គួរឲ្យអាសូរ វីជេ អាលីយ៉ា មានសំណូមពរ២ សុំឲ្យសប្បុរសជនជួយទាំងសម្តីខ្សាវៗ

2018-06-26 05:02:04
ព័ត៌មាន

2018-06-26 05:02:04
ចំនួនមតិ 0 | ចំនួនចែករំលែក 0

ចន្លោះមិនឃើញ

វីជេ អាលីយ៉ា មានសំណូមពរពីរយ៉ាងពីសប្បុរសជន ដោយសង្ឃឹមថានឹងទទួលបានឆាប់ៗ អំឡុងពេលសម្រាកព្យាបាលជំងឺនៅមន្ទីរពេទ្យកាល់ម៉ែត្រ។ តារាស្រីកំពុងមានជំងឺរលាកទងសួតធ្ងន់ធ្ងរ បានប្រាប់ Sabay ថា សំណូមពរ២យ៉ាងនោះ គឺចង់បានបន្ទប់សម្រាកព្យាបាលមួយដាច់ដោយឡែកពីអ្នកជំងឺផ្សេងៗ និងសុំអ្នកមើលថែម្នាក់ពេលជំងឺធ្វើទុក្ខម្តងៗ។

ក្នុងសម្តីខ្សាវៗ អាលីយ៉ា និយាយថា ស្ទើររាល់យប់នាងមិនបានសម្រាកឲ្យពេញភ្នែកឡើយ ដោយសារសំឡេងរំខាន ព្រោះសព្វថ្ងៃនាងសម្រាកក្នុងបន្ទប់ជាមួយអ្នកជំងឺជាច្រើន។ លើសពីនេះ ជើងទាំងពីរស្វិតដើរមិនរួចនោះទេ នៅពេលចង់ទៅបន្ទោរបង់ ឬដើរទៅណា គឺពិបាកខ្លាំងណាស់។ មានពេលខ្លះត្រូវបត់ជើងតូច-ធំ នៅលើគ្រែគេងក៏មាន។ អ្វីដែលសង្វេគទៀតនោះ ពេលជំងឺធ្វើទុក្ខម្ដងៗ វីជេ អាលីយ៉ា ស្ទើរដាច់ខ្យល់ស្លាប់ទៅហើយ ព្រោះគ្មានអ្នកណាជួយមើលថែ ឬហៅគ្រូពេទ្យឲ្យនោះទេ ព្រោះអ្នកនាងគ្មានសាច់ញាតិ ឬបងប្អូន។

អាលីយ៉ា មិនអាចនិយាយស្តីបានច្រើននោះទេ ព្រោះឆាប់ហត់ ពេលខ្លះដង្ហើមដកស្ទើរមិនដល់គ្នា ចំណែកត្រចៀកស្ដាប់មិនសូវឮ រាងកាយល្ហិតល្ហៃ ក្តៅខ្លួន ហើយត្រូវដាក់បំពង់ខ្យល់អុកស៊ីសែនជាប្រចាំដើម្បីជំនួយ។ ប៉ុន្តែរូបនាងបញ្ជាក់ថា ពេលនេះសុខភាព និងអារម្មណ៍ផ្លូវចិត្តបានធូរស្រាលមួយកម្រិត បើធៀបនឹងគ្រាដំបូងមកសម្រាកនៅមន្ទីរពេទ្យនេះ។

ដោយក្តីអាណិត មានបងប្អូនទាំងក្នុង និងក្រៅសិល្បៈ បានមកសួរសុខទុក្ខ ព្រមទាំងស្វែងរកជំនួយផ្សេងៗដូចជា រកអ្នកមើលថែជំងឺឲ្យ និងឧបត្ថម្ភថវិកាខ្លះៗសម្រាប់ការហូបចុកនៅមន្ទីរពេទ្យ និងលើកទឹកចិត្តដល់ វីជេ អាលីយ៉ា ឲ្យឆាប់ជាផងដែរ។

ស្ថានភាពរបស់វីជេដែលធ្លាប់តែបង្ហាញខ្លួនក្នុងវិថីសិល្បៈយ៉ាងរីករាយ បែរជាធ្លាក់ខ្លួនយ៉ាងដុនដាបក្នុងជំងឺធ្ងន់ធ្ងរបែបនេះធ្វើឲ្យមហាជនទាំងក្នុងនិងក្រៅសិល្បៈ ភ្ញាក់ផ្អើលយ៉ាងខ្លាំង៕

អត្ថបទ៖ លឹម សុនា