- 2018-07-11 03:29:50
- ព័ត៌មាន
ខេមរៈ សិរីមន្ត ផ្តល់ទឹកប្រាក់ឲ្យ ចាន់ សម័យ ១ពាន់ដុល្លារ
- 2018-07-11 03:29:50
- ចំនួនមតិ 0 | ចំនួនចែករំលែក 0
ខេមរៈ សិរីមន្ត ផ្តល់ទឹកប្រាក់ឲ្យ ចាន់ សម័យ ១ពាន់ដុល្លារ
ចន្លោះមិនឃើញ
តារាចម្រៀង ខេមរៈ សិរីមន្ត បានសម្រេចផ្ដល់ប្រាក់ចំនួន១ពាន់ដុល្លារ ដើម្បីជួយដល់លោក ចាន់ សម័យ ម្ចាស់បទ "សុំមេមាន់មួយ" ដែលកំពុងតែធ្លាក់ខ្លួនឈឺ និងជួបបញ្ហាសេដ្ឋកិច្ចជាច្រើនឆ្នាំមកហើយ។ នេះតាមការឲ្យដឹងពី លោក អេង វត្ថា ដែលជាសប្បុរសជនម្នាក់បានប្រកាសស្វែងរកមូលនិធិជួយដល់តារាចម្រៀង ចាន់ សម័យ។
តាម លោក អេង វត្ថា ក្រៅពីតារាចម្រៀង ខេមរៈ សិរីមន្ត នៅមានសប្បុរសជនជាច្រើនរូបទៀតដែលបានចូលរួមជួយដល់ លោក ចាន់ សម័យ សរុបជាទឹកប្រាក់ ក្រុមរបស់លោកទទួលបានជិត២ពាន់ដុល្លារ ដោយប្រាក់ទាំងនោះ នៅក្នុងដៃ លោក ចាន់ សម័យ ទាំងអស់ លោកនឹងធ្វើបញ្ជីប្រកាសជាសាធារណៈឆាប់ៗនេះ។
ទោះបីជា ខេមរៈ សិរីមន្ត បានប្រកាសថានឹងជួយប្រាក់១ពាន់ដុល្លារក៏ពិតមែន ទឹកប្រាក់នោះនៅមិនទាន់បានទៅដល់ដៃលោក ចាន់ សម័យ នៅឡើយ ត្បិតអីតារាចម្រៀង សិរីមន្ត កំពុងតែជាប់ទៅច្រៀងនៅប្រទេសថៃ នេះបើតាមការឲ្យដឹងពី លោក ចាន់ សម័យ។ លោកថា តារាចម្រៀង សិរីមន្ត អាចនឹងមកជួបខ្លួនដោយផ្ទាល់បន្ទាប់ពីត្រលប់មកពីប្រទេសថៃ។
ម្ចាស់បទ"ស្តង់ដារស្រីស្អាត" បានសម្ដែងការរំភើប និងដឹងគុណជាខ្លាំង បន្ទាប់ពីអាការៈជំងឺនិងស្ថានភាពសេដ្ឋកិច្ចរបស់លោកត្រូវបានមហាជនដឹង ហើយមានការជួយជាបន្តបន្ទាប់បែបនេះ។ លោកសូមជូនពរឲ្យសប្បុរសជនទាំងអស់ជួបតែសំណាងល្អ រកស៊ីមានបាន ការងារជោគជ័យគ្រប់ភារកិច្ច។
តាមការឲ្យដឹងពីលោក ចាន់ សម័យ តារាចម្រៀងរូបនេះមានជំងឺរបេងឆ្អឹងជាង២០ឆ្នាំមកហើយ ដោយក្នុងនោះ លោកក៏ធ្លាប់ពីព្យាបាលនៅមន្ទីរពេទ្យផងដែរ។ កាលនៅសុខភាពល្អ លោកមានទម្ងន់រហូតដល់ទៅ៩០គីឡូជាង ប៉ុន្តែបច្ចុប្បន្ននៅសល់តែ៦២ គីឡូប៉ុណ្ណោះ។
លោកថ្លែងថា ការរកស៊ីស្ទូចត្រីលក់ គឺជារឿងពិតរបស់លោក ព្រោះតែទីផ្សារសិល្បៈរកមិនបានយូរៗបានឡើងច្រៀងតាមប៉ុស្តិ៍ និងច្រៀងតាមរោងការម្ដងៗប៉ុណ្ណោះ ឯសុខភាពក៏មិនអំណោយផល។ បច្ចុប្បន្នលោក ចាន់ សម័យ កំពុងតែស្នាក់នៅផ្ទះជួល១កន្លែង ក្នុងសង្កាត់ព្រែកលៀប ដោយជួលក្នុង១ខែតម្លៃ៨០ដុល្លារ ហើយត្រូវទទួលរាប់រងចិញ្ចឹមគ្រួសារ និងក្មួយម្នាក់។ លោកមានកូនរហូតដល់ទៅ ៥នាក់ គឺប្រុសពីរនាក់ ស្រី៣នាក់ (កូនភ្លោះប្រុស២ ស្រីកណ្ដាល១ និងភ្លោះស្រី២ក្រោយ៕
