អាសូរ! តារាទាំងនេះមានបញ្ហាសុខភាពធ្ងន់ធ្ងរ ធ្វើឲ្យទស្សនិកជនជនបារម្ភមិនស្ទើរ

2018-07-23 04:47:12
ជីវិតតារា

2018-07-23 04:47:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងខែកក្កដានេះ តារាជាច្រើនដួងមានបញ្ហាសុខភាពធ្ងន់ធ្ងរ មិនអាចទៅបំពេញការងារបាន។ ដោយសារតែខំប្រឹងប្រែងនឹងការងារខ្លាំងពេក មិនសូវបានយកចិត្តទុកដាក់សុខភាព តារាទាំង៤ដួងធ្លាក់ខ្លួនឈឺយ៉ាងទ្រុឌទ្រោម ។

ខ្លះត្រូវបញ្ជូនទៅមន្ទីរពេទ្យទាំងកណ្ដាលអាធ្រាត្រ ហើយខ្លះទៀតកំពុងសម្រាកព្យាបាលជំងឺនៅឡើយ រីឯតារាមួយចំនួនក៏បានធូរស្រាលជំងឺ អាចទៅបន្តការងារសិល្បៈរបស់ខ្លួន បានធម្មតា។ អ្នកគាំទ្រគ្រប់គ្នាជូនពរឲ្យពួកគេ បានជាសះស្បើយពីជំងឺឆាប់ៗ និងមានសុខភាពល្អឡើងវិញ។

ម៉ឺន ពិសិដ្ឋ

រូបភាព៖ FB Ravy HT

តួអង្គ ម៉ា ចាវីន ក្នុងរឿង "បេសកកម្មមួយ" មានជំងឺរលាកស្រោមខួរក្បាល រហូតដេកសន្លប់អស់ជាច្រើនថ្ងៃ យ៉ាងព្រួយបារម្ភបំផុត។ ការចំណាយលើថ្លៃព្យាបាល បានក្លាយជាបញ្ហាប្រឈមយ៉ាងខ្លាំងសម្រាប់ក្រុមគ្រួសាររបស់តារាដែលមានបងប្អូនប្រុសស្រី១២នាក់ ហើយពិសិដ្ឋ ជាកូនច្បងតែត្រូវគេងលើគ្រែមន្ទីរពេទ្យយ៉ាងអាសូរ។

ក្រោយពីសម្រាកនៅមន្ទីរពេទ្យជាច្រើនថ្ងៃ បើតាមក្រុមគ្រួសាររបស់ពិសិដ្ឋ ប្រាប់ថា មកទល់ពេលនេះ លោកបានដឹងខ្លួន និងមានការចងចាំខ្លះៗហើយ។ លោកអាចពិសាអាហារបានតិចតួច តែកម្លាំងនៅល្ហិតល្ហៃ មិនទាន់អាចក្រោកពីគ្រែបាននោះទេ ។ អ្នកគាំទ្រជាច្រើន អាណិតវាសនាតារាពន្លកថ្មីរូបនេះ ហើយមានសប្បុរសជនមួយចំនួនបានរៃជាថវិកាជួយដល់ ពិសិដ្ឋ និងសង្ឃឹមថា ពិសិដ្ឋឆាប់ជាពីជំងឺ។

សុខ រក្សា

រូបភាព៖ FB Kol Davy

តារាពូកែលេងហ្គីតារូបនេះ មានជំងឺមេរោគក្នុងពោះវៀន ប៉ះពាល់ដល់ពោះវៀនតូចនិងធំ រហូតធ្វើឲ្យកញ្ញា កុល ដាវី ជាគូស្នេហ៍គ្មានព្រលឹងធ្វើការ ចោលការងារទាំងកណ្ដាលទី មកមើលតារាចម្រៀងរូបនេះនៅមន្ទីរពេទ្យ។ ជំងឺរបស់លោកបានធ្វើទុក្ខ រហូតដល់ឡើងកម្តៅជាង ៤០ អង្សារសេ វិលមុខ និងរាគ មិនឈប់ថែមទៀត។ ទោះយ៉ាងណា អាការៈរបស់លោកបានធូរស្រាលមួយកម្រិតហើយ បន្ទាប់ពីគ្រូពេទ្យ ពិនិត្យព្យាបាលយ៉ាងយកចិត្តទុកដាក់។

លី ម៉ារីណា

រូបភាព៖ FB Ly Marina

មិនខុសគ្នាប៉ុន្មាន តារាសម្ដែងនៅតែរក្សាបានភាពក្មេងជាងវ័យ ត្រូវចូលមន្ទីរពេទ្យទាំងកណ្ដាលអាធ្រាត្រ ដោយសារតែ រលាកក្រពះ និងពោះវៀន។ ក្រោយសម្រាករយៈពេលជាង៣ ថ្ងៃ អ្នកនាង លី ម៉ារីណា បានសរសេរលើបណ្ដាញសង្គមថា ខ្លួនបានធូរបន្តិចហើយ ធ្វើឲ្យមិត្តភ័ក្ដិ និងអ្នកគាំទ្រ ទាំងអស់សប្បាយចិត្ត និងជូនពរឲ្យតារារូបនេះ ឆាប់ជាពីជំងឺ។

ស៊ុន ស្រីពេជ្រ

រូបភាព៖ FB Sunsreypich

តារាចម្រៀងរូបនេះ ធ្វើឲ្យទស្សនិកជនភ្ញាក់ផ្អើល ដោយសារតែគូស្នេហ៍ បានបង្ហោះរូបជាច្រើនសន្លឹករបស់កញ្ញា ស៊ុន ស្រីពេជ្រ ចូលសម្រាកព្យាបាលជំងឺទាំងយប់។ ស្ថានភាពជំងឺរបស់កូនស្រី តារាកំប្លែង សង់ សីស ដោយសារ តែហត់នឿយនឹងការងារពេក គួបផ្សំនឹងហូបមិនទៀងទាត់ បណ្ដាលឲ្យអស់កម្លាំងវិលមុខ ទើបត្រូវមកសម្រាកនៅមន្ទីរពេទ្យបែបនេះ។ យ៉ាងណា កញ្ញា ស៊ុន ស្រីពេជ្រ បានធូរស្រាលពីជំងឺ និងអាចចេញទៅបំពេញការងារបានធម្មតា វិញហើយ៕

អត្ថបទ៖ លឹម សុនា