ក្មេងប្រុសនិយាយបាន ១៥ ភាសា អាចមានឱកាសក្លាយជាតារាចម្រៀង ក្រោយគេអញ្ជើញទៅទីក្រុងប៉េកាំង

2018-11-15 04:09:46
ព័ត៌មាន

2018-11-15 04:09:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនខ្មែរភាគច្រើនប្រាកដជាធ្លាប់បានឮ និងស្គាល់ហើយ ចំពោះក្មេងប្រុសខ្មែរយើងម្នាក់ដែលកំពុងល្បីលើបណ្ដាញសង្គម ជាមួយសមត្ថភាពនិយាយបានច្រើនភាសារបស់គេនោះ ថ្មីៗនេះ រូបគេ និងក្រុមគ្រួសារកំពុងត្រូវបានអញ្ជើញដោយក្រុមហ៊ុនមួយទៅកាន់ទីក្រុង Beijing ដើម្បីធ្វើកិច្ចសម្ភាស និងបង្ហាញទេពកោសល្យរបស់គេលើទឹកដីនៃប្រទេសចិន ។

បើតាមវិបសាយ Shinchew របស់ប្រទេសចិនបានឲ្យដឹងថា ក្មេងប្រុសវ័យ ១៤ឆ្នាំនេះ មានឈ្មោះថា ធុច សាលិក កំពុងទទួលបានភាពល្បីល្បាញលើបណ្ដាញសង្គម ក្រោយរូបគេនិយាយទៅកាន់អ្នកទេសចរសញ្ជាតិម៉ាឡេស៊ីម្នាក់ ជាមួយភាសាផ្សេងៗគ្នាជាច្រើន ក្នុងនោះរួមមានភាសាម៉ាឡេស៊ី ភាសាចិន ភាសាអាល្លឺម៉ង់ ភាសាបារាំង និងភាសាថៃជាដើម។

ដោយសារតែទេពកោសល្យអាចនិយាយបានច្រើនភាសា ជាមួយនឹងការរៀនតែតាមពីអ្នកទេសចរបរទេស ក្មេងប្រុសរូបនេះ អាចនិយាយភាសាចិនបានល្អជាងគេ។ តាមកិច្ចសម្ភាសជាមួយសារព័ត៌មានក្នុងស្រុក រូបគេក៏និយាយពីបំណងរបស់ខ្លួនថា ចង់ចូលរួមកម្មវិធីប្រគំតន្ត្រីក្នុងទីក្រុង Beijing ទើបដំណឹងមួយនេះ លេចឮដល់ក្រុមហ៊ុនសារព័ត៌មានប្រចាំប្រទេសចិន ហើយពួកគេក៏បានអញ្ជើញ សាលិក រួមទាំងក្រុមគ្រួសារទៅទីក្រុង Beijing តែម្ដង។

អ្វីដែលកាន់តែពិសេសនោះ ក្រៅពីទទួលការអញ្ជើញដើម្បីធ្វើកិច្ចសម្ភាសក្នុងប្រទេសចិននេះ ផលិតកររបស់ក្រុមហ៊ុនមួយនេះ ក៏បានផ្ដល់ឱកាសឲ្យសាលិក បង្ហាញសមត្ថភាពរបស់គេលើឆាកប្រគំតន្ត្រីនោះផ្ទាល់ផងដែរ។ ប្រសិនបើការច្រៀងរបស់គេបានល្អ ក្រុមហ៊ុននោះអាចនឹងនាំគេមកស្នាក់នៅក្នុងប្រទេសចិន ដើម្បីធ្វើការហ្វឹកហាត់ ដើម្បីអាចក្លាយជាតារាចម្រៀងមួយរូបនៅពេលអនាគត៕