Demi Lovato នៅបន្តសម្រាកក្នុងមន្ទីរពេទ្យ ក្រោយប្រតិកម្មការប្រើប្រាស់ថ្នាំលើសកម្រិត

2018-07-31 03:29:00
ព័ត៌មាន

2018-07-31 03:29:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Demi Lovato នៅតែបន្តសម្រាកព្យាបាលក្នុងមន្ទីរព្យាបាល Cedras-Sinai Medical Center នៅឡើយ ក្រោយនាងត្រូវបានបញ្ជូនសង្គ្រោះបន្ទាន់កាលពីថ្ងៃអង្គារមក។

មូលហេតុដែលតារាស្រីរូបនេះនៅបន្តសម្រាកក្នុងមន្ទីរពេទ្យ គឺដោយសារតែសុខភាពរបស់នាងបច្ចុប្បន្ននៅមានសភាពទន់ខ្សោយនៅឡើយ។ បើតាមវិបសាយ TMZ បានឲ្យដឹងថា ម្ចាស់បទ "Heart Attack” រូបនេះ នៅវិលមុខ ក្ដៅខ្លួនខ្លាំង រួមនឹងបញ្ហាសុខភាពផ្សេងៗទៀត ដែលបង្កឡើងដោយការប្រើប្រាស់ថ្នាំហួសកម្រិត។

បើតាមសារព័ត៌មាន The People បានឲ្យដឹងដែរថា៖ "Demi នៅមិនទាន់ស្រួលប៉ុន្មានទេក្នុងរយៈពេលប៉ុន្មានថ្ងៃនេះ។ នាងក្ដៅខ្លួន និងដូចជាមានមេរោគក្នុងខ្លួន។ Demi ត្រូវបន្តសម្រាកព្យាបាលប៉ុន្មានថ្ងៃទៀត ទើបនាងអាចជាសះស្បើយជាធម្មតាវិញ"។

តាមសេចក្ដីរាយការណ៍មុនដំបូងបាននិយាយថា ការប្រើប្រាស់ថ្នាំលើសកម្រិតរបស់ Demi ស្ទើរនឹងធ្វើឲ្យនាងបាត់បង់ជីវិត។ នាងបានសន្លប់បាត់ស្មារតី នៅពេលបុគ្គលិកពេទ្យបានទៅដល់ផ្ទះនាង។ ពួកគេបានប្រើប្រាស់ថ្នាំប្រភេទ Narcan ចាក់ទៅលើនាង ដើម្បីបង្ការការមានប្រតិកម្មពីថ្នាំដែលនាងបានផឹកលើសកម្រិតនោះ។ ជាមួយគ្នានេះដែរ តារាចម្រៀង Demi បានបដិសេធមិនព្រមប្រាប់បុគ្គលិកពេទ្យពីឈ្មោះថ្នាំដែលនាងបានប្រើប្រាស់ទេ ប៉ុន្តែបើតាមសារព័ត៌មាន TMZ បានបញ្ជាក់ថា វាជាប្រភេទថ្នាំញៀនប្រើប្រាស់ដើម្បីកាត់បន្ថយការឈឺចាប់។

គួរបញ្ជាក់ដែរថា បច្ចុប្បន្នខាងក្រុមគ្រូពេទ្យមិនទាន់បានសម្រេចចិត្តនៅឡើយទេ ថាអាចឲ្យតារាចម្រៀងស្រីរូបនេះចាកចេញពីមន្ទីរពេទ្យពេលណាបាននោះ ខណៈសុខភាពរបស់នាងនៅមានសភាពទន់ខ្សោយនៅឡើយ៕

ប្រភព៖ Kenh14 ប្រែសម្រួល៖ អន សុភក្ត្រា