាក់ទំនងដ៏ជិតស្និទ្ធរវាងគ្រួសារ Liddell និងលោក Lewis ត្រូវបានកាត់ផ្ដាច់គ្នា ដោយមិនដឹងមូលហេតុ។ អ្នកខ្លះនិយាយថា មកពីលោក Lewis ស្រឡាញ់និងចង់រៀបការជាមួយ Alice ដែលជាក្មេងស្រីមានវ័យត្រឹម ១១ឆ្នាំ។ ចំណែកអ្នកខ្លះទៀត គិតថាបងស្រីរបស់ Alice (Lorina) បានលង់ស្រឡាញ់លោក Lewis តែលោកមានចិត្តស្រឡាញ់តែ Alice ប៉ុណ្ណោះ។ រហូតមកដល់បច្ចុប្បន្ននេះ ការប៉ាន់ស្មានទាំងប៉ុន្មានគឺនៅតែមិនច្បាស់ដដែល ខណៈសៀវភៅកំណត់ហេតុរបស់អ្នកនិពន្ធរូបនេះត្រូវបានដុតកម្ទេចចោលអស់ទៅហើយនោះ។

ក្នុងវ័យ ២៨ ឆ្នាំ Alice បានរៀបការជាមួយកីឡាករលេង Cricket ម្នាក់ឈ្មោះ Reginald Hargreaves។ អាពាហ៍ពិពាហ៍របស់ពួកគេបានប្រារព្ធឡើងនៅឯព្រះវិហារ Westminster Abbey។ គូស្នេហ៍មួយគូនេះទទួលបានកូនប្រុសចំនួន ៣នាក់ជាចំណងដៃ (Alen, Leopold និង Caryl)។ ទោះជាយ៉ាងណាក៏ដោយ កូនប្រុសដំបូង២រូបរបស់ Alice ត្រូវបានបង្ខំឲ្យចូលបម្រើកងទ័ពក្នុងសង្គ្រាមលោកលើកទី១។

ក្នុងឆ្នាំ ១៩២៦ ក្រោយស្វាមីរបស់នាង Reginald បានទទួលមរណភាពទៅ Alice រស់នៅក្នុងផ្ទះដ៏ធំមួយម្នាក់ឯង។ ក្រោយមក ជីវិតជាស្ត្រីមេម៉ាយ ដែលបាត់បង់គ្រប់យ៉ាង បានធ្វើឲ្យនាងធ្លាក់ខ្លួនក្រតោកយ៉ាក។ ចុងបញ្ចប់ នាងត្រូវបង្ខំចិត្តលក់សៀវភៅ "Alice In Wonderland” ដែលលោក Lewis ជូននាងនោះ ដើម្បីបានប្រាក់ចិញ្ចឹមជីវិតនាងបន្ត។ ក្នុងឆ្នាំ ១៩៣៤ Alice បានស្លាប់ក្នុងវ័យ ៨២ឆ្នាំ។ សពរបស់នាងត្រូវបានបញ្ចុះនៅភូមិ Lyndhurst នៃតំបន់ Hampshire៕

ប្រភព៖ Kenh14 ប្រែសម្រួល៖ អន សុភក្ត្រា