ស្ទើរស្រក់ទឹកភ្នែក អ្នកគ្រូ គង់ ណារី ត្រូវការរឿងនេះចាំបាច់ ពេលកើតជំងឺធ្ងន់ធ្ងរ

2018-10-04 02:28:35
ព័ត៌មាន

2018-10-04 02:28:35
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគ្រូ គង់ ណារី ដែលត្រូវគេស្គាល់ថា អ្នកសិល្បៈជើងចាស់បណ្ដុះបណ្ដាលសិល្បករជំនាន់ក្រោយឲ្យចេះសិល្បៈច្រើនទម្រង់ និងជាសាស្ត្រាចារ្យផ្នែកអក្សរសាស្ត្រខ្មែរ នៅវិទ្យាល័យវត្តកោះ កំពុងសម្រាកព្យាបាលជំងឺថ្លើម ប្រភេទ C នៅមន្ទីរពេទ្យលោកសង្ឃ ។

ប្រភេទជំងឺមានសភាពធ្ងន់ធ្ងរ ធ្វើឲ្យអ្នកគ្រូបាក់ទឹកចិត្តយ៉ាងខ្លាំង ហើយអ្វីដែលអ្នកគ្រូ ណារី ត្រូវការបំផុតនៅពេលនេះ គឺកម្លាំងចិត្ត។

និយាយបណ្ដើរ យំបណ្ដើរ អ្នកគ្រូ ប្រាប់ថា ពេលខ្លះមានអារម្មណ៍ ឯកា ទោះជាបានខំប្រឹងក្នុងសិល្បៈអស់ពេលជាង៣០ឆ្នាំមកហើយ តែពេលមានទុក្ខលំបាក ហាក់មិនសូវមានអ្នកអើពើ។ លើសពីនេះ កូនសិស្សជាច្រើន ដែលធ្លាប់ទទួលការបណ្ដុះបណ្ដាល មួយចំនួនធំក៏មិនសូវខ្វល់ខ្វាយពីសុខទុក្ខ ពេលគ្រូជួបបញ្ហា។

បើនិយាយពីស្ថានភាពជំងឺវិញ ដោយសារជាតិពុលក្នុងថ្លើមច្រើន ធ្វើឲ្យពេលខ្លះ អ្នកគ្រូណែនតឹងពោះ ពិបាកដកដង្ហើម និងហើមជើងហើមដៃ។ តាមពិត អ្នកគ្រូមានជំងឺនេះយូរណាស់មកហើយ តែទើបដឹងច្បាស់នៅខែ៦ខែមុនប៉ុណ្ណោះ។ ចំពោះការតាមដាននិងមើលជំងឺ មានសមាគមមិត្តគ្រូពេទ្យគ្មានព្រំដែន បានជួយដោយមិនយកប្រាក់ ប៉ុន្តែបន្ទុកមួយធ្ងន់ គឺថ្នាំសង្កូវ ដែលត្រូវចំណាយខ្ពស់ដល់ទៅរាប់រយដុល្លារ ជារៀងរាល់ខែ ជាហេតុធ្វើឲ្យការចំណាយកាន់តែច្រើន និងខ្វះខាតគួរឲ្យព្រួយបារម្ភ។

អ្នកគ្រូ ធ្លាប់ទទួលបានថវិកាខ្លះៗ ពីសប្បុរសជន ប៉ុន្តែដោយសារជំងឺនេះ ស្ថិតក្នុងប្រភេទធ្ងន់ធ្ងរ ដូច្នេះត្រូវចំណាយច្រើន។ ក្រៅពីមានជំងឺប្រចាំកាយហើយ អ្នកគ្រូនៅមានបន្ទុកចិញ្ចឹមម្ដាយឪពុកចាស់ជរា វ័យប្រមាណ៨៨ឆ្នាំ និងទារកអាយុ៩ខែ ដែលរើសមកចិញ្ចឹមថែមទៀត។

បម្រើសិល្បៈច្រើនឆ្នាំមែន តែអ្នកគ្រូហាក់មិនសល់អ្វីច្រើនទេ ក្រៅពីជំងឺ។ អ្នកគ្រូ មិនចង់លើកដៃអំពាវនាវឲ្យមានការជួយជាថវិកានោះទេ តែបើសប្បុរសជន មានឆន្ទៈ ទឹកចិត្តអាណិតស្រលាញ់ជួយ អ្នកគ្រូ ក្នុងនាមជាអ្នកធ្លាប់មានស្នាដៃក្នុងវិស័យមួយនេះ នោះអ្នកគ្រូរីករាយទទួលបំណងនេះ។

អ្នកគ្រូ គង់ ណារី ធ្លាប់មានស្នាដៃបណ្ដុះបណ្ដាលតារាជាច្រើន ឲ្យចេះច្រៀង ពិធីករ បង្ហាញម៉ូដ និងសិល្បៈច្រើនទម្រង់ទៀត ក្នុងនោះ ក៏មានតារាដូចជា ទូច ស៊ុននិច អ៊ឹង រដ្ឋា ហៅទុយ សាន ផានិត ជាដើម។ ពេលនេះ អ្នកគ្រូណារី សម្រាកព្យាបាលនៅមន្ទីរពេទ្យលោកសង្ឃ នៅអគារលាងឈាម ក្នុងបន្ទប់ G1-G2 ៕